Kamu spatrebiłasia "Aperacyja "Śvisłač"?
Čym patłumačyć toj presinh, pad jaki padpali demakratyčnyja aktyvisty, što pažadali adznačyć Dzień pamiaci paŭstancaŭ 1863 hodu? Razvažaje ŭ svaim błohu Alaksandar Kłaskoŭski.
Čym patłumačyć toj presinh, pad jaki padpali demakratyčnyja aktyvisty, što pažadali adznačyć u Śvisłačy Dzień pamiaci paŭstancaŭ 1863 hodu? Adkul taki impet u "orhanaŭ"? Heta ž nie "Sacyjalny marš", kali apazycyja nastupaje ŭładzie na balučy mazol!
Naadvarot, kali ŭžo na toje, dyk lozunhi Kastusia Kalinoŭskaha, zdavałasia b, całkam dapasujucca da zadačaŭ siońniašniaha supraćstajańnia "enerhietyčnaj imperyi". Chto-kolviek navat pradrakaje: voś-voś ułada adumajecca dy pačnie biełarusizavacca. Bo jnačaj jak ža vybudoŭvać dziaržavu dy nacyju?
Ale tut adbyvajecca jakaja-niebudź čarhovaja presavaja kanferencyja — i atrymajcie, panovie, chałodny duš! Znoŭ čujecca, što rasiejcy i biełarusy — adzin narod i ŭsio takoje (mianie, darečy, kožny raz cikavić, ź jakim kankretna etnasam Rasiei nas identyfikujuć — baškirami, čukčami, čačencami, komi-piermiakami ci jašče kim? :)
Naŭrad ci mierapryjemstvy orhanaŭ u takich vypadkach, jak voś hetaja "Aperacyja "Śvisłač", kaardynujucca z samaha vierchu. Ale arhanizatary presinhu peŭna adčuvajuć, što dziejničajuć u rečyščy hieneralnaj linii. I što za pierabor nichto ich nie papraknie.
Hieneralnaja ž linija palahaje ŭ tym, što apanentam ułady nielha davać uźniać hałavu ni pad jakaj markaj. Heta — zvyšzadača. Nu a dziaržavu j nacyju choćki-niachoćki buduć lapić pavodle surahatnaha prajektu. Biez ułučeńnia nacyjanalna śviadomych siłaŭ i biez zvarotu da poŭnafarmatnych varyjantaŭ ajčynnaj historyi dy kultury.
Naviersie nutrom adčuvajuć, što ŭ hetych farmatach jany nie hulcy. Adukavacca pozna, dyj na čorta? Miarkujecca, što "zabiełarusam" ź liškam chopić chakiejnaha zaŭziatarstva pad čyrvona-zialonym ściaham, "Linii Stalina" i "Dažynak".
Kamientary