Jak skłalisia losy fihurantaŭ spravy Mikałaja Aŭtuchoviča?

U spravie Mikałaja Aŭtuchoviča, jaki musić vyjści na volu 8 krasavika, fihuravali jašče 3 čałavieki ŭ jakaści asudžanych, a taksama niekalki viadomych asobaŭ u jakaści paciarpiełych. Jak skłalisia ich losy?

6 traŭnia 2010 hodu, amal 4 hady tamu, u Viarchoŭnym sudzie Respubliki Biełaruś byŭ ahučany prysud viadomamu pradprymalniku z Vaŭkavysku, byłomu kandydatu ŭ deputaty Nacyjanalnaha schoduMikałaju Aŭtuchoviču. Jaho abvinavačvali ŭ padrychtoŭcy ŭ 2005 hodzie teraktu suproć tahačasnaha staršyni Haradzienskaha abłvykankamu Ŭładzimiera Saŭčanki dy ŭ inšych złačynstvach, siarod jakich sud znajšoŭ paćvierdžańnie tolki adnaho — što pradprymalnik niezakonna zachoŭvaŭ bajavyja patrony. Za heta Aŭtuchoviču dali 5 hadoŭ źniavoleńnia, a jašče 2 miesiacy dadali, bo mienavita 2 miesiacy pradprymalnik niedasiadzieŭ, kali jaho vyzvalili paśla pieršaha prysudu, za niaspłatu padatkaŭ. Razam ź Mikałajem Aŭtuchovičam na łavie padsudnych u Viarchoŭnym sudzie apynulisia jahony były kiroŭca i pamočnik Alaksandar Łaryn, supracoŭnik jahonaj firmy Ŭładzimier Asipienka i były milicyjant Michaił Kazłoŭ. U spravie fihuravali ŭ jakaści paciarpiełych viadomyja čynoŭniki: były kiraŭnik Haradzienščyny Ŭładzimier Saŭčanka i dziejny namieśnik ministra padatkaŭ i zboraŭ Vasil Kamienka. Jak skłalisia losy hetych ludziej za 4 hady, što minuli ad pracesu?

U listapadzie 2010 hodu były vajskoviec z Vaŭkavysku Ŭładzimier Asipienka vyjšaŭ z-za krataŭ na volu. Z troch hadoŭ, jakija sud pryznačyŭ za pasobnictva ŭ ździajśnieńni złačynstva, jon adbyŭ u kalonii mienš za hod, ale z ulikam siadzieńnia ŭ śledčym izalatary ź lutaha 2009 hodu, atrymałasia jakraz dźvie traciny terminu. Zaraz Uładzimier Asipienka žyvie ŭ Vaŭkavysku, na pensii. Zajmajecca, jak sam kaža, siamiejnymi spravami.

Pavialičyć

«U mianie maci chvareła, ja jaje pachavaŭ u kancy minułaha hodu. Zbolšaha liču, što ja da hetaha spryčyniŭsia, što maci syšła z žyćcia raniej i hetak chutka, bo ŭsia hetaja historyja z aryštam…»

Taksama try hady, pavodle prysudu, atrymaŭ asabisty kiroŭca Mikałaja Aŭtuchoviča, žychar Vaŭkavysku Alaksandar Łaryn, pra jakoha na pracesie stała viadoma, što jon užyvaŭ narkotyki. Heta Alaksandar Łaryn daŭ pakazańni ŭ sudzie, što nibyta jon z hranatamiota musiŭ stralać pa kvatery Ŭładzimiera Saŭčanki na zamovu Mikałaja Aŭtuchoviča. Abvinavačańnie ŭ padrychtoŭcy zamachu Aŭtuchovič kateharyčna abvierh, a pakazańni svajho kiroŭcy nazvaŭ chłuśnioj na zamovu specsłužbaŭ. Uładzimier Asipienka taksama ličyć, što rola Łaryna ŭ hetaj historyi — pravakacyjnaja. 

«Ja schilajusia da taho, što jaho ŭžo zasłali da Aŭtuchoviča z peŭnaj metaj. Chacia, mahčyma, zaverbavali i paśla jahonaha pracaŭładkavańnia da Aŭtuchoviča. U taho pałova ludziej vakoł byli zaverbavanyja, kali jon vyrašyŭ pajści ŭ deputaty».

Pavodle Uładzimiera Asipienki, Alaksandar Łaryn vyzvaliŭsia prykładna praz hod paśla jaho. Zaraz pracuje ŭ Vaŭkavysku, na stancyi absłuhoŭvańnia aŭtamabilaŭ. «Va ŭsiakim razie, jašče paŭhodu tamu pracavaŭ», — dadaje spadar Asipienka.

Były milicyjant Michaił Kazłoŭ atrymaŭ 2 hady źniavoleńnia za nievykanańnie słužbovych abaviazkaŭ. Pavodle śledztva, Kazłoŭ viedaŭ pra padrychtoŭku Aŭtuchovičam zamachu na «hubernatara» Saŭčanku, ale nie spyniŭ jahonych dziejańniaŭ. I chacia sam zamach nia byŭ dakazany, Michaiła Kazłova adpravili adbyvać pakarańnie ŭ kaloniju «Vićba», ale ŭžo ŭ žniŭni 2010 hodu vyzvalili pavodle amnistyi. Zaraz Michaił Kazłoŭ pracuje ŭ Harodni ŭ budaŭničaj firmie, ale jon nia staŭ udakładniać, u jakoj, i ad interviju admoviŭsia.

A što viadoma pra Ŭładzimiera Saŭčanku, jaki na čas pracesu ŭžo nia byŭ haradzienskim «hubernataram»? Čutki tady i paśla pracesu pra Saŭčanku chadzili samyja nievierahodnyja. Što nibyta jon byŭ pad śledztvam, što źbiraŭsia ŭciačy z krainy, ale byŭ zatrymany. Tak heta ci nie, paćvierdžańnia nie znajšłosia. Viadoma, što Saŭčanka doŭha nie źjaŭlaŭsia ŭ sud na praces nad Aŭtuchovičam, dzie musiŭ davać pakazańni jak paciarpieły, ale 1 krasavika ŭ sudzie ŭsio ž vystupiŭ. Siońnia ja znajšoŭ Uładzimiera Jahoraviča Saŭčanku praz mabilny telefon — jon pracuje hieneralnym dyrektaram ahrakambinata «Mačuliščy». Ale daviedaŭšysia, što jamu zvonić karespandent «Svabody», spadar Saŭčanka spasłaŭsia na zaniataść:

«Ja zaraz zaniaty. Zvanicie potym…»

Pavialičyć

Paźniejšyja zvanki da Ŭładzimiera Saŭčanki, adnak, zastalisia biez adkazu.

Zatoje nia staŭ uchilacca ad razmovy z žurnalistam namieśnik ministra padatkaŭ i zboraŭ Vasil Kamienka, jaki taksama fihuravaŭ u spravie Aŭtuchoviča jak paciarpieły. Pavodle kiroŭcy Alaksandra Łaryna, jon na zahad Aŭtuchoviča nibyta sačyŭ za namieśnikam ministra, jakoha padazravaŭ u karupcyi. Spadar Kamienka nia staŭ kamentavać prysud Aŭtuchoviču i jahonyja abvinavačvańni na svoj adras.

«Mnie nie vypadaje kamentavać prysud Aŭtuchoviču. Nakolki viedaju, ź im pahadziłasia i abarona Aŭtuchoviča, ci mnie niešta nieviadoma? A nakont vyzvaleńnia, što ja mahu skazać? Dziakuj Bohu, što čałaviek adbyŭ toje pakarańnie, jakoje jamu dziaržava vyznačyła. Chacieŭ by jamu pažadać, kab u jaho ŭsio składvałasia dobra ŭ žyćci.»

Były advakat Pavał Sapiełka ŭdakładniŭ, što prysud Mikałaju Aŭtuchoviču ŭstupiŭ u siłu adrazu paśla ahałošvańnia, pakolki byŭ vyniesieny sudom apošniaj instancyi — Viarchoŭnym. «Prysud my abskardzili ŭ paradku nahladu, jak patrabuje zakon, ale jaho pakinuli biaź źmienaŭ», — skazaŭ Pavał Sapiełka.

Mikałaj Aŭtuchovič da apošniaha nie pryznavaŭ siabie vinavatym, u tym liku z hetaj pryčyny admaŭlaŭsia pisać prašeńnie ab pamiłavańni na imia Alaksandra Łukašenki.

• 0
• 0
• 0
• 0
• 0
• 0
• 0
• 0