27 krasavika — hurt BosaeSonca prezientuje novy albom z strunnym trya

27 krasavika hurt BosaeSonca zajhraje vialiki kancert z prahramaj «Adpuści».

Uładalniki pryza «Najlepšy biełaruskamoŭny albom» na ŭznaharodach Experty.by rychtujuć da jaho admysłovyja cikavostki.

BosaeSonca składana nazvać navičkami – jany daŭno razam i ŭžo kala piaci hadoŭ chadzili ŭ «nadziejach biełaruskaj rok-sceny». Składali pieśni, hrali kancerty, vydavali sinhły, časam źjaŭlalisia na telebačańni, ale nijak nie mahli zapisać debiutny albom. A za 2013 hod vydali adrazu dva, pryčym całkam roznych. Spačatku depresiŭna-rokavy «Załaty», a potym liryčna-akustyčny «Adpuści».

I kali pieršy na pačatku hoda prajšoŭ amal nie zaŭvažanym, to vydadzieny ŭvosień «Adpuści» staŭsia amal sensacyjaj u kołach žurnalistaŭ i amataraŭ biełaruskaj muzyki. «Pradukt vysokaj jakaści, jaki śmieła možna pastavić pobač sa znakamitymi kamandami suśvietnaha ŭzroŭniu», – adznačyŭ u svajoj recenzii aŭtar i viadučy lehiendarnaj teleprahramy «Vidźmo-nievidźmo» Siarhiej Filimonaŭ i paraŭnaŭ BosaeSonca z brytancami Turin Brakes.

– Albom «Adpuści» my zapisvali, jak raźvitalnaje pasłańnie hurtu BosaeSonca. My całkam surjozna źbiralisia začyniać prajekt, tamu što vielmi šmat enerhii było ŭkładziena ŭ «Załaty», ale heta anijak nie apraŭdała siabie. Tym bolš niečakanym byŭ škvał uchvaleńniaŭ adnosna druhoha alboma. Možna skazać, što heta vyratavała hurt i dało moc iści dalej, – raspavioŭ vakalist kalektyvu Aleś Kot-Zajcaŭ.

Bolš za toje, u lutym dysk pieramoh na ŭznaharodach Experty.by u naminacyi «Lepšy biełaruskamoŭny albom» i atrymaŭ pryz ad hramadskaj kulturnaj kampanii «Budźma biełarusami!» – rekłamna-infarmacyjnuju padtrymku kancerta. Hetkim čynam vystup budzie ŭdvaja adkaznym – heta spravazdača za ŭznaharodu i sproba namalavać novuju budučyniu dla hurtu.

– Dla nas zaŭždy važna stvaryć na kancercie adpaviednuju atmaśfieru. Heta budzie vystup sa strunnym trya z akcentam na lohkaje paŭakustyčnaje hučańnie alboma «Adpuści». Abiacajem usie lepšyja pieśni i i niekalki novych, – adznačyŭ Aleś Kot-Zajcaŭ.

Kancert projdzie ŭ kłubie Tarantino (Kastryčnickaja, 5, (advarotny bok KZ «Minsk»)). Pačatak u 19.00. Kvitki: tancpoł – 70 tys. (tolki 30 asobnikaŭ u kłubie Tarantino), 80 tys. (papiarednie ŭ kasach Kvitki.by), 100 tys. u dzień kancerta; stoliki – 120 tys. (u kłubie). Daviedka: 377 80 00 (Velcom, MTS). Sustreča na Facebook i Vkontakte.

• 0
• 0
• 0
• 0
• 0
• 0
• 0
• 0