«Usio toje, što adbyłosia va Ukrainie, adbyłosia šmat u čym pa vinie našych jeŭrapiejskich partnioraŭ» — takoje mierkavańnie vykazaŭ ministr zamiežnych spraŭ Biełarusi Uładzimir Makiej u intervju češskaj haziecie «Lidovie naviny». Tekst intervju publikuje sajt biełaruskaha MZS.
«Ja prysutničaŭ na samicie Uschodniaha partniorstva ŭ listapadzie minułaha hoda ŭ Vilniusie i byŭ śviedkam taho, jak byłoha prezidenta Ukrainy Janukoviča krytykavali za toje, što jon kidajecca pamiž Uschodam i Zachadam, — skazaŭ Makiej. — Niekatoryja kiraŭniki dziaržaŭ — členaŭ Jeŭrasajuza skazali jamu: «Tak, my padtrymku harantujem, ale dapamohi ad nas nie čakajcie». Što pavinien byŭ zrabić Janukovič u tych umovach, kali ekanomika — i tady, i ciapier — znachodzicca na hrani krachu? Kaniešnie ž, jon źviarnuŭsia pa dapamohu da Rasii. Paśla hetaha Jeŭrasajuz adumaŭsia i pačaŭ terminova prapanoŭvać niejkija miery padtrymki, paralelna padahravajučy nastroi ludziej, jakija vyjšli na vulicy i pratestavali suprać ułady».
Pavodle słoŭ Makieja, abiacańni, dadzienyja Janukoviču da samitu ŭ Vilni, byli nieadkładna realizavanyja pradstaŭnikami ES «paśla taho, jak jany ŭbačyli, što situacyja raźvivajecca ŭ niespryjalnym kirunku».
«I, pavodle słoŭ ciapierašniaha premjer-ministra Jacaniuka, źbirajucca vydzielić ledź nie 15 miljardaŭ dołaraŭ dapamohi z boku Jeŭrapiejskaha sajuza Ukrainie», — adznačyŭ kiraŭnik biełaruskaha MZS.
Jon padkreśliŭ, što ZŠA taksama vydzialajuć Ukrainie vielizarnuju dapamohu i Mižnarodny valutny fond «raptam niečakana tvaram paviarnuŭsia da Ukrainy, pačaŭ vieści razmovu». «Uźnikaje zakanamiernaje pytańnie: dzie vy byli raniej? Moža być, i nie adbyłosia b taho, što adbyłosia va Ukrainie? Pytańnie rytaryčnaje», — ličyć Makiej.
Ministr adznačyŭ, što Ukraina — bolš mahutnaja dziaržava ŭ paraŭnańni ź Biełaruśsiu.
«Ukrainie ŭ hetym płanie šmat daravałasia ŭ paraŭnańni ź Biełaruśsiu. Našy jeŭrapiejskija partniory na takija ž parušeńni va Ukrainie nie źviartali ŭvahi», — skazaŭ jon.
Na dumku Makieja, dla taho kab zrazumieć pryčyny padziej va Ukrainie, nieabchodna pahladzieć na pieradhistryju. «Nie treba było pieršapačatkova stavić pytańnie takim čynam: vy abo ź Jeŭropaj, abo z Rasijaj. A heta ž było. I ŭ ramkach taho ž Uschodniaha partniorstva. Inicyjatyva sama pa sabie cikavaja, dobraja, i my taksama hatovy ŭdzielničać u hetaj inicyjatyvie, tamu my razhladajem jaje jak instrumient narmalizacyi našych adnosinaŭ ź Jeŭropaj. Ale ja nie chaču skazać, što my, u adroźnieńnie ad niekatorych inšych krain, jak, naprykład, Małdova, Hruzija, hatovy siońnia ŭvajści ŭ Jeŭrapiejski sajuz. My ličym, što ŭ ramkach hetaj inicyjatyvy pavinny być dyfierencyravanyja padychody, dyfierencyravanaje staŭleńnie da krain — udzielnic hetaha partniorstva», — skazaŭ jon.
Ministr adznačyŭ, što dla pačatku nieabchodna ŭbačyć, što saboj ujaŭlaje Jeŭrapiejski sajuz, u čym jaho pryciahalnaść dla ludziej.
«Jeŭrasajuz ličyć, što siońnia ŭsie pavinny i hatovy biehčy ŭ hetuju arhanizacyju, nu, a jany ŭ Jeŭrasajuzie buduć vybirać, jak i z kim vybudoŭvać niejkija adnosiny. Ale my nie budziem pakul biehčy, tamu što my bačym, što ŭ Jeŭrasajuzie svaich prablem chapaje. Daj boh jamu razabracca z hetymi prablemami. Kali b my bačyli, što heta sapraŭdy źjaŭlajecca pryciahalnaj dla nas idejaj, to, moža być, my i pabiehli, ale vielmi dobra ŭzvažyŭšy ŭsie za i suprać i praličyŭšy ŭsie nastupstvy, — adznačyŭ Makiej.
Pavodle jaho słoŭ, Biełaruś vystupaje za narmalizacyju situacyi va Ukrainie i naładžvańnie ŭ krainie ŭnutrypalityčnaha i źniešniepalityčnaha dyjałohu. «Uvachodžańnie Ukrainy ŭ NATA, kali heta adbudziecca, kaniešnie ž, dla nas absalutna nieprymalnaje. Heta paciahnie za saboj jašče bolšyja niehatyŭnyja nastupstvy. My zychodzim z hetaha. Što da vybaru Ukrainy pamiž Jeŭrapiejskim sajuzam abo Mytnym sajuzam, budučym Jeŭrazijskim ekanamičnym sajuzam, to heta suvierennaje prava hetaj dziaržavy», — adznačyŭ ministr.
Pry hetym jon padkreśliŭ, što Biełaruś vitała b, kali b Ukraina ŭvajšła ŭ Mytny sajuz. Pavodle słoŭ Makieja, šerah dziaržaŭ užo zajavili ab svajoj hatoŭnaści ŭvajści ŭ MS i Adzinuju ekanamičnuju prastoru i ich zajaŭki ciapier razhladajucca.
U Łahojsku piekar admaŭlajecca pradavać svoj chleb pakupnikam, u jakich jość sabaki82
Kamientary