Pietycyja z patrabavańniem unieści Rasiju ŭ śpis dziaržaŭ-pamahatych teraryzmu, raźmieščanaja 23 krasavika na sajcie Biełaha doma, u aŭtorak, 20 maja, nabrała bolš za 100 tysiač podpisaŭ.
Ciapier, zhodna z praviłami sajta, ułady ZŠA buduć abaviazanyja na jaje adreahavać. Na praktycy Bieły dom čaściakom uchilajecca ad adkazu na mnohija zvaroty, tłumačačy heta tym, što ich tema nie ŭvachodzić u jaho kampietencyju.
Pa śćviardžeńni aŭtaraŭ pietycyi, Rasija viadzie suprać Ukrainy «nieabvieščanuju vajnu»: rasijskija apieratyŭniki, maskirujučysia pad miascovych žycharoŭ, šlacham zapałochvańnia i prymusu sprabujuć paŭpłyvać na palityku Ukrainy. Zachopy administracyjnych budynkaŭ, vykradańni i zabojstvy ludziej, na dumku aŭtaraŭ dakumienta, taksama adbyvajucca pa vinie rasijskaha boku. U suviazi z hetym jany zaklikajuć ŭnieści Rasiju ŭ śpis krain, jakija paturajuć mižnarodnamu teraryzmu.
Na dadzieny momant u śpis krain-sponsaraŭ teraryzmu Dziarždepa ZŠA ŭvachodziać Iran, Siryja, Kuba i Sudan. U dačynieńni da hetych dziaržaŭ dziejničajuć amierykanskija sankcyi: zabarona na pastaŭki zbroi, šerah finansavych abmiežavańniaŭ.
Kamientary