Paspalitaje rušeńnie na rovarach: u Minsku projdzie pieršaja biełaruskamoŭnaja haradskaja hulnia
Nieŭzabavie ŭ Minsku projdzie pieršaja całkam biełaruskamoŭnaja haradskaja hulnia «Schvatka» pad nazvaj «Słava Voršy ŭžo nie horša». «NN» pahutaryła z arhanizataram hulni Jarasłavam Lichačeŭskim.
«NN»: Jarasłaŭ, što takoje «Schvatka» i jak u jaje hulajuć?
Jarasłaŭ Lichačeŭski: «Schvatka» — heta aktyŭnaja haradskaja hulnia. Ludzi prydumlajuć scenar, zadańni, a potym źbirajucca pa vychodnych i hulajuć. Kłasičnaja «Schvatka» pačynałasia ź simbijozu virtualnaj i realnaj prastory. Kamanda atrymlivaje zadańnie ŭ internecie i pavinna vykanać jaho na prastory horada. Kamandy pierachodziać ad zadańnia da zadańnia, a chto chutčej vykanaje ŭsie — pieramahaje.
Niadaŭna byŭ stvorany novy farmat hulni — rovarny.
Reč u tym, što u «Schvatku» ŭ Biełarusi hulajuć bolš za 10 hadoŭ. Kłasičnaja Schvatka — hulnia aŭtamabilnaja i načnaja. Prybraŭšy nieabchodnaść u aŭtamabili my tym samym pavialičyli rolu spartyŭnaha składnika. Ciapier mnoha zaležyć ad mocy i tryvałaści ŭdzielnikaŭ. Taksama čas hulni źmianiŭsia i jana prachodzić udzień dziela biaśpieki ŭdzielnikaŭ.
Isnuje i jašče adzin važny momant. U «Schvatku» mnohija hulajuć hadami, isnujuć stałyja kamandy. Voś ja, naprykład, ci to 7, ci to 8 hadoŭ biaru ŭdzieł u minskich hulniach. Kab zachavać cikavaść ludziej da hulni, jaje davodzicca pastajanna ŭskładniać. I kali prychodzić novy čałaviek, jon nie zaŭsiody moža razabracca i ŭciahnucca.
Viełasipiednaja «Schvatka» — novaja padzieja, tamu my robim hulni dosyć prostymi, dynamičnymi, dastupnymi dla šyrokaha koła ŭdzielnikaŭ. Ciapier prachodzić rovarny čempijanat, u ramkach jakoha ŭžo adbyłasia adna hulnia. Na čarzie hulnia pad nazvaj «Słava Voršy ŭžo nia horša». Jana projdzie ŭ subotu 28 červienia.
«NN»: Słava Voršy ŭžo nja horša» pazicyjanujecca jak pieršaja biełaruskamoŭnaja hulnia. Niaŭžo da hetaha biełaruskaj movy ŭ hulniach nie było?
JAŁ: U nas byli hulni, dzie častka zadańniaŭ było pa-biełarusku. Ale całkam biełaruskamoŭnaja hulnia nie ładziłasia nikoli. Ja nie viedaju, ci ŭdasca mnie ŭvieści biełaruskamoŭnyja hulni ŭ zvyčku. Ale tematyka hulni — Bitva pad Oršaj, i ja paličyŭ, što nie maju prava vykarystoŭvać rasijskuju movu dla jaje.
U hulni «Słava Voršy ŭžo nia horša» ŭsie zadańni, usie ahienty — našy ludzi, ź jakimi buduć kantaktavać udzielniki dla prachodžańnia kvestaŭ — buduć razmaŭlać pa-biełarusku.
Naturalna, ja dumaŭ, jak zaachvocić udzielnikaŭ razmaŭlać pa-biełarusku. Dumaju, nie vydam vialikaha sakretu, kali skažu što da bolšaści ahientaŭ hulni treba budzie źviartacca pa-biełarusku. Da kahości i na inšych movach, ale ŭmoŭny vorah u našaj hulni — Maskoŭskaje kniastva, tamu na čas «Schvatki» rasijskaja mova budzie nie ŭ pašanie.
Pavodle scenara kožny kapitan kamandy, lićvinski šlachcič XVI stahodździa, atrymlivaje list ad vialikaha hietmana Kanstancina Astrožskaha, što na našyja ziemli napała maskoŭskaje vojska i zachapiła Smalensk, Dubroŭnu, Kryčaŭ i Mścisłaŭl. Tamu treba chutka sabrać paspalitaje rušeńnie i vystupić nasustrač.
U pryznačany čas kamandy źbirajucca ŭ peŭnym miescy i rušać da bitvy. Na šlachu im daviadziecca vykanać zadańni ź jakimi, na naš pohlad, prychodziłasia sutykacca šlachcičam tych časoŭ.
Usio zakančvajecca samoj bitvaj, paśla jakoj adbudziecca pir sa staražytnymi biełaruskimi stravami i vinšavańnie pieramožcaŭ.
«NN»: Što treba, kab paŭdzielničać u hulni?
JAŁ: Treba kamanda z troch čałaviek na viełasipiedach. Try čałavieki — heta i maksimum, i aptymalnaja kolkaść hulcoŭ. Možna, viadoma, hulać i adnamu ci ŭdvaich, ale takoj kamandzie budzie ciažkavata. U adroźnieńni ad kłasičnaj «Schvatki», kamandzie nie patrabujecca štab, jaki kaardynuje hulcoŭ.
Taksama spatrebicca telefon z vychadam u internet, bo asnoŭnaja kamunikacyja adbyvajecca ŭ internecie. Hulnia možna prachodzić niekalki hadzin, tamu varta pakłapacicca pra zapasny akumulatar.Nie lišnim budzie lichtaryk i natatnik z asadkaj.
Da ŭdziełu ŭ hulni dapuskajucca tolki asoby, što dasiahnuli paŭnaletniaha ŭzrostu.
Taksama kožnaja kamanda musić spłacić uvachodny ŭniosak. Pavodle rehłamientu viełasipiednaha čempijanatu «Schvatki», heta 30 dalaraŭ z kamandy. Usie hrošy iduć na arhanizacyjnyja vydatki i na ježu i pitvo dla pira.
My namahajemsia rabić uźniosak jak maha mienšym, i kali na hulniu zarehistrujucca mnoha kamand, buduć źnižki.
Kab padać zajaŭku na ŭdzieł, treba zarehistravacca na sajcie hulni. Tam ža možna znajści kantakty arhanizataraŭ i źviazacca ź imi.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal1
Kamientary