Bialacki nie vinavacić Polšču i Litvu za pieradaču źviestak biełaruskim uładam
Pravaabaronca Aleś Bialacki nie vinavacić Polšču i Litvu za pieradaču biełaruskim uładam źviestak, jakija stali pryčynaj dla jaho kryminalnaha pieraśledu.
«Da hetaha mieli dačynieńnie asobnyja čynoŭniki Litvy i Polščy, a nie ŭłady hetych krain. Ułady ž jakraz paśladoŭna padtrymlivajuć demakratyčnyja pieramieny ŭ Biełarusi. Ja vielmi spadziajusia, što ŭsie ŭ hetaj situacyi zrabili patrebnyja vysnovy», — skazaŭ były palitviazień, jaki vyjšaŭ na volu pa amnistyi ŭ minułuju subotu, padčas anłajn-kanfierencyi na sajcie internet-haziety Naviny.by 25 červienia.
Pryčynaj svajho aryštu Bialacki nazvaŭ «palityčny raźlik». «I pryčynaj vyzvaleńnia staŭ taksama peŭny palityčny raźlik. Pierš za ŭsio režym zaraz dumaje ab narmalizacyi adnosin ź Jeŭrapiejskim sajuzam, jaki jakraz i nastojvaje na vyzvaleńni ŭsich palityčnych źniavolenych u Biełarusi», — skazaŭ pravaabaronca, nahadaŭšy, što ŭ krainie «zastajucca jašče siem palitviaźniaŭ». «Ni nam, ni biełaruskim uładam, ni Jeŭrasajuzu, ni mižnarodnaj supolnaści nielha zabyvać pra heta ni ŭ jakim vypadku», — padkreśliŭ Bialacki.
Na pytańnie, čamu ŭ 2011 hodzie jon nie zastaŭsia za miažoj, kali ŭžo było viadoma ab jaho mahčymym aryšcie ŭ Biełarusi, Bialacki adkazaŭ: «Za miažoj ja nie znachodziŭsia, ale ŭ toj pieryjad, sapraŭdy, ja niekalki razoŭ vyjazdžaŭ ź Biełarusi na karotki čas dla vykładańnia ŭ vilniuskim Domie pravoŭ čałavieka. Ułady i chacieli, kab ja zastaŭsia za miažoj, heta była b cudoŭnaja mahčymaść dla kampramietacyi mianie jak pravaabaronca i jak čałavieka. Tamu ja pryniaŭ rašeńnie adstojvać svaju nievinavataść tut, u Biełarusi».
Pravaabaronca nahadaŭ, što nie pryznaŭ svaju vinu ŭ sudzie, nie pisaŭ nijakich prośbaŭ ab pamiłavańni i praciahvaje ličyć siabie nievinavatym. «Takija ž srodki nacisku na pravaabaroncaŭ za nibyta niaŭpłatu padatkaŭ prymianiajuć i inšyja aŭtarytarnyja režymy, u pryvatnaści, za heta maje kalehi ŭ Azierbajdžanie i Iranie siadziać u turmie», — zaznačyŭ Aleś Bialacki.
«Biełaruś ciabie lubić». Repartaž z raźvitańnia ź Mikitam Miełkazioravym8
Kamientary