Zorki sportu zładziać turnir na biełaruskaj movie

Arhanizatary prajektu chočuć, kab u hety dzień usie ŭdzielniki razmaŭlali pa-biełarusku i zajmalisia sportam.

Ideja pravieści spartyŭnaje śviata z nacyjanalnym kałarytam naležyć žurnalistu Siarhieju Ščurko i alimpijskaj čempijoncy Alaksandry Hierasimieni.

- My navažyli arhanizavać spabornictvy, usie ŭdzielniki jakoha chacia b niekalki hadzin buduć razmaŭlać pa-biełarusku, — raspavioŭ Siarhiej Ščurko. — U našych fiederacyj jość prablemy pijaru, pryciahnieńnia dziaciej u siekcyi. A ŭ hety dzień u adnym miescy buduć padadzienyja 15 vidaŭ sportu. Siemji zmohuć uziać udzieł u spabornictvach, vybrać dla dziciaci vid sportu, jaki jamu padabajecca.

Prajekt abiacaje być cikavym, nie sumniavajecca jon.

- Miarkujučy z dośviedu papiarednich mierapryjemstvaŭ, jakija my arhanizoŭvali - Kubak vykliku, adbyŭsia na Dzień niezaležnaści, u biełarusach vyjaŭlajecca pačućcio kamandy. Kali ty biažyš nie sam sabie, a za kamandu, viedaješ, što na finišy ciabie čakajuć, ty pačynaješ, umoŭna kažučy, «pamirać». Nacyjanalnaja rysa biełarusaŭ - upartaść - uklučajecca ŭ poŭnaj miery, - kaža jon.

Spartovaje śviata «Mova Cup» płanujecca pravieści na bazie Respublikanskaha centra Alimpijskaj padrychtoŭki ŭ lohkaj atletycy.

Na dumku Siarhieja Ščurko, samym lepšym vynikam prajekta budzie dobry nastroj ludziej, jakija voźmuć udzieł u śviacie. Jon zhadvaje, jak adnojčy na naradzie arhanizacyi adnaho z prabiehaŭ, u jakim udzielničali zorki biełaruskaha sportu i šoŭ-biznesu, pačuŭ ad arhanizataraŭ: «U nas budzie 5 tysiač čałaviek».

- Ja dumaju: «Ni fiha sabie! Jakija małajcy! Adkul jany viedajuć, kolki pryjdzie?». A potym ja ŭbačyŭ, jak da miesca praviadzieńnia spabornictvaŭ padjazdžali aŭtobusy, adkul vychodzili dzieci, jakija biehli, a potym ich vieźli. Mabyć, udzielničali pavodle śpisaŭ. I ad hetaha niama takoha adčuvańnia śviata, jakoha ty čakaješ. Sapraŭdnaje spartyŭnaje śviata ja bačyŭ u Ryzie. Ludzi išli tudy ŭ dobrym humory - siemjami, z kalaskami, z babulami-dziadulami, - kaža jon.

Siarhiej Ščurko vieryć, što praviadzieńnie takich spartyŭnych śviataŭ, jak «Mova Cup», dapamoža nam uśviadomić siabie biełarusami i pačać havaryć na biełaruskaj movie.

- Ja baču, što ŭ šmatlikich viadomych spartsmienaŭ źjaviłasia žadańnie razmaŭlać pa-biełarusku. U Sašy Hierasimieni, Aliny Tałaj, Vitalika Radzivonava, Arcioma Radźkova, - dadaŭ jon.

• 0
• 0
• 0
• 0
• 0
• 0
• 0
• 0