Chakiejny kłub «Dynama-Minsk» pravioŭ «žanočy matč» z padarunkami — i davieŭ zaŭziatarak da šalenstva
Padarunki, jakija abiacali ŭsim zaŭziatarkam u ružovym, skončylisia za 20 chvilin. A limitavanyja ružovyja chudzi vykupiła kampanija-partnior dla svaich supracoŭnic — realnyja fanatki ich nie atrymali.
Chakiejny kłub «Dynama-Minsk» vyrašyŭ zrabić siurpryz dla zaŭziatarak da Mižnarodnaha žanočaha dnia. U telehram-kanale kłuba paviedamili, što kožnaja, chto pryjdzie na matč 5 sakavika ŭ ružovym, atrymaje padarunak ad «Dynama-Minsk» i ich partniora — biełaruskaha kaśmietyčnaha brendu Relouis.
Ale ž padarunkaŭ chapiła nie ŭsim. Ludzi skardziacca, što praviali ŭ čarzie šmat času i nie atrymali ničoha.
«Skazać, što arhanizatary razam sa sponsaram prabili dno — ničoha nie skazać. «Dynama-Minsk», u vas tam usio ŭ paradku? Nie paznaju vas zusim! Pryjechać da 18:20 ź dziaŭčynkaj-padletkam u ružovym, jakaja nienavidzić hety koler, uhavaryć jaje prapuścić treniroŭku, adstajać čarhu ŭ 10000 čałaviek — kab što? Kab ciabie razharnuli sa słovami «padarunki skončylisia», i heta ŭ naš žanočy dzień», — aburajucca.
«Što my dumajem z hetaj nahody? Abureńnie nakont praviadzieńnia hetaha mierapryjemstva! U 18:30 padarunkaŭ niama! Kryŭdna nie tamu, što pamada nie dastałasia, a za maleńkich dziaŭčynak, za ich ślozy — jany apranulisia ŭ ružovaje, a im kryčać: «padarunkaŭ NIAMA!!!». Hańba sponsaru Relouis i arhanizataram «Dynama». Kali vy pravodzicie takoje mierapryjemstva i abiacajecie padarunak kožnaj, chto pryjdzie ŭ ružovym, to budźcie łaskavy — vykonvajcie heta!»
«Dziakuj za padarunki, Relouis. Pakul dziaŭčaty ŭ ružovym stajali ŭ čarzie, padarunki atrymlivali chłopcy ŭ čornym! Abureńniu niama miežaŭ u tych sotniaŭ ludziej, jakija stajali ŭ čarzie!».
U kamientarach u instahramie chakiejnaha kłuba ŭspłyła navat miemnaja fraza «U paniadziełak dojdzie da Łukašenki!».
Byŭ i jašče adzin niepryjemny śviatočny siurpryz. Pierad matčam taksama rekłamavałasia, što ŭ fan-kramie kłuba budzie pradavacca limitavanaja sieryja — ružovyja chudzi i šapki z łahatypami «Dynama».
Achvotnych nabyć ich było vielmi šmat. Ale, śćviardžajuć u sacsietkach, ružovych chudzi akazałasia ŭsiaho niekalki dziasiatkaŭ i chapiła ich tolki dla sponsaraŭ — supracoŭnic Relouis.
Zaŭvažyli ludzi i toje, što ŭsie žančyny, kamu paščaściła atrymać tyja chudzi razładu, siadzieli na trybunie razam.
Dziŭnaje supadzieńnie? Nie. Łarysa Hrynievič, dyrektarka kampanii «Rełui bieł» apublikavała ŭ Threads fotazdymki, na jakich jana razam z supracoŭnicami kampanii paziruje na trybunie i ŭ kalidory ŭ tych samych ružovych śviatočnych chudzi.
Na kamientary pra rasčaravanych ludziej, jakija nie dačakalisia abiacanych usim žančynam u ružovym padarunkaŭ, dyrektarka adkazvaje: «Padarunki jašče padvozili, taki ažyjataž byŭ. Ale, jak vy razumiejecie, ničoha biaskoncaha nie byvaje. Kamanda markietołahaŭ «Dynama» vielmi vyratoŭvała kvietkami dla zaŭziatarak».
U sacsietkach niezadavoleny, što praz Relouis chudzi nie zmahli atrymać realnyja zaŭziatarki chakiejnaha kłubu:
«Vielmi razzłavała toje, što chudzi, za jakimi haniaješsia ŭvieś siezon, manitoryš fan-šop pierad kožnym chatnim matčam, laciš tudy adrazu paśla paviedamleńnia pra ich pastupleńnie da 8 sakavika — a tam usio, niečakana skončylisia. «Dynama», jak tak? Prychodziš na ružovy matč i bačyš bataljon Relouis u hetych samych chudzi! Na kaho vy aryjentujeciesia? Jany z vami razava, a my z vami hadami!
Kryŭdna! I kryŭdna, što za svaje ŭčynki nie ŭmiejecie adkazvać. Heta mužčynski kłub z pazicyi siły vydalaje žanočyja kamientary».
Nie pašancavała navat tym, chto apłaciŭ mierč zahadzia: «U mianie žonka ranicaj zamoviła, apłaciła, aformiła samavyvaz. Pryjechała — i ničoha niama. Hrošy pakul nie viarnuli, skazali, što, mahčyma, u paniadziełak raźbiarucca».
Tym časam, na «Kufary» ŭžo pačali pierapradavać ružovyja chudzi «Dynama-Minsk». Za adno chudzi prosiać 150 rubloŭ, za kamplekt (chudzi, majka, 2 šapki) — 400.
«Ukruci hłybiej»: sietka vinnych kram zrabiła rekłamu da 8 sakavika z seksualnym padtekstam
Minskaje «Dynama» nie zmahło ŭčora vylecieć u Sočy i zastałosia ŭ Nižnim Noŭharadzie z-za pahrozy bieśpiłotnikaŭ
Mierkavanaja pazašlubnaja dačka Łukašenki ŭładkavałasia na novuju pracu — jana źviazanaja z chakiejem
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny29
Kamientary