«Rośniefť» prosić va ŭrada bolš za $40 miljardaŭ z-za sankcyjaŭ, pahroza bankructva
Kampanija «Rośniefť» prosić pazyčyć joj z fondu nacyjanalnaha dabrabytu 1,5 tryljona rasijskich rubloŭ.
Prezydent «Rośniefti» Ihar Siečyn źviarnuŭsia va ŭrad z prośbaj ab finansavaj dapamozie, pišuć rasijskija «Viedomosti» sa spasyłkaj na «čałavieka z naftavaj haliny i čaćviarych fiederalnych čynoŭnikaŭ». Heta ž vynikaje ź lista ad 12 žniŭnia namieśnika ministra ekanamičnaha raźvićcia Aleha Famičova ŭ Minenierha. U liście Ministerstva ekanamičnaha raźvićcia pa daručeńni staršyni ŭrada Dźmitryja Miadźviedzieva analizuje prapanovy Siečyna.
Pradstaŭnik urada ad aficyjnych kamientaroŭ admoviŭsia, zapyt u Minekanamraźvićcia zastaŭsia biez adkazu. Pres-słužba «Rośniefti» kamientaroŭ pa sutnaści nie pradstaviła.
Siečyn prapanuje piać sposabaŭ padtrymki kampanii, vynikaje ź lista Famičova. Samy darahi dla dziaržavy — vykup za košt fondu nacyjanalnaha dabrabytu novych ablihacyj kampanii na 1,5 tryljona rubloŭ.
Nieabchodnaść takoj dapamohi Siečyn u liście tłumačyć uviedzienymi suprać kampanii sankcyjami ZŠA, raspaviadajuć surazmoŭcy vydańnia «Viedomosti».
19 lipienia Minfin ZŠA zabaraniŭ amierykanskim kampanijam, bankam i hramadzianam, a taksama ŭsim, chto viadzie apieracyi praz ZŠA, pradstaŭlać «Rośniefti», «Novatieku» «Hazprombanku» i «Vniešekonombanku» kredyty i pazyki bolš, čym na 90 dzion, a taksama akcyjaniernaje finansavańnie. Choć sankcyi, jakija abmiažoŭvajuć pryciahnieńnie doŭhaterminovaha finansavańnia, uviali tolki ZŠA, jeŭrapiejskija banki i investary de-fakta da ich dałučylisia, bo mnohija ź ich pracujuć na amierykanskim rynku i nie chočuć prablem z uładami ZŠA, tłumačyŭ supracoŭnik aparata ŭradu Rasii.
Čysty doŭh kampanii «Rośniefť» na kaniec červienia składaŭ jak raz 1,5 tryljona rubloŭ (kala $ 44,5 miljarda dalaraŭ).
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal7
Kamientary