Aktyvisty Ruchu «Za Svabodu» raspačynajuć «Karusiel pikietaŭ» suprać vajny va Ukrainie
Kampaniju «Karusiel pikietaŭ» raspačynajuć aktyvisty Ruchu «Za Svabodu» Arciom Lava i Aleś Marčanka. Jany prapanujuć kožny dzień padavać zajaŭki na pikiety kala ambasady Rasii z patrabavańniem spynić vajennyja dziejańni va Ukrainie.
Ideja «Karusieli pikietaŭ» u tym, kab ludzi kožny dzień padavali zajaŭki adzinočnyja pikiety la pasolstva, patłumačyŭ sajtu Pyx.by Aleś Marčanka. Zajaŭki na pieršyja pikiety 19 i 20 vieraśnia jon i siabra Rady Ruchu «Za Svabodu» Arciom Lava ŭžo padali, siońnia ŭ Minharvykankam źvierniecca jašče adzin aktyvist.
«Kali znojdziecca šmat žadajučych, i na kožny dzień pryznačać pikiety, to čynoŭniki Minharvykankama buduć abaviazanyja davać adkazy, prydumvajučy novyja tłumačeńni, bo ŭsim adnolkavyja admovy nie atrymajecca dać», — kaža Marčanka.
Pa słovach aktyvista, zajaŭki na adpaviednaść zakanadaŭčym normam byli pravieranyja jurystami-pravaabaroncami.
Chutčej za ŭsio, ličyć aktyvist Ruchu «Za Svabodu», «adkazy buduć admoŭnyja, ale niejkim čynam treba ž prymusić čynoŭnikaŭ vykonvać Kanstytucyju i zakony». Pa jahonych padlikach, na pieršyja zajaŭki adkazy pryjduć 14-15 vieraśnia.
Kab dałučycca da «Karusieli pikietaŭ» suprać vajny va Ukrainie achvočym treba mieć błank zajaŭki, jakija siońnia źjaviacca na siadzibie Partyi BNF (vuł. Čarnyšeŭskaha, 3 u Minsku), akramia taho, pa ich možna źviartacca da arhanizataraŭ akcyi ( +375 29 7518143 Arciom Lava). Arhanizatary prosiać aktyvistaŭ paznačać dzień, na jaki jany płanujuć padavać zajaŭku, a taksama kažuć, što hatovyja vysłuchać usie prapanovy ad mahčymych udzielnikaŭ.
Aleś Marčanka padkreśliŭ, što jon asabista praciahnie zmahacca za mahčymaść zakonna pratestavać suprać rasijskich dziejańniaŭ va Ŭkrainie. «Ja b chacieŭ kab vajna chutčej skončyłasia va Ŭkrainie i budu padavać zajaŭki, pakul jana nie skončycca», — zaklučyŭ aktyvist Ruchu «Za Svabodu».
Kamientary