Hurkoŭ pra Brutto: My zapišam kruty albom i pajedziem u Kitaj
Kali tabie 13, ty skačaš pierad lusterkam u majcy-baksiorcy z hitaraj, ujaŭlajučy siabie Kabejnam (a na druhim dziasiatku dvaccać pieršaha stahodździa jany ŭsio adno ŭjaŭlajuć siabie Kabejnami), ravieš pad pieśniu, jakuju nichto nia čuje praz tvaje navušniki, i vieryš, što ŭsio mahčyma.
Kali tabie 13, ty skačaš pierad lusterkam u majcy-baksiorcy, u jakoj adnolkava kruta vyhladajuć čempijony śvietu i rok-zorki, łoviš udary svajho adbitku i vieryš, što niepieramožny.
A paśla, jak usie, pastupaješ u BDEU, pracuješ specyjalistam i viadučym specyjalistam i zahadčykam adździełu ŭ AAT «Biełarusbank», adździaleńnie numar 293 drob 710.
Nasupierak tamu, što chłapiec z tvajho dvara, jaki vučyŭsia z taboj u adnoj škole, na paru hadoŭ maładziejšy ci starejšy, spraŭdziŭ usie chłapiečyja mary.
Vital Hurkoŭ, 29 hadoŭ, 10-razovy čempijon śvietu pa tajskim boksie, vakalist hurtu Brutto, rychtujecca da čempijanatu Eŭropy ŭ sutareńniach panelnaha domu na Vałhahradzkaj i čakaje vychadu novaha albomu.
Apytanka
Ja adzin z vakalistaŭ novaha hurtu Brutto
Raniej ja hraŭ u škole ŭ pank-hurcie na hitary. Taki stryt-pank my hrali. Potym ja byŭ vakalistam u chardkor-hrupie. Ja sprabavaŭ čytać rep. Uvieś čas niešta takoje muciŭ u muzycy. Apošniaje — ja hraŭ na bas-hitary ŭ chardkor-hurcie. Ale ŭsio heta było tak niesurjozna, bolš dla asałody.
Ci budu zajmacca muzykaj prafesijna? Zajmajusia ž.
Mnie padabajecca vielmi roznaja muzyka. Ciažka skazać. Anderhraŭnd, i pank-rok, chardkor i metał i chip-chop, i fank ja lublu, Bary Ŭajt — moj lubimy vykanaŭca. 50 Cent, Tupac lublu. I Onyx. Šmat čaho.
Atrymlivajecca i treniravacca, i muzykaj zajmacca. Pakul nie pieraškadžaje. Nie prablema.
My ź Michałkom siabrujem siem hadoŭ
My adzin pra adnaho viedali raniej, a bližej syšlisia, kali zajmalisia ŭ adnaho trenera pa boksie. Jon nas paznajomiŭ. Potym ja, kali byŭ «Kultpraśviet», upieršyniu źniaŭsia ŭ klipie dla «Lapisa Trubiackoha». Jeździŭ na kancerty. Siabravali, razmaŭlali, abmiarkoŭvali roznyja pytańni. Razmaŭlali pra muzyku. Abjadnała nas luboŭ da anderhraŭndu i luboŭ da sportu.
Jak zdymalisia klipy Brutto
U pieršym klipie była siabroŭskaja atmasfera. My davoli daŭno siabrujem. I heta nie było aktorstvam. Ciaham hetych zdymačnych dzion my pražyli cełaje žyćcio. Tam byli sapraŭdy i pajezdki na hetych pikapach, i bai, i treniroŭki, i siemji, pikniki, vohniščy, spabornictvy. My heta ŭmoŭna nazvali «źjezd Brutto». Tak my pravodzim čas, kali my razam.
A druhi klip — tematyčny. Jon pra baksiora. Takaja historyja. Nu što tam hrać — ja ž usio viedaju.
Ja nia dumaju, ci dazvolać nam vystupać u Biełarusi
My zapišam kruty albom i pajedziem u Kitaj. Heta naša meta. U Japoniju dyk peŭna pajedziem. Budziem my tut vystupać ci nie, ja nia viedaju.
A što Kitaj? Tam ža lubiać takich. Ja ž zorka tajskaha boksu. Heta narmalny pijar-chod. Ja baksiravaŭ z samymi topavymi tajcami i kitajcami. Tam mianie lubiać, viedajuć, pakazvali pa telebačańni. Mianie tam paznajuć na vulicach. Treba pieramovicca z peŭnymi ludźmi, i nam tam zrobiać proma.
Kali b ja nie zajmaŭsia boksam, my b ź Siarhiejem nie paznajomilisia. Heta značnaja častka žyćcia, jakaja nakłała adbitak na ŭsio.
Ja nia dumaju pra hrošy
Mnie ŭsio adno, kolki tam što budzie prynosić i ci budzie ŭvohule. Hałoŭnaje, što heta mnie padabajecca. Heta toje, čym ja zaŭždy chacieŭ zajmacca. Maja mara była — zrabić hurt, być u hurcie kštałtu takoha. Aproč taho, što heta hurt, bła-bła-bła, muzyka, — tam usie maje siabry. My adzin adnaho šmat času viedajem. Heta naša tusoŭka, skažam tak.
Mažor nia pojdzie ŭ tajski boks
Heta taki sport — «anderhraŭnd». Nu jaki mažor pojdzie zajmacca ŭ taki ciažki vid sportu? Zazvyčaj baćki, jakija zabiaśpiečanyja materyjalna, nie addajuć siudy svaich dziaciej. Navošta addavać ich u taki sport, u jakim bjuć u hałavu — tak užo prosta skažam. Treba niejki tenis, chakiej-šmakiej, niešta bolš hrašovaje, futboł toj ža.
A heta sport sapraŭdny, ciažki. Dla tych, chto choča zmahacca sa składanaściami pa žyćci, zmahacca sa svaimi słabaściami, ciažkaściami žyćcia, charaktaru. Heta sport bolš nabližany da vulicy, bolš chulihanisty.
Rana ci pozna kamuści treba dać u hałavu
Ludzi časam pavažlivaść i vietlivaść majuć za słabaść. Nichto ž nia dumaje, što ty, taki pavažlivy i vietlivy, možaš skivicu złamać kali-niebudź. Jość ža ludzi, jakija pa-inšamu nie razumiejuć.
Ja byŭ vielmi maleńki, vielmi chudy, i, jak zaŭždy byvaje ŭ škole, ździekavalisia ź mianie. Ja nia byŭ aŭtsajderam, ale časta za..lisia, i davodziłasia bicca. Ja stajaŭ na svaim, a paśla zrazumieŭ, što niakiepska było b navučycca, jak heta pravilna rabić. Bo jość chłopcy vyšejšyja, dužejšyja, bolšyja, ź imi taksama treba bicca. Tak i pajšoŭ. Zaciahnuła — i ŭsio.
Ja nia viedaju, što takoje sport pa-za palitykaj. Na kožnych spabornictvach jość padvodnyja ruchi, niejkaja palityka: hetych my prapuskajem, a hetych nie prapuskajem. Siońnia my voźmiem piać dopinh-probaŭ, a ź ich try ŭ biełarusaŭ. Paŭsiul jość palityka.
U Biełarusi ja na miescy
Tut maje siabry, maje baćki, tut ja naradziŭsia. Čamu mnie pavinna być tut niekamfortna? Tyja, chto choča źjechać, sprabavali źjaždžać? Ja sprabavaŭ. Ja byŭ šmat dzie. Apošnim razam byŭ u Amerycy. U Łas-Vehasie. U mianie jość šmatrazovaja viza ŭ Štaty. Dumaŭ pajechać u Ńju-Jork, tam šmat siabroŭ, ale paśla vyrašyŭ, što nia tak užo heta i cikava. Paŭhoda žyŭ u Aŭstralii. Niejki čas pažyć cikava, pahladzieć jak i što. Ale ŭjaŭleńnia, što heta «majo miesca», u mianie nie było. Zaŭždy było pačućcio, što nie na svaim.
U palitycy ja siabie nia baču
Palityka — heta sumna. Treba vyrašać niejkija pytańni, razmaŭlać ź ludźmi, ź jakimi nie chaciełasia b razmaŭlać, dyj bačyć by nie chaciełasia. Možna ž žyć cudoŭna i tak.
Vajna moža być
Pobač z nami vybuchi, usie hetyja padziei. Kaniečnie, ja adčuvaju, što heta moža kranuć i nas. Ci spravimsia? Nu, niešta budzie. Jany ž niejak spraŭlajucca. Heta ž žyćcio, niechta pamre, niechta nie pamre. Śmiełyja raniej pamruć. Bajaźlivyja, truślivyja — ich bolš zastaniecca. Heta evalucyja.
Ja čakaju čempijanatu Eŭropy
21 vieraśnia pajedu. Čakaju vychadu našaha alboma Brutto. Heta budzie samaja cudoŭnaja reč.
Ciapier čytajuć
Minharvykankam pra vuličnaje aśviatleńnie: Heta była razavaja akcyja. Siońnia ŭklučać a 18-j21
Kamientary