Jarmošyna: «Toje, što Statkievič siadzić, viedajuć usie hramadzianie Biełarusi»

Jeŭraradyjo: Vosieńskimi virusami i chvarobami spravakavanaje pytańnie: u vas było tak, kab dzień vybaraŭ ci da Łukašenki treba iści, a hałava raskołvajecca, hryp, hołasu niama, śpinu łomić?

Lidzija Jarmošyna: Ja takoha nie pamiataju. Ale mahu dakładna skazać, što ŭ dzień prezidenckich vybaraŭ u śniežni 2010 hoda ŭ kancy dnia ŭ mianie byli nievierahodnyja ličby cisku. I adčuvała ja siabie vielmi drenna.

I kali ja, što nazyvajecca, z pompaj pakidała studyju ŭ žyvym efiry, na samaj spravie ja była niezdarovym čałaviekam. Nie ŭ psichičnym płanie, a prosta adčuvała siabie niadobra. Tady adčuvałasia i ŭzbudžeńnie, i chvalavańnie, u toj dzień davodziłasia trymacca… Pa ščyraści, časam navat dumki źjaŭlalisia: «Boža, choć by da kanca dnia nie pamierci!» Albo kab «chutkaja» ciabie nie zabrała.

Takoje, na žal, byvaje, i najčaściej heta źviazanaje ź niervovym napružańniem. U nas jość fakty, kali my stračvali padčas vybaraŭ staršyń kamisij — jany pamirali prosta ad insultaŭ, infarktaŭ. Tamu ja całkam zhodnaja z tym, što ŭsie chvaroby — ad stresaŭ.

Jeŭraradyjo: Usie padumali, što vaš sychod «z pompaj» sa studyi, vašaja fraza pra boršč byli vyklikanyja pytańniami i praviednym hnievam na padziei taho dnia, a ciapier vyśviatlajecca, što va ŭsim vinavaty cisk!

Lidzija Jarmošyna: Cisk u peŭnaj stupieni pazbaŭlaŭ ciarplivaści, ale ŭsio heta było absalutna adekvatnym. Rašeńnie syści sa studyi było niachaj i spantannaje, ale całkam śviadomaje. Jak było: Dom uradu šturmujuć, a nam zadajuć pytańnie: «A nakolki heta demakratyčna?» Heta byŭ, na maju dumku, taki cynizm. Tut znachodzilisia kinutyja mnoj supracoŭniki kamisii, a ja jašče budu siadzieć i razvažać pra demakratyčnaść hetaha pracesu.

Jeŭraradyjo: Prosta cikava: chacia b pierad adnymi prezidenckimi vybarami u vas była niaŭpeŭnienaść u tym, što vaš kandydat projdzie?

Lidzija Jarmošyna: Nie, takoha nie było. Bo kandydat moj, što nazyvajecca, da takoj stupieni pa rejtynhu, niehałosnym i lubym, pieravyšaŭ rejtynh usich astatnich, što pra takoje niemahčyma było navat kazać. Dyj, ščyra kažučy, navat paraŭnoŭvać nie było z čym.

Było inšaje: kali i byli niejkija strachi, to tolki kab ničoha nie sarvałasia, usio prajšło čysta. I hałoŭnaje — kab vybary nie paciahnuli za saboj mocnych hramadskich chvalavańniaŭ, nie była spravakavanaja niebiaśpiečnaja dla hramadstva situacyja. Što da vynikaŭ vybaraŭ, to ja nikoli ŭ ich nie sumniavałasia.

Jeŭraradyjo: Viarnusia da vašaha padvyšanaha cisku viečaram 19 śniežnia 2010 hoda. Chtości cyničny moža skazać, što ŭsio heta nie ad niervaŭ, ad niačystaha sumleńnia — byli b sumlennyja vybary, to i ź ciskam usio dobra było, i ŭsie žyvyja b zastalisia…

Lidzija Jarmošyna: Aj, pra što vy kažacie! Čałaviek, jaki śviadoma chłusić, zvyčajna maje mocnuju niervovuju sistemu. Tak što cyničnyja troli niachaj supakojacca.

Što da maich słoŭ, to tut užo i nie viedaješ, što kazać. Bo luboje słova moža być pa-inšamu patłumačanaje. Navat samaje dobraje i śvietłaje.

Jeŭraradyjo: Vy, jak zvyčajny čałaviek, adčuvajecie nabližeńnie čarhovaj prezidenckaj kampanii?

Lidzija Jarmošyna: Nie. I zvyčajnyja ludzi hetaha pakul nie zaŭvažajuć prosta tamu, što pakul u hramadstvie nie adbyvajecca nijakich značnych hramadskich ci palityčnych padziej. Nie, peŭnyja razmovy iduć, ale da vybaraŭ jašče šmat času: jany projduć navat bolš, čym praz hod.

Vybarčaja kampanija pačniecca ŭ žniŭni, a jakija ŭ ludziej zvyčajna płany? Jany niešta płanujuć da Novaha hoda, potym — da adpačynku. I nie dumaje pra niejkija dalokija vybary. Heta dobra, bo śviedčyć, što napružańnia ŭ hramadstvie niama.

Jeŭraradyjo: Ale ž iduć razmovy pra abrańnie apazicyjaj adzinaha kandydata na vybarach-2015, pra Kanhres demsił, pra źjaŭleńnie siarod pretendentaŭ na adzinaha žančyny…

Lidzija Jarmošyna: Ja zaŭvažyła, što hetaj infarmacyi padajecca bolš, čym było samich padziej. Usio adbyvajecca ŭ vielmi vuzkich tusoŭkach, a padajecca ŭ ŚMI tak, nibyta ŭsio hramadstva łamaje hałavu nad tym, chto budzie hetym adzinym kandydatam. Dy ŭsio hramadstva dumaje, jak lepš kapustu našynkavać, salanki narabić, baršču navaryć!

Vy zhadajcie ŭsie tyja źjezdy, na jakich vyłučajucca kandydaty ad partyj: nu, 20 čałaviek, 25 ci navat 50 — voś i ŭsio tavarystva, jakoje źbirajecca i vyrašaje hetyja hłabalnyja pytańni. Nie, heta dobra, što takija mierapryjemstvy adbyvajucca — jany robiać žyviejšym palityčnaje pole. Intryha pierad vybarami, jakaja padvyšaje da ich cikavaść, nieabchodnaja.

Jeŭraradyjo: Dla žurnalistaŭ bolš cikava prachodziać vybary ŭ toj ža Ukrainie: tam niekaha padłavili na podkupie vybarščykaŭ — hrečku razdavaŭ, tam u śpisach partyjnych znajšli pryhožych dziaŭčat, a ŭ ich na staronkach fota eratyčnyja!

Lidzija Jarmošyna: Heta, moža, i cikava, ale ŭsio ž amaralna. Što da hrečki, to mnie hety skandał vielmi dziŭnym padajecca. Havorka idzie pra byłoha staršyniu CVK Ukrainy Kivałava, jaho na hetym padłavili. Ale mnie nieadnarazova moj były ŭkrainski kaleha kazaŭ: «My nikoli nie karajem za podkup, a naadvarot, kažam vybarščykam: «Vy žyviacie ŭ halečy — vaźmicie, ale prahałasujcie tak, jak vam zahadaje duša i sumleńnie». I tamu mnie padajecca, što ciapier takija represii palityčna matyvavanyja, skiravanyja suprać kankretnaj asoby.

U nas podkup niemahčymy ŭ pryncypie. Bo da niadaŭniaha času nie było nijakaha pryvatnaha finansavańnia vybaraŭ. Ciapier źjaviłasia suma: 9 tysiač bazavych vieličyń, kala 120 tysiač dołaraŭ, ale paviercie — heta taja suma, na jakuju chacia b ulotki nadrukavać!

Tamu ekanamičnyja ŭmovy, u jakija pastaŭlenyja kandydaty, prosta nie dazvalajuć im heta zrabić. Bo jany razumiejuć, jak ryzykujuć: pavinnyja buduć patłumačyć pachodžańnie ŭsich hetych dabrot. Nie, niezadekłaravanyja hrošy ŭ nas zaŭždy na prezidenckich vybarach vykarystoŭvalisia, heta było vidać chacia b pa tym, jak byli ekipiravanyja asobnyja kamandy.

Jeŭraradyjo: A čamu represij da ich nie ŭžyvali, kali vidać było?

Lidzija Jarmošyna: Kab zachavać hetych samych kandydataŭ. Bo vykarystoŭvali akurat tyja, chto i składaŭ hetuju realnuju žorstkuju kankurencyju. Na jakich rabili staŭku zamiežnyja siły i jakija rabili bolš žyvoj vybarčuju kampaniju.

Da ŭsiaho, kali dziejničać absalutna biaspłatna, to praktyčna niemahčyma i kampaniju pravieści. I my nastojvali na stvareńni takich fondaŭ, kab nadać vybaram prazrystaść. Spačatku fondy zrabili 3 tysiačy bazavych, ciapier 9 tysiač, i dumaju, što da nastupnych vybaraŭ pojdziem jašče dalej.

Ale dziaržava budzie vychodzić z hetaha siektaru. I tady heta ŭžo buduć vybary dla bahatych.

Jeŭraradyjo: Asabliva z ulikam taho, što kiraŭnik krainy «paraiŭ» biźniesmienam nie dapamahać apazicyi hrašyma.

Lidzija Jarmošyna: Ja nie čuła hetych słoŭ. Prynamsi aficyjna nie čuła nikoli. Adkul hetaja kułuarnaja razmova i nakolki jana realnaja, ja nie viedaju, tamu kamientavać jaje nie mahu.

A voś zakon naŭprost dazvalaje heta rabić. Inšaja reč, što jany, moža, na ŭsialaki vypadak nie chočuć ryzykavać sami.

Jeŭraradyjo: Vy vierycie ŭ toje, što apazicyja zdolnaja abrać adzinaha kandydata na vybary?

Lidzija Jarmošyna: Ja sutykajusia ź imi vyklučna ŭ aficyjnym poli. Ja nie viedaju ich asabistych, čałaviečych jakaściaŭ. Kaniečnie, ja nie mahu ich lubić, bo jany nie lubiać mianie — niemahčyma lubić taho, chto nie lubić ciabie. Ja da takoha altruizmu nie dajšła. Ale dumaju, što jany mohuć abrać adzinaha, kali im dapamohuć, na ich nacisnuć niejkija ŭpłyvovyja sponsary, jakija buduć vyznačać stratehiju i taktyku vybarčaj kampanii. Dobraachvotna ničoha nie atrymajecca: ludzi, jakija pretendujuć na rolu vialikaha palityka, ambicyjnyja i zvyčajna nie samakrytyčnyja. Jany nie mohuć realna acanić svaje mahčymaści i papularnaść u vybarščykaŭ. Tamu bieź siły, jakaja budzie dapamahać i finansami, i palittechnałohijami, jany nie zmohuć vyznačycca. I chutčej za ŭsio hetaja siła abaviazkova pačnie hulniu.

Jeŭraradyjo: Kali niechta z apazicyjnych lidaraŭ palubić vas i vy jamu adkažacie ŭzajemnaściu, zmožacie syhrać jamu na ruku i pravieści vybary tak, kab jamu było vyhadna?

Lidzija Jarmošyna: Adziny resurs CVK — nie pakarać niekaha za parušeńnie. Ci paličyć parušeńnie niaznačnym i nie źniać z rehistracyi. U nas čysta arhanizacyjnyja funkcyi, i ja navat nie ŭjaŭlaju, što mahła b zrabić dla apazicyjaniera, navat kali b u dušy lubiła jaho da paŭśmierci!

Jeŭraradyjo: Dniami Dźmitryj Us zajaviŭ u intervju Jeŭraradyjo, što vybary 2015 hoda ŭžo prajšli, pratakoły padpisanyja i zastałosia tolki ahučyć pieramohu z 64% dziejnaha kiraŭnika krainy. Hetyja pratakoły niedzie tut u vas lažać ci ŭ inšym miescy?

Lidzija Jarmošyna: Śmiech prosta! A navošta ich zahadzia padpisvać? Skažycie: navošta?

Jeŭraradyjo: Dyk jany ŭ vas niepadpisanyja lažać?!

Lidzija Jarmošyna: Jany mohuć być lubyja! Inšaja reč, što ŭ pratakoł treba nie tolki adnu asobu ŭnieści, ale i astatnich kandydataŭ — pratakoł ža ahulny, na ŭsich. Ale my astatnich kandydataŭ nie viedajem. Dyk što ŭ tyja pratakoły zapisać — biezalternatyŭnyja vybary?

Nu, Hajdukievič iznoŭ zajaŭlaje pra ŭdzieł. Ale davajcie nie zabyvać, što ŭ apošnich vybarach jon nie ŭdzielničaŭ, a vyjšaŭ užo na pieršaj stadyi. Ale navat kali zaraz Siarhiej Vasiljevič pojdzie, to mała dla prezidenckich vybaraŭ dvuch kandydataŭ.

Jeŭraradyjo: A kolki narmalna?

Lidzija Jarmošyna: Dumaju, što ŭ biuleteni musić być uniesiena nie mienš za čatyry čałavieki — navat try małavata. A raptam adzin zdymie svaju kandydaturu? U nas było try kandydaty na vybarach u 2001 hoda, chacia ad pačatku pra žadańnie bałatavacca zajaŭlała, zdajecca, 26 čałaviek. Praŭda, podpisy zdoleła sabrać tolki čaćviora.

Jeŭraradyjo: Pra podpisy: pieryjadyčna čuvać abvinavačvańni, što chtości na vybarach 2010 hoda patrebnyja dla rehistracyi 100 tysiač podpisaŭ nie sabraŭ, ale ŭsio adno byŭ zarehistravany. Było takoje? Imia nazaviacie?

Lidzija Jarmošyna: CVK maje spravu tolki z pratakołami. Kali nam abłasnyja i Minskaja haradskaja vybarčyja kamisii dajuć pratakoł, što hetaja asoba sabrała takuju kolkaść podpisaŭ i inšaj infarmacyi nie prychodzić, hetaja ličba ličycca praŭdzivaj. Tamu va ŭsich, chto braŭ udzieł u vybarach, pa pratakołach abłasnych kamisij ličycca nieabchodnaja kolkaść podpisaŭ.

Jeŭraradyjo: Prahučała prapanova abrać adzinym Mikałaja Statkieviča i pravieści chacia b zbor podpisaŭ — takaja kampanija salidarnaści. Vašaje staŭleńnie da takoha varyjanta?

Lidzija Jarmošyna: Jany nie mohuć hetaha zrabić. Heta takoje ž hłupstva i pravakacyja, jakuju jany zładzili ź niejkim «Narodnym refierendumam». Z tymi podpisami, jakija jany pryciahnuli siudy.

Pieršaje: refierendum pravodzicca pry najaŭnaści 350 tysiač podpisaŭ, a nie 50 tysiač. Druhoje: kab pačać praceduru, nieabchodna zarehistravać inicyjatyŭnuju hrupu. A nie pryciahvać nieviadoma što! A to jany pakryčali, zajavili, pryvieźli, ale ž heta ŭsio jurydyčna nikčemna. Hetak ža, kali inicyjatyŭnaja hrupa Statkieviča nie budzie zarehistravanaja, to ŭsie zbory podpisaŭ — heta zvyčajnaja pravakacyja.

Jeŭraradyjo: Čamu adrazu pravakacyja: a pryciahnuć uvahu hramadskaści da najaŭnaści ŭ krainie palitviaźniaŭ?

Lidzija Jarmošyna: Toje, što Statkievič jość na śviecie i što jon siadzić, viedajuć usie hramadzianie Respubliki Biełaruś. Tamu hety zbor pusty, pustyja i niezakonnyja dziejańni hetyja… jany navat šmat šumu nie mohuć utvaryć!

Jeŭraradyjo: Łukašenka raskazaŭ, što jaho padbuchtorvali pravieści vybary viasnoj. Ci možna było b heta zrabić zakonna?

Lidzija Jarmošyna: Možna. Jość krajniaja data: 20 listapada 2015 hoda. Za hetuju datu vyjści nielha. Bo 21 studzienia zakančvajucca paŭnamoctvy prezidenta, i vybary pavinnyja prajści za dva miesiacy da hetaha dnia. Tamu apošniaja realnaja data — 15 listapada, bo heta apošnija vychodnyja. Vybary možna pravodzić raniej, i ŭ nas zaŭždy prezidenckija vybary pravodzilisia raniej, za vyklučeńniem 2001 hoda.

Čamu prapanoŭvali ŭ sakaviku prezidentu? Nu, ja tak dumaju, tamu što viasna — heta para nadziej, nastroj u ludziej lepšy, a listapad — samy depresiŭny miesiac.

Ale ŭ hetaj situacyi samaje nieprymalnaje toje, što nadta vialikaje ssoŭvańnie. Adna sprava, kali vybary pieranosiacca na 3 miesiacy, i zusim inšaja — kali na 8 miescaŭ. Heta značnyja padstavy dla krytyki najpierš z boku mižnarodnych ekśpiertaŭ. A taja ž apazicyja pačała b kryčać, što vybary adrazu treba ličyć nielehitymnymi chacia b tamu, što ich pieranos na taki rańni termin nie daŭ im mahčymaści padrychtavacca.

Jeŭraradyjo: Dumajecie nad tym, jak pravieści vybary takim čynam, kab jany narešcie byli pryznanyja ŭ śviecie?

Lidzija Jarmošyna: Dla hetaha jany pavinnyja być pryznanyja demakratyčnymi, svabodnymi i adkrytymi pry najaŭnaści realnaj kankurencyi. Kali budzie krytyka pa luboj z hetych pazicyj, heta pryviadzie da niepryznańnia.

Možna pracavać na vybary i pravieści ich biez surjoznych niedachopaŭ, ale lubaja paślavybarnaja situacyja moža pryvieści da taho, što jany nie buduć pryznanyja. Jak heta było ŭ 2010 hodzie. Na druhi dzień paśla vybaraŭ kiraŭnik misii mnie skazaŭ, što kali b nie było Płoščy i, jak jon skazaŭ, brutalnaha razhonu niezadavolenych, to rašeńnie było b zusim inšym. A da samich vybaraŭ surjoznych zaŭvah nie było — usie dužki našaha zakona absalutna demakratyčnyja. Vybary — heta praces techničny, a mazaika składajecca sa šmatlikich elemientaŭ.

Jeŭraradyjo: I pytańniaŭ da taho, kolki hałasoŭ nabraŭ pieramožca, nie ŭźnikła?

Lidzija Jarmošyna: Nie. ABSIE nie aceńvaje rejtynh i ličby — jany aceńvajuć abstanoŭku i ŭmovy praviadzieńnia vybaraŭ.

Jeŭraradyjo: Značycca, i hetym razam vy nie zmožacie harantavać Łukašenku, što vybary praviedziacie tak, što ich pryznajuć u śviecie?

Lidzija Jarmošyna: Nie, kaniečnie! Patrabavać takoje ad orhana, jaki adkazvaje za arhanizacyjny i jurydyčny składnik kampanii, prosta niemahčyma, bo vybary — heta hramadska-palityčny praces, u jakim znachodzicca ŭsia kraina ciaham troch miesiacaŭ.

Adzinaja harantyja, jakuju moža dać staršynia CVK ŭ luboj krainie, — ja budu sumlenna staracca. Za heta mnie, pa vialikim rachunku, i zarobak płaciać.

Jeŭraradyjo: Vy nie raz kazali, što vybarčaje zakanadaŭstva ŭ nas demakratyčnaje, što vybary prachodziać usio demakratyčniej. Možna siońnia kazać, što vybary 2015 hoda buduć jašče bolš demakratyčnyja, čym byli ŭ 2010 hodzie?

Lidzija Jarmošyna: U vašym pytańni zakładzieny admysłovy padtekst, kab potym mianie troliŭ internet — choć jon i tak heta budzie rabić! Usio bolš i bolš demakratyčnyja. Heta ŭ styli viadomaj Śviety ź Ivanava, jakaja skazała, što my pačali apranacca ŭsio lepš i lepš.

Tym nie mienš ja mahu skazać, što my źmianiajem zakanadaŭstva, jakoje palapšaje ŭmovy praviadzieńnia vybaraŭ. Ja vydatna viedaju, što nikoli nikoha nie zadavolić pytańnie składu kamisij. Apazicyju nie zadavolić tamu, što tam nadta šmat namienkłatury. A namienkłatura nikoli tudy nie ŭviadzie vialikuju kolkaść «svabodnych mastakoŭ». Bo hetyja ludzi mitynhujuć, ale nie chočuć pracavać. I pa sutnaści pracujuć na zryŭ narmalnaj abstanoŭki ŭ pracy vybarčych kamisij. Užo na hetym etapie pačnucca pretenzii.

Jeŭraradyjo: Sabrali b u siabie lidaraŭ apazicyi i damovilisia ź imi: addajom 50% miescaŭ u kamisijach vam, kali harantujecie, što nakirujecie tudy narmalnych i adekvatnych ludziej!

Lidzija Jarmošyna: Heta mahčyma tolki ŭ hramadstvie, dzie apazicyja — strukturnaja častka hramadstva. Kali jana pradstaŭlenaja ŭ parłamiencie, va ŭradzie — tady ź imi zaklučajecca pahadnieńnie i niejki kansiensus.

U nas apazicyja — heta prosta častka niezadavolenaha hramadstva, ni ŭ što nie strukturavanaja, amorfnaja, i ŭjavić, kolki hetych ludziej i jakija jany, niemahčyma. Tut niemahčyma ni z kim vieści pieramovy, bo hetych ludziej aficyjna nie isnuje. Jany isnujuć u niejkim sacyjalna-palityčnym kantekście. Moža być, heta zanadta hučnaja nazva dla jačejki, jakaja nazyvaje siabie apazicyjaj.

Jeŭraradyjo: Sami nie dumajecie pra deputactva?

Lidzija Jarmošyna: Nie, ja tam nie budu. Kali ja z hetaj pasady, jak kažuć zeki, adkinusia, to treba ŭžo budzie dumać pra zasłužany adpačynak.

Jeŭraradyjo: A kali na zasłužany adpačynak? Nijakich «sihnałaŭ» nie pastupała?

Lidzija Jarmošyna: Tradycyja našaha dziaržaŭnaha arhanizma ŭ tym, što zahadzia nichto vudu daloka nie zakidvaje. Heta moładź moža zakidvać na dziesiacihodździ, a my ludzi niemaładyja i žyviom karotkimi pieryjadami.

Termin ratacyi — kaniec 2016 hoda, i ja dumaju, što kiraŭnik dziaržavy tady i budzie vyznačać. Nijakich sihnałaŭ nakont pracy paśla śniežnia 2016 hoda ja nie atrymlivała.

Ja pracuju, ale z adkrytymi vačyma, i liču, što rašeńnie, jakoje budzie pryniataje adnosna mianie, luboje rašeńnie — abhruntavanaje. Nijakich pretenzij dy kryŭdaŭ u mianie być nie moža.

Jeŭraradyjo: A to čutki chodziać, što Jarmošyna moža i novy 2015 hod sustreć piensijanieram…

Lidzija Jarmošyna: Kali išła razmova pra majo pryznačeńnie, kiraŭnik krainy skazaŭ: «Koniej na pierapravie nie mianiajuć». Nu, ja i jość toj koń, vidać. Razmova išła pra budučyja vybarčyja kampanii — prezidenckuju 2015 i parłamienckuju 2016. Tamu tyja, chto maryć mianie chutka nie ŭbačyć na hetaj pasadzie, paśpiašalisia — heta adbudziecca paźniej.

Jeŭraradyjo: Niecikaŭny vy čałaviek: i nie pytajeciesia, jakija čutki da mianie dachodzili!

Lidzija Jarmošyna: Nu, pa-pieršaje, ja razumieju, što vašyja časta pravakacyjnyja pytańni skiravanyja na toje, kab vyklikać vostruju reakcyju — na pravakacyi zaŭždy dziorzka adkazvajuć, i heta možna skarystać.

A pa-druhoje, ja pa-fiłasofsku hladžu na žyćcio i na svajo stanovišča ŭ hetym žyćci i na hetaj pracy. Moj uzrost užo i patrabuje hetaha. Da ŭsiaho, stolki chodzić čutak biespadstaŭnych, i vyśviatlać heta… Nu, chodziać i chodziać.

Jeŭraradyjo: Nie dumali pra toje, kab praz sud damahčysia vyklučeńnia vas sa śpisu nieŭjaznych u krainy ES?

Lidzija Jarmošyna: Miarkuju, pakul ja pracuju u CVK, to na viaki ŭniesienaja ŭ hety śpis, i navošta mnie prynižacca! Jany ž ničoha nie tłumačać!

Siabra CVK pakazvała rašeńnie Jeŭrapiejskaha trybunała: «Pakinuć vizavyja abmiežavańni bo jana źjaŭlajecca siabram CVK». Pa fakcie znachodžańnia jaje ŭ kamisii, a nie tamu, što dakazanaja jaje vina ŭ niečym.

Kali abmiežavańnie pravoŭ źviazvajuć ź miescam pracy, to biessensoŭna sudzicca. Tak što Paryža nie budzie, heta zrazumieła!

Jeŭraradyjo: Ničoha, zatoje paru hadoŭ tamu, niahledziačy na abmiežavańnie pravoŭ, u Vienu lotali pa zaprašeńni ABSIE!

Lidzija Jarmošyna: Ale heta byŭ śpiecyjalny dazvoł, tak jany staralisia jaho atrymać! A jašče ŭ aeraporcie papiaredžvali, što viza ŭ Aŭstryju nie daje mnie prava pierasiekčy miažu. Čym karystacca takoj vizaj, dy pajšli jany z takimi prynižeńniami!

Jeŭraradyjo: To što — nastupnym razam admoviciesia?

Lidzija Jarmošyna: Kali treba dla radzimy, to ja ŭsio skažu, što treba, i palaču kudy radzima zahadaje. Bo heta nieabchodna: infarmavać i davodzić aficyjny punkt hledžańnia. Ale ejfaryi z hetaj nahody ŭ mianie nie budzie.

Jeŭraradyjo: Jak letni adpačynak praviali?

Lidzija Jarmošyna: Tradycyjnaja pajezdka na tydzień u Kalininhrad da siabroŭ. I na dva tydni ŭ žniŭni jeździła ŭ naš sanatoryj u Sočy — vydatna było.

Jeŭraradyjo: A skažycie mnie — čyj Krym?

Lidzija Jarmošyna: Nie skažu! Kali b heta była pryvatnaja razmova, jakaja nie pišacca na dyktafon, ja b mahła skazać. Ale navat pryvatnaje mierkavańnie vysokaj słužbovaj asoby ŭsprymajecca jak aficyjnaje mierkavańnie dziaržavy. Tamu ja na hetaje pytańnie prosta nie maju prava adkazvać.

Jeŭraradyjo: Paradujecie nas u dzień vybaraŭ u 2015 hodzie čarhovym afaryzmam u styli «baršču»?

Lidzija Jarmošyna: Ja pra masku dla tvaru zympravizuju!

• 0
• 0
• 0
• 0
• 0
• 0
• 0
• 0