Siońnia biełaruskija harady praź biaźvietranaść nakryŭ mocny smoh.
Smoh — heta nie tolki niazručnaści dla kiroŭcaŭ i niepryjemny pach, ale i dosyć škodnaja dla zdaroŭja źjava. Hałoŭny pazaštatny pulmanołah Ministerstva achovy zdaroŭja Iryna Łapcieva patłumačyła «NN», jak pravilna pavodzić siabie ŭ smoh:
«Pa-pieršaje, kab abaranić orhany dychańnia, treba abaviazkova karystacca maskaj. Jaje možna lohka zrabić samomu z marli. Ci možna prosta prykłaści da tvaru nasoŭku.
Nieabchodna jak maha mienš času pravodzić na adkrytym pavietry i biez asablivaj nieabchodnaści nie vychodzić na vulicu. Kali vy ŭsio ž znachodziciesia na adkrytym pavietry, minimizujcie fizičnuju aktyŭnaść: nie zajmajciesia ciažkaj pracaj i navat pastarajciesia nie chadzić chutka, bo heta pravakuje intensiŭnuju dychalnuju aktyŭnaść.
Taksama treba ščylna začynić vokny i nie pravietryvać pamiaškańnie.
Što tyčycca ludziej z hrupy ryzyki, da ich u pieršuju čarhu adnosiacca astmatyki, bo ŭ smohu moža być niejkaje rečyva, zdolnaje spravakavać prystup.
Jany musiać abaviazkova mieć pry sabie inhalatar.
Taksama ŭ hrupie ryzyki — ludzi z chraničnaj abstruktyŭnaj chvarobaj lohkich, pažyłyja ludzi, dzieci, asoby z sardečna-sasudzistymi patałohijami. Usim im padčas smohu varta jak maha mienš času pravodzić na adkrytym pavietry».
Kamientary