Raśsielhasnahlad ź sierady, 26 listapada, uvodzić zabaronu na prodaž u Rasii miasa jašče vaśmi biełaruskich pradpryjemstvaŭ uśled za uviedzienaj dvuma dniami raniej anałahičnaj zabaronaj u dačynieńni da 11 kampanij.
Zabarona ŭvodzicca na pradukcyju nastupnych pradpryjemstvaŭ: AAT «Ahrakambinat Skidzielski», AAT «Viciebskaja brojlernaja ptuškafabryka», SZAT «Siervaluks Ahra», AAT «Viciebski miasakambinat», AAT «AFPK Žłobinski miasakambinat», AAT «Kalinkavicki miasakambinat», AAT «Rahačoŭski MKK» i AAT «Ptuškafabryka «Rasśviet».
Na ich prypadaje amal uvieś abjom impartu biełaruskaha miasa ŭ Rasiju — kala 400 tysiač ton sumaj nie mienš za 300 miljonaŭ dalaraŭ.
Aficyjna viedamstva patłumačyła takija miery vyjaŭleńniem u pradukcyi biełaruskich kampanij niebiaśpiečnych dla zdaroŭja mikraarhanizmaŭ. Z paniadziełka ŭžo była zabaronienaja da realizacyi ŭ Rasii pradukcyja Słuckaha miasakambinata z-za taho, što ŭ jaje kaŭbasie byŭ znojdzieny hienom virusa afrykanskaj čumy śviniej.
Biełaruskija łabaratoryi ŭ svaju čarhu nie znajšli parušeńniaŭ u pradukcyi miasakambinataŭ, pastaŭki ź jakich Rasija zabaraniła ŭ paniadziełak. Pra heta raspavioŭ žurnalistam načalnik hałoŭnaha ŭpraŭleńnia źniešnieekanamičnaj dziejnaści Minsielhasa Biełarusi Alaksiej Bahdanaŭ.
Pavodle jaho słoŭ, kali Rasija całkam admovicca ad impartu miasa, Minsk zmoža znajści inšyja rynki. «My pastaŭlajem svaju pradukcyju ŭ 56 krain. My znojdziem, kudy jaje dzieć», - dadaŭ jon.
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy12
Kamientary