«Hazprom» źnios Maskoŭski aŭtavakzał, a ciapier šantažuje

Minsk i «Hazprom» nie syšlisia ŭ canie budaŭnictva raźviazki kala Nacbiblijateki.

Prajekt pa budaŭnictvie raźviazki na skryžavańni praśpiekta Niezaležnaści i vulicy Filimonava ŭ Minsku prypynieny. Minharvykankam i «Hazprom», za košt jakich na parytetnaj asnovie pavinna było finansavacca ŭźviadzieńnie dadzienaha abjekta, razyšlisia ŭ pohladach na košt raźviazki. Infarmacyju pra heta TUT.BY paviedamili niekalki infarmavanych krynic.

Nahadajem, što nahruzka pa ŭźviadzieńniu šmatuzroŭnievaj transpartnaj raźviazki niedaloka ad Nacyjanalnaj biblijateki lehła na «Hazprom». Heta była «nahruzka» da abaviazacielstvaŭ z pryčyny budaŭnictva ofisa rasijskaj hazavaj manapolii na miescy aŭtavakzała «Maskoŭski». Pa ŭmovach inviestycyjnaj damovy, rasijskaja kampanija abaviazałasia pieraličyć u biudžet Minska hrašovyja srodki ŭ pamiery 50% kaštarysnaha koštu budaŭnictva raźviazki. Astatniaja častka kłałasia na plečy haradskoj kazny. U damovie kankretnaja suma nie prapisanaja, śćviardžaje krynica, znajomaja z realizacyjaj prajekta, «baki damovilisia na partniorskich (čytaj parytetnych) padstavach prafinansavać abjekt».

Pavodle infarmacyi krynic, niadaŭna zakazčyk budaŭnictva raźviazki «Hardarbud» nakiravaŭ list u instytut «Minskinžprajekt» z prośbaj prypynić prajektnyja raboty pa raźviazcy. Pryčyna — nibyta adsutnaść finansavańnia.

«Srodki na ŭźviadzieńnie raźviazki ŭžo daŭno pieraličanyja. «Hazprom» vykanaŭ inviestycyjnyja abaviazacielstvy pierad horadam jašče ŭ minułym hodzie», — skazali ŭ «Hazprom transhaz Biełaruś».

Pavodle nieaficyjnaj infarmacyi, raniej košt raźviazki aceńvaŭsia ŭ rajonie 60 młn dalaraŭ. Zychodziačy z hetaj sumy rasijski hazavy manapalist i vyrabiŭ raźliki. U kampanii «Hazprom transhaz Biełaruś» nie zmahli nazvać sumu, jakuju pieraličyli ŭ biudžet Minska na budaŭnictva puciepravoda.

Ź ciaham času prahnozny košt vyras da 126.300.000 dalaraŭ. Da zakančeńnia budaŭnictva hetaja ličba moža źmianicca, zajaviŭ AUTO.TUT.BY 22 kastryčnika dyrektar «Hordarbuda» Michaił Hłušakoŭ. Ciapier Hłušakoŭ admoviŭsia ad kamientaroŭ.

Atrymlivajecca, što košt uzros amal u 2 razy, što nie mahło nie naściarožyć navat takoha zamožnaha inviestara, jak «Hazprom»,

raskazała infarmavanaja krynica. Jana śćviardžaje, što padradčyk abjekta «Trest № 15 «Śpiecbud» vystaviŭ dadatkovyja ŭmovy, jakija raniej nie fihuravali ŭ prajekcie zbudavańnia». U «Treście № 15 «Śpiecbud» atrymać kamientar nie ŭdałosia.

U «Hazpromie» byli ździŭleny ŭzrosłym koštam rabot i zapatrabavali pravieści niezaležnuju ekśpiertyzu. Takim čynam, prajekt spyniŭsia. «Znajści dadatkova 100 młn dalaraŭ prablematyčna nie tolki dla Minharvykankama, ale i dla «Hazproma», jaki pieražyvaje siońnia nie lepšyja časy», — skazaŭ surazmoŭca TUT.BY. «Situacyja ŭ śviecie moža prymusić rasijskuju kampaniju adkłaści realizacyju hetaha prajekta ŭ Biełarusi», — ličyć krynica.

U «Hazprom transhaz Biełaruś» zajavili, što «padrychtoŭčyja pracy pa ŭźviadzieńni šmatfunkcyjanalnaha kompleksu iduć pa płanie».

• 0
• 0
• 0
• 0
• 0
• 0
• 0
• 0