Ad': Bred sumašedšaha pra Biełaruś na Ren-TV

Na rasiejskim kanale 20 śniežnia pakazali vypusk pieradačy «Vajennaja tajna», pryśviečany Biełarusi. A dakładniej — «aranžavaj revalucyi» ŭ Minsku, jakuju, samo saboj, rychtuje chitry Zachad, a moža być i sam Łukašenka.

Uvohule, siužet zrobleny ŭ duchu «kłasičnaha NTV» z tryvožnaj muzykaj i złaviesnym zakadravym hołasam.

Asnoŭnaja tema — antyrasijski nastroj biełarusaŭ i «šmathadovaja padrychtoŭka» da novaha Majdanu z dapamohaj Zachadu.

Unutry krainy padtrymlivajecca heta, miarkujuć aŭtary, apazicyjaj i telekanałam «Biełsat». Pryčym, apazicyja na 80% finansujecca Zachadam, a na 20% — samoj uładaj, kab na vybarach była choć jakaja-niebudź kankurencyja. Punktam zboru biełaruskaj apazicyi nazyvajecca Varšava, jakaja, pa słovach aŭtaraŭ videa, razam z Vašynhtonam źjaŭlajecca asnoŭnaj krynicaj finansavańnia kijeŭskaha Majdanu, i ciapier robić usie, kab paŭtaryć pośpiech u Biełarusi.

Pavialičyć

Pryvodziacca antyrasijskija cytaty Zianona Paźniaka i Alesia Michaleviča, i — hołas za kadram dryžyć! — pakazvajecca videa z futbolnaha matču pamiž Biełaruśsiu i Ukrainaj, kali i chatnija i haściavyja trybuny skandujuć «Hierojam słava!».

U pieradačy ŭzhadvajuć navat fiestyval «Basovišča», pryčym kažuć, što nie mohuć dać u efir nivodnaha frahmientu taho, što hučyć na scenie, «nastolki heta abraźliva» dla Rasii. Karaciej, tak śmiešna, što navat užo nie śmiešna.

Naprykład, śćviardžajecca, što ŭ Biełarusi jość padzieł na Zachad i Uschod, anałahičny z ukrainskim. A «ekśpierty», siarod jakich rej viadzie Suzdalcaŭ, paviedamlajuć, što biełarusam usio roŭna da kaho dałučacca, aby było vyhadna.

Pavialičyć

Častka, pryśviečanaja Łukašenku (kaniečnie, kudy ž bieź jaho) składajecca z uzajemavyklučalnych parahrafaŭ. To biełaruski kiraŭnik abvinavačvajecca ŭ tym, što «na praciahu ŭsich 20 hadoŭ pastajanna patrabuje ad Rasii raznastajnych sastupak, ale pry hetym jen tak i nie pryznaŭ niezaležnaści Paŭdnievaj Asietyi i Abchazii». To jon nazyvajecca samym viernym rasiejskim sajuźnikam. Taksama Łukašenku ŭzhadali jaho vykazvańni pra «hałubych», i navat złaśliva prajšlisia pa tym fakcie, što jon paŭsiul vozić z saboj małodšaha syna.

U finale, kaniečnie, hučyć maral: «Niebiaśpiečna nie toje, što ZŠA ŭžo padrychtavali niekalki miljardaŭ dla novaj revalucyi, a ŭ tym, što padtrymać biesparadki hatovyja mnohija prostyja biełarusy. Zhodna z apytańniami, kala pałovy biełarusaŭ marać ab sajuzie ź Jeŭropaj, to bok ab tym, čaho choča dla siabie Ukraina».

Nasamreč, paśla prahladu hetaha «šedeŭru», składvajecca ŭražańnie, što aŭtary jašče nie vyrašyli, jak stavicca da Biełarusi ŭ cełym. Adnak pieradača cudoŭna ŭpisvajecca ŭ papularnuju siońnia ŭ Rasii kancepcyju «paŭsiul vorahi» – maŭlaŭ, biełarusy, choć i žyvuć na našyja kredyty, adnak, bač ty, nie vielmi nas i lubiać! Da infarmacyjnaha ckavańnia Biełarusi rasiejskija ŚMI nie prosta hatovyja, a dobra padrychtavanyja. Pytańnie tolki ŭ zahadzie.

• 0
• 0
• 0
• 0
• 0
• 0
• 0
• 0