Ukaz ab słužbie zamiežnikaŭ u armii Rasii — čarhovaje vyprabavańnie dla Biełarusi

Mnohija historyki, pišučy ab raspadzie Savieckaha Sajuza, vypuskajuć z-pad uvahi stan Savieckaj Armii i Vajenna-Marskoha fłotu da pačatku 1990-ch hadoŭ. A stan byŭ niezajzdrosny i tryvožny. Tryvohu vyklikała etnična-relihijnaja struktura armii: siarod pryzyŭnikoŭ štohod pavialičvałasia dola chłopcaŭ ź isłamskich rehijonaŭ, a aficerski korpus na 2/3, kali nie bolš, składaŭsia sa słavian (praŭda, z pracentnaj normaj dla biełarusaŭ i ŭkraincaŭ). Armija pastupova dzialiłasia na rehijanalnyja, etničnyja i relihijnyja hrupoŭki: ciurkamoŭnyja chłopcy asobna, bałty i estoncy asobna, syny Paŭnočnaha Kaŭkaza i Zakaŭkaźzia asobna…

Jašče adnoj asablivaściu Savieckaj Armii i VMF było toje, što svajoj ciahavitaściu i tryvuščaściu adznačalisia pryzyŭniki ź Biełarusi i Ukrainy. Pra ŭkraincaŭ, praŭda, chadzili pokazki pra ich luboŭ da siaržanckich łyčak, ale toje, što jany słužbisty, nie admaŭlaŭ nichto. Ciapierašnija padziei ŭ Danbasie pakazvajuć, što ŭkraincy — sapraŭdy ludzi «kozaćkoho rodu» i vajavać umiejuć.

U rasijskaha palityčnaha i vajskovaha kiraŭnictva taksama šerah prablem. Nasielnictva krainy skaračajecca pieravažna koštam tytulnaj nacyi. Kali vialikarosaŭ u pieryjad z 2002 pa 2010 h. pamienieła na 4,9 młn čałaviek, dyk «inarodcaŭ» paboleła na 2,5 młn. Asabliva pryrastali i, miarkuju, pryrastajuć, narody Paŭnočnaha Kaŭkaza i siarednieazijackija dyjaspary ŭ Rasii.

Druhaja prablema — ci možna dasiahnuć sapraŭdnaj sałdackaj salidarnaści pamiž vialikarosami i «inarodcami»?

Pavialičyć

Navat takoje pytańnie paŭstaje: čamu musulmanin pavinien jeści z adnaho katła z chryścijaninam? Treciaja prablema — navučańnie vajennaj spravie, asabliva ŭ vajskovych vučyliščach i akademijach, chłopcaŭ ź isłamskich rehijonaŭ. Chto harantavaŭ, što siarod aficeraŭ rasijskaj armii nie źjaviacca novyja Džachar Dudajeŭ i Asłan Maschadaŭ? I čaćviortaje: ci mahčyma pasłać apranutych ŭ vajskovuju formu synoŭ adnych isłamskich narodaŭ navodzić «kanstytucyjny paradak» u inšych isłamskich rehijonach? A ciapier i novaje pytańnie: ci možna rasijskaha sałdata-ŭkrainca pasłać u Danbas?

Vyrašeńniu hetych prablem i pavinna była pasłužyć ŭviadzieńnie kantraktnaj sistemy vajskovaj słužby. Dy praktyka pakazała (i apošnija sacyjałahičnyja zandažy toje paćviardžajuć), što rasijanie nie takija ŭžo patryjoty: jany achvotna kryčać «krymnaš», nie suprać dałučeńnia da Rasii i Danbasu, ale pasyłać svaich synoŭ u «haračyja punkty» nie chočuć. I rasijskija mužčyny nie vielmi imknucca nadzieć sabie na šyi sałdackija chamuty. Ničoha nie zastajecca, jak pačać viarboŭku ŭ rasijskuju armiju hramadzian inšych (pažadana chryścijanskich, prynamsi nieisłamskich) krain.

Akidvajučy vokam mapu Jeŭropy i navat Zakaŭkaźzie, dumaju: kaho, synoŭ jakich narodaŭ, chočuć załučyć rasijskija hienierały ŭ svajo vojska? Armianaŭ, hruzinaŭ, ukraincaŭ? A mo łatyšoŭ, litoŭcaŭ ci estoncaŭ razam z małdavanami? I mižvoli majo voka spyniajecca na tym łapiku ziamnoj sušy, jaki nazyvajecca Biełaruśsiu.

U patryjatyźmie Uzbrojenych Sił Biełarusi (jak i inšych militarnych farmavańniaŭ) chto tolki nie sumniavajecca. 20 hod moŭnaja, adukacyjnaja i kulturnaja palityka ŭładaŭ biła ŭ adnu kropku. Ułada ŭžo damahłasia, što vyrasła cełaje pakaleńnie biełarusaŭ, jakoje nie razumieje, abo ź ciažkaściu razumieje biełaruskuju movu. Armija ž daviaršała toje, što było zakładziena ŭ škole.

Viedaju, mnie zapiarečać: pamyłka Rasii ŭ tym, što jana ličyła i ličyć rasijskamoŭnych ludziej u postsavieckich krainach całkam «svaimi». Jano tak, ale ni ŭ adnoj postsavieckaj krainie nie było takoha nastupu na svajo, takoha apahańvańnia svajho, jak Biełarusi.

Pavialičyć

Nie ŭspuskajma z pola zroku i druhi čyńnik — materyjalny. Vajskoviec u Biełarusi atrymlivaje mienš, čym Rasii. I vajskovaja piensija u nas nižejšaja. I jak tut nie zhadać, što mnohija našy hramadzianie, jakija słužyli kadravuju ŭ Savieckaj Armii, imknulisia stać rasijskimi vajskovymi piensijanierami?

Nakolki patryjatyčnyja militarnyja struktury Biełarusi, pakažuć u bližejšy čas ličby. Vielmi budzie cikava daviedacca, kolki kantraktnikaŭ u Biełarusi zachočuć padoŭžyć kantrakty i kolki kantraktaŭ budzie spyniena daterminova.

Nie zabudźma, što mnohija i mnohija z tych socień tysiač biełarusaŭ, jakija ciapier pracujuć u Rasii užo stracili i buduć stračvać pracu. Chto vyklučyŭ, što ich, asabliva maładych i siaredniaha vieku mužčyn, jakija słužyli ŭ Biełarusi, nie buduć vierbavać u rasijskaje vojska? I chto harantuje, što ŭsie hetyja mužčyny adkinuć takija prapanovy? Nie kłaści ž im zuby na palicu, treba ž im karmić, apranać i vyvodzić u ludzi dziaciej?

Svaim ukazam ab słužbie zamiežnikaŭ u rasijskaj armii Pucin padkładvaje minu pad militarnyja struktury Biełarusi. Razam z tym hety ŭkaz budzie dla nas novym vyprabavańniem — vyprabavańniem hramadzianskuju stałaść ludziej Biełarusi.

• 0
• 0
• 0
• 0
• 0
• 0
• 0
• 0