Hołyja biehali pa dvary, a potym udychnuli parašok — u Homieli sudziać chłopcaŭ, jakija pad spajsam vydalili vočy siabru
10 sakavika sud Čyhunačnaha rajona Homiela pačaŭ razhlad hučnaj kryminalnaj spravy. Dvoje miascovych žycharoŭ paśla ŭžyvańnia spajsu skalečyli svajho siabra: vydalili jamu vočy, zrezali tvar.
Paciarpieły — 23-hadovy Dźmitryj, na adnu tracinu straciŭ pracazdolnaść, zastaŭsia ślapym.
Na łavie padsudnych — jaho byłyja ŭžo siabry, zaraz abvinavačanyja, 22-hadovy Maksim i 30-hadovy Alaksandr. Akramia naniasieńnia ciažkich cialesnych paškodžańniaŭ, ich abvinavačvajuć ŭ niezakonnym abarocie narkatyčnych srodkaŭ.
Dźmitryja zavodzić u sudovuju zalu pad ruki maci. Chłopiec u čornych akularach i čornym kaptury. Kali zdymaje kaptur, to vidać, što na vačach — paviazka ź bintoŭ, i pavierch jaje — akulary.
Prakuror apytvaje abvinavačanych. Tyja pryznajuć svaju vinu pa artykułu 328 KK – niezakonny abarot narkotykaŭ, ale admaŭlajuć vinu za naniasieńnie ciažkich cialesnych paškodžańniaŭ. Ad pakazańniaŭ admaŭlajucca da taho času, pakul u sudzie nie vystupić paciarpieły i śviedki.
Maksimu – 22 hady. Vučyŭsia va ŭniviersitecie, dy byŭ adličany. Pa jaho słovach, zarablaŭ padpracoŭkami ŭ internecie, nieaficyjna. Alaksandru 30. Na momant ździajśnieńnia złačynstva taksama nie pracavaŭ, źbiraŭsia na zarobki ŭ Rasiju. Nie pracavaŭ na toj čas i Dźmitryj.
21 lipienia jany sabralisia ŭ Alaksandra. Toj žyŭ na vulicy Dakutovič – u domie na niekalki kvater. Žyŭ z baćkam, jaki ŭ toj viečar źjechaŭ u viosku. Viečaram susiedzi Alaksandra byli ŭzbudaražanyja hučnymi krykami. Pajšli supakoić moładź.
Ubačyli takuju karcinu – hołyja maładyja chłopcy biehajuć pa dvary.
Na prośby supakoicca nie reahavali, začynilisia ŭ chacie i kidalisia praz vokny patelniaj. Susiedzi vyklikali milicyju. Apieratyŭniki byli šakavanyja: na kuchni lažaŭ małady čałaviek, uvieś zrezany nažom, biez vačej, u łužynie kryvi, śpiavaje pieśni, jaki pry hetym byŭ u śviadomaści i adekvatna adkazvaŭ na pytańni: jak proźvišča, dzie žyvie. Jaho zabrali na «chutkaj» u špital, pryjacielaŭ, adpaviedna – u SIZA. Tolki praz tydzień u špitali Dźmitryj całkam pryjšoŭ u śviadomaść.
Na sudzie jon sprabavaŭ, jak moh, adnavić pa pamiaci padziei taho dnia. Sabralisia ŭ Alaksandra. Maksim prapanavaŭ kupić «hałandskuju marychuanu».
Dźmitryj pazyčyŭ u Alaksandra dla hetaj mety 200 tysiač. Maksim pryvioz travu. Jana była mokraj, vysušyli prasam. Potym Maksim prapanavaŭ «niešta inšaje» i prademanstravaŭ parašok biełaha koleru. Paciarpieły, pa jaho słovach, admoviŭsia ŭžyvać toj parašok (spajs), siabry ž udychali.
Dźmitryj nie pamiataje, chto mienavita nanios jamu pieršy ŭdar u skroń. Straciŭ prytomnaść. Aprytomnieŭ na padłozie na kuchni.
«Kali Maksim ubačyŭ, što ja pryjšoŭ u siabie, to pakłaŭ maju hałavu sabie na kaleni i nacisnuŭ palcami mnie na skivicu, i ja znoŭ straciŭ prytomnaść», — apaviadaje na sudzie chłopiec.
Potym, pa jaho słovach, jon znoŭ aprytomnieŭ, i tady ŭžo Maksim «nacisnuŭ palcami mnie na vočy».
Jon paćvierdziŭ, što padaŭ pazoŭ materyjalnuju kampiensacyju maralnaj škody ŭ pamiery 1 miljard rubloŭ z kožnaha abvinavačanaha.
Maci, jakaja na sudzie źjaŭlajecca jaho pradstaŭnikom, pakul admaŭlajecca ad kamientaroŭ. Na sudzie prysutničali svajaki abvinavačanych. «Trymajsia!», — kryčać jany Alaksandru i pakazvajuć uskinuty kułak. Toj u adkaz pakazvaje dva rastapyranyja palcy, nakiravanyja ŭ bok šyi.
Maci pad ruki vyvodzić z sudovaj zali Dźmitryja. Chłopiec i da trahiedyi mieŭ značnyja prablemy sa zdaroŭjem, a zaraz naohuł…
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1717
Kamientary