Aŭstralijskija navukoŭcy pryznali hamieapatyju nieefiektyŭnaj
Vykarystańnie hamieapatyčnych preparataŭ nazvali niebiaśpiečnym dla zdaroŭja pry ŭmovie admovy ad lekavańnia.
Nacyjanalnaja rada pa zdaroŭi i miedycynskich daśledavańniach Aŭstralii (NHMRC) pryznała lekavańnie hamieapatyčnymi preparatami nieefiektyŭnym, paviedamlaje The Guardian.
NHMRC praanalizavała 225 publikacyj i pryjšła da vysnovy ab tym, što «nie isnuje stanu zdaroŭja, dla jakoha było by śviedčańnie ab efiektyŭnaści hamieapatyi».
«Tyja, chto abirajuć hamieapatyju, ryzykujuć zdaroŭjem, kali admaŭlajucca ad lekavańnia», — zaklučyli navukoŭcy.
NHMRC razhladała i publikacyi, u jakich śćviardžałasia efiektyŭnaść hamieapatyčnych preparataŭ, ale ŭ ich znajšlisia surjoznyja pamyłki ŭ mietadach daśledavańnia.
Pavodle zajavy Asacyjacyi hamieapatyi Aŭstralii, kala miljona aŭstralijcaŭ karystalisia hamieapatyčnymi srodkami. Zhodna z analizam Suśvietnaj arhanizacyi achovy zdaroŭja, na 2009 hod aŭstralijcy tracili na hamieapatyju 9,59 młn dalaraŭ štohod.
***
Hamieapatyja — vid alternatyŭnaj miedycyny, lekavańnie pavodle psieŭdanavukovaha mietadu «padobnaje padobnym». U hamieapatyčnych preparatach aktyŭnyja rečyvy razbaŭlajucca da zvyšnizkich kancentracyj, niby pakidajučy ŭ vadkaści «pamiać» ab aryhinalnym rečyvie.
Suśvietnaja arhanizacyja achovy zdaroŭja zaścierahaje ad lekavańnia hamieapatyjaj. Hamieapatyja była ŭ 2010 hodzie adchilenaja jak mietodyka lekavańnia ŭ Vialikabrytanii.
U Biełarusi hamieapatyja dazvolenaja. U 2014 hodzie Minzdaroŭ dazvoliŭ pradavać hamieapatyčnyja srodki biez receptu.
Ciapier čytajuć
«Biełarusy dastatkova mudryja, kab čakać». Sieviaryniec vystupiŭ u Vilni3
Kamientary