Dyrektar fondu Navalnaha atrymaŭ prytułak u Vialikabrytanii

Uładzimir Ašurkaŭ, paplečnik rasiejskaha apazicyjaniera Alaksieja Navalnaha, paćvierdziŭ paviedamleńnie ab atrymańni im palityčnaha prytułku ŭ Vialikabrytanii.

Vykanaŭčy dyrektar Fondu baraćby z karupcyjaj paviedamiŭ, što jaho žonka Aleksandryna Markvo, jakaja razam ź im znachodzicca ŭ Vialikabrytanii, zaraz taksama źviarnułasia da brytanskich uładaŭ z prośbaj ab pradastaŭleńni joj palityčnaha prytułku. U Vialikabrytaniju Uładzimir Ašurkaŭ vyjechaŭ jašče minułaj viasnoj, dakumienty na atrymańnie palityčnaha prytułku jon padavaŭ u lipieni 2014 hoda, pieradaje BBC.

U Rasiei jon prachodzić pa spravie ab machlarstvie ŭ suviazi sa zboram hrošaj na vybarčuju kampaniju Alaksieja Navalnaha, kali toj bałatavaŭsia ŭ mery Maskvy.

Pa viersii śledstva, letam 2013 Ašurkaŭ razam ź inšymi apazicyjanierami, Kanstancinam Jankaŭskasam i Mikałajem Laskinym, unieśli na vybarčy rachunak Navalnaha pa adnym miljonie rubloŭ u jakaści dobraachvotnaha achviaravańnia, a zatym prapanavali prychilnikam palityka papoŭnić hetyja srodki, pieravioŭšy im hrošy na rachunki «Jandeks. hrošy».

Dźvie spravy na adnu siamju

U vybarčym štabie Navalnaha hetuju schiemu tłumačyli tym, što jana dazvalaje zbor małych achviaravańniaŭ na vybarčuju kampaniju. Akramia taho, u štabie padkreślivajuć, što rasijskaje zakanadaŭstva nie zabaraniaje takija schiemy finansavańnia. Adnak śledstva padazraje, što ŭ vyniku hetaj schiemy ludzi, blizkija da Navalnaha, skrali nie mienš za 10 młn rubloŭ. U samoha Alaksieja Navalnaha niama pretenzij da svajoj davieranaj asoby.

Kiraŭnik pieradvybarčaha štaba Navalnaha Leanid Vołkaŭ taksama asprečvaŭ viersiju rasijskaha śledčaha kamiteta, paviedamiŭšy, što štab daŭ spravazdaču ab usich biez vyklučeńnia hrošach, achviaravanych na kampaniju, u tym liku i pa 10 młn rubloŭ, atrymanych praz «Jandeks.Hrošy» Ašurkava, Jankaŭskasa i Laskina.

Aleksandryna Markvo prachodzić pa inšaj spravie. Śledčy kamitet abvinavačvaje jaje ŭ machlarstvie pry padpisańni kantraktaŭ, źviazanych z praviadzieńniem maskoŭskaha fiestyvalu «Knihi ŭ parkach».

U apošni čas Markvo i Ašurkaŭ nie kamientavali vysunutyja suprać ich u Rasiei abvinavačvańni, spasyłajučysia na paradu łondanskich advakataŭ.

Uładzimir Ašurkaŭ — adzin ź niekalkich viadomych apazicyjnych palitykaŭ i hramadskich dziejačaŭ, jakija pakinuli Rasieju za apošni čas.

• 0
• 0
• 0
• 0
• 0
• 0
• 0
• 0