Z-za składanych umoŭ nadvorja ŭ Biełarusi stračana 40% azimaha rapsu, paviedamiŭ 7 krasavika na pres-kanfierencyi ŭ Minsku namieśnik hienieralnaha dyrektara RUP «Navukova-praktyčny centr NAN Biełarusi pa ziemlarobstvie» Eroma Urban.
«Sioleta skłalisia niehatyŭnyja momanty pa stanie azimaha rapsu. Było pasiejana 387 tys. ha, ź jakich 40%, ci 150 tys. ha, jak miarkujecca, zahinuła», — paviedamiŭ Urban. Pavodle jaho słoŭ, u suviazi ź niedachopam vilhaci ŭ žniŭni i vieraśni raps uschodziŭ nieraŭnamierna. Akramia taho, u pačatku kastryčnika byli pieršyja zamarazki, i roźnica pamiž načnymi i dzionnymi tempieraturami skłała da 30 hradusaŭ Celsija. «Heta taksama niehatyŭna paŭpłyvała na stan rapsu», — adznačyŭ vučony.
Akramia hetaha, skazaŭ jon, naziralisia mocnyja marazy ŭ śniežni pry nizkim uzroŭni śniežnaha pokryva. «Usio heta ŭ sukupnaści abumoviła, što raśliny zahinuli na 40% zasiejanych płoščaŭ. Najbolšaja hibiel rapsu prahnazujecca ŭ Homielskaj vobłaści (80-85%), Mahiloŭskaj (65-70%), Minskaj (50-55%). Tym nie mienš u centralnych i paŭnočnych rajonach pačałasia viehietacyja rapsu, tamu śpiašacca ź pierasiavańniem azimaha rapsu nie varta. Kali zachavałasia žyvych raślin 15 i mieniej na kvadratnym mietry, to tady treba pierasiavać ci jaravym rapsam, ci zierniebabovymi kulturami», — paviedamiŭ Urban.
Razam z tym, pavodle jaho słoŭ, dla 1,5 młn. ha azimych ziernievych kultur «nie było niehatyŭnych źjaŭ hetaj zimoj».
Pavodle źviestak abśledavańniaŭ, hibiel azimych składzie nie bolš za 6-7% pry siaredniehadavych pakazčykach prykładna 8%. «Heta značyć pa trycikale, pa azimaj pšanicy ŭkładziemsia ŭ siaredniehadavyja značeńni, navat niekalki nižejšyja», — adznačyŭ namieśnik hiendyrektara. Adnak u pieryjad uschodu azimych naziraŭsia deficyt vilhaci, tamu pasievy atrymalisia redkimi, ź nieraŭnamiernymi ŭschodami, jakija i dali asnoŭny pracent hibieli.
Ciapier čytajuć
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary