Chłopca ź Bieraściejščyny zabrali ŭ vojska zdarovym, a praz paŭhoda jon pamior ad raku

19-hadovy Andrej Andryjanaŭ ź vioski Dziahli Žabinkaŭskaha rajonu prachodziŭ terminovuju słužbu ŭ adnoj z vajskovych čaściej Bieraścia. Raptoŭna jon zachvareŭ i 25 śniežnia 2014 hodu pamior. Maci padazraje, što syna ŭ vojsku bili. Vajskoŭcy heta admaŭlajuć.

Alena Andryjanava sustreła karespandenta Svabody kala svajoj chaty ŭ čornaj chustcy. Jana pachavała syna niekalki miesiacaŭ tamu, ale tolki ciapier vyrašyła raspavieści pra svaju biadu žurnalistam. Joj dahetul nia vydali kančatkovaha lekarskaha zaklučeńnia ab śmierci syna. Z hetaj pryčyny, kaža spadarynia, u jaje i ŭźnikajuć padazreńni, što ŭ spravie śmierci jaje syna niešta ŭtojvajecca.

Pavialičyć

Pamierły syn Andrej da pryzyvu ŭ traŭni 2014 hodu ŭ vojska pracavaŭ u miascovym kałhasie traktarystam. Byŭ asnoŭnym karmilcam siamji, bo Alena haduje dziaciej adna, biaz muža. Paśla śmierci Andreja ŭ 40-hadovaj spadaryni zastałosia jašče troje dziaciej.

Pryzvali ŭ traŭni, a ŭ vieraśni — źloh u lakarniu

«Byŭ zdarovy da vojska, nijakich surjoznych chvarobaŭ nie było. Užo ŭ vieraśni z vojska daviedałasia pra jaho surjoznuju chvarobu. Jon mnie sam patelefanavaŭ i skazaŭ, što lažyć u vajskovaj medyčnaj častcy. Ja pajechała, jon mnie kazaŭ, što ŭ jaho baleŭ levy bok. Kazaŭ, što niejkija snarady vazili, razhružali, dy śpinu nadarvaŭ. U vajskovaj medyčnaj častcy ŭ jaho prystup byŭ, straciŭ prytomnaść, tady jaho nakiravali ŭ Bieraściejskuju abłasnuju lakarniu. Jany mianie vyklikali praz paru dzion i skazali, što ŭ jaho puchlina hałaŭnoha mozhu, puchlina pazvanočnika, karaciej, uvohule ŭvieś levy bok», — raspaviała Alena Andryjanava.

Pavialičyć

Pytajusia, ci skazali, ad čaho ŭ jaho mahli źjavicca hetyja puchliny:

«Ja pytałasia, nichto mnie ničoha nie skazaŭ. Nie razumieju, jak heta, kali ŭ vojska absalutna zdarovaha chłopca adpuściła. Jak heta mahčyma? Pryjaždžali my da jaho na prysiahu — zdarovy chłopiec! A tut raptam…» — adkazvaje Alena.

Pavialičyć

Dyjahnaz

Ź Bieraścia vajskoŭca nakiravali ŭ respublikanski ankalahičny centar u Baraŭlanach, dzie 25 śniežnia Andrej pamior. Maci dahetul nia maje kančatkovaha zaklučeńnia ab pryčynach śmierci. Joj dasłali tolki papiaredniaje, dy jašče paviedamleńnie z vajenkamatu pra toje, što «šarahoviec Andryjanaŭ Andrej Viktaravič, 1995 hodu naradžeńnia, pryzvany na vajskovuju słužbu 16 traŭnia 2014 hodu […], prachodziŭšy słužbu ŭ vajskovaj čaści 11921, zachvareŭ, dyjahnaz: asteasarkoma 10 hrudnoha pazvanka z metastazavańniem u lohkija, plečavyja kostki, skronievuju dolu hałaŭnoha mozhu źleva, patalahičny pierałom šyjki levaha plača».

Asteasarkoma — heta niadobrajakasnaja puchlina kaściavych tkanak. Pavodle infarmacyi DU «Respublikanski navukova-praktyčny centar ankalohii i medycynskaj radyjalohii imia Alaksandrava», u Biełarusi apošnija dziesiać hadoŭ štohod rehistrujecca 90–140 vypadkaŭ hetaj niebiaśpiečnaj chvaroby. Asteasarkoma charaktaryzujecca ahresiŭnaściu, chutkim metastazavańniem. Najbolš vypadkaŭ hetaj chvaroby rehistrujecca ŭ maładych ludziej da 30 hadoŭ, čaściej — mužčyn.

Pavialičyć

Lekary kažuć, što časta puchliny raźvivajucca paśla traŭmy. Abo traŭma moža spryjać, kab chvaroba praciakała chutčej.

Kamentuje lekar-traŭmatolah, kiraŭnik infarmacyjna-kansultacyjnaj ustanovy «Šehamedkansult» Ivan Šeha:

«Moža być, što jaho zabirali ŭžo ź niedyjahnastavanym zachvorvańniem hetym. To heta prakoł medyčnaj kamisii, jakaja jaho ahladała. Asteasarkoma davoli chutka raźvivajecca, ale nie za dva miesiacy, dy z takim metastazavańniem. Zvyčajna — paŭhoda, krychu daŭžej. I chvaroba peŭny čas moža i biaź niejkich symptomaŭ praciakać. Čym ža jana i niebiaśpiečnaja, ankalohija — što na pieršaj i druhoj stupieni nijakich skarhaŭ niama».

Spadar Šeha paćviardžaje, što traŭmy mohuć sadziejničać paskareńniu ci pravakavańniu asteasarkomy.

Nadarvaŭsia, nosiačy snarady, ci jaho bili?

Alena Andryjanava kaža, što nie vyklučaje, što chvaroba ŭ jaje syna mahła źjavicca i paśla źbićcia. Spadarynia sprabavała vyśvietlić heta ŭ lekaraŭ, ale jany takoj infarmacyi nie paćviardžali.

Alena kaža, što šmat razoŭ prasiła ŭ syna, kab jon pryznaŭsia, ci bili jaho. Sam małady čałaviek kateharyčna heta admaŭlaŭ. Kazaŭ tolki, što nasiŭ snarady i nadarvaŭ, maŭlaŭ, śpinu:

«Adzinaje, što jon skazaŭ, ad čaho ŭ mianie i jość niejkija sumnieńni, heta — kab ja nie puskała małodšych bratoŭ u vojska», — kaža Alena.

U vajskovaj čaści 11921 Bieraścia kateharyčna admaŭlajuć, što Andreja Andryjanava mahli bić, jak uvohule admaŭlajuć lubyja prajavy «dziedaŭščyny»:

«Heta niepraŭdzivaja infarmacyja, ja nie mahu z vami havaryć, da pabačeńnia», — tolki i skazaŭ aficer na tym baku telefonnaha drotu.

U Žabinkaŭskim vajenkamacie taksama admovili padobnuju versiju i raspaviali, što Andrej Andryjanaŭ zachvareŭ u vojsku, bo na momant pryzyvu byŭ pryznany zdarovym:

«Adpaviadaŭ kryteram adboru i nakiravańnia na vajskovuju słužbu. Nie było nijakich padstavaŭ mierkavać, što jon nie adpaviadaje pa katehoryjach prydatnaści. Jak i 100 pracentaŭ, što jaho nia bili», — kaža vajskovy kamisar Žabinkaŭskaha vajenkamatu, padpałkoŭnik Andrej Anufryjuk.

Pavialičyć

Starejšy syn — pachavany, siaredniamu — vydali vajskovy bilet

Alena Andryjanava raspaviała, što vajskoŭcy dapamahli z arhanizacyjaj pachavańnia, pryjaždžali na mohiłki.

U žančyny jašče troje dziaciej — dva syny, 16 i 18 hadoŭ, i 12-hadovaja Naścia, jakaja vučycca ŭ žabinkaŭskaj škole-internacie dla dziaciej z zachvorvańniami zroku. Starejšamu z synoŭ, jakija zastalisia, Alaksandru, užo vydali vajskovy bilet, u vojska jon nia pojdzie. Chłopiec robić u kałhasie traktarystam, ciapier jon — karmilec siamji, zarobak addaje maci.

Alena vychoŭvaje dziaciej adna. Ich baćka pamior bolš jak dziesiać hadoŭ tamu. Žyvuć niebahata, Alena pracuje ŭ kałhasie roznarabočaj. Trymajuć kurej, koz, parsiučka. Syn Saša kaža, što traktarystu ŭ sezon pasiaŭnoj dy žniva možna zarabić dosyć dobra, a tak zarobki nievialikija — kala 2 miljonaŭ.

Alena kaža, što pa śmierci syna siamji budzie vypłočvacca peŭnaja dapamoha, dziela jakoj jana źbiraje dakumenty.

• 0
• 0
• 0
• 0
• 0
• 0
• 0
• 0