Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali
«Za kajdanki padviesili na kruk u stoli i bili šokieram, kab pryznaŭ vinu. Adnojčy ŭ «miakkim pakoi» ad ździekaŭ u jaho spyniłasia serca, ale vyklikali reanimacyju i adkačali».
U pačatku 2024 «Naša Niva» paviedamlała pra masavyja zatrymańni aficeraŭ Departamienta finansavych rasśledavańniaŭ u Minsku i Minskaj vobłaści. Antyhieroi 2020‑ha i 2021‑ha trapili pad čystki pavodle padazreńnia ŭ atrymańni chabaraŭ i pieravyšeńni słužbovych paŭnamoctvaŭ.
«Siońnia ty kantralor, […] zaŭtra — u turmu», — nieŭzabavie vykazaŭsia Łukašenka, kamientujučy ich kryminalnuju spravu.
Amal dva hady pra los hetych ludziej ničoha nie było viadoma, navat ich imiony. Pieršaje imia «Naša Niva» daviedałasia zusim niadaŭna — heta pałkoŭnik DFR Alaksandr Kijko, były načalnik haradskoha mižrajonnaha adździeła №2 upraŭleńnia DFR Kamiteta dziaržaŭnaha kantrolu pa Minskaj vobłaści.
Čytajcie taksama: Žonka adhavorvała padpałkoŭnika DFR brać chabary, a toj kazaŭ: «Atrymaju pałkoŭnika — i na piensiju». Pieršaja piensija pryjšła ŭžo na aryštancki rachunak
Adzin z surazmoŭcaŭ «Našaj Nivy» siadzieŭ ź im u adnoj kamiery SIZA KDB jakraz na starcie «spravy minskaha DFR».
Paśla publikacyi hetaj historyi nam udałosia spraŭdzić imia jašče adnaho zatrymanaha pałkoŭnika DFR, jaki siadzieŭ u tym ža samym miescy i ŭ toj ža čas — napačatku 2024‑ha — ź inšym surazmoŭcam «Našaj Nivy».
Hety čałaviek byŭ u adnoj kamiery z pałkoŭnikam Andrejem Sieŭrukom. Apošniaja viadomaja pasada — načalnik Minskaha mižrajonnaha adździeła ŭpraŭleńnia DFR.
«Amal u kožnaj kamiery SIZA KDB u toj čas siadzieła pa supracoŭniku DFR. Sieŭruk nie pryznavaŭ viny i kazaŭ mnie, što nie pryznajecca nichto ź ich, aproč adnaho. Imavierna, mieŭsia na ŭvazie jakraz Kijko (pavodle našaj raniejšaj publikacyi, toj staŭ supracoŭničać sa śledstvam — NN).
Niejak viečaram Sieŭruka padniali i ŭviali, potym viarnuli trochu nie ŭ sabie, miakka kažučy.
Potym Andrej raskazaŭ, što jaho vadzili ŭ hetak zvany «miakki pakoj» (kamiera, znutry ababitaja miakkim materyjałam, kab viazień nie moh sabie paškodzić, taksama jana nie prapuskaje huki — NN), tam jaho za kajdanki padviesili na kruk u stoli i bili šokieram. Patrabavali pryznańnia, jon adniekvaŭsia, z hetaha momantu jaho pačali asabliva mučyć.
Byvała, unačy kožnuju hadzinu ŭryvalisia ŭ kamieru, zahadvali zdymać trusy i prysiadać. Ź jahonych słovaŭ, adnojčy ad ździekaŭ u jaho spyniłasia serca tam ža, u «miakkim pakoi», jamu vyklikali reanimacyju i adkačali», — raskazaŭ nam surazmoŭca.
***
Andrej Sieŭruk naradziŭsia ŭ haradskim pasiołku Urečča Lubanskaha rajona ŭ 1977 hodzie. U struktury DFR z 1996 hoda. Pačynaŭ inśpiektaram, z 2012‑ha — načalnik mižrehijanalnaha adździeła UDFR KDK.
Žonka Sieŭruka na momant zatrymańnia muža pracavała hałoŭnaj śpiecyjalistkaj u Hałoŭnym upraŭleńni justycyi Minharvykankama.
Sužency majuć syna i dačku.
«Naša Niva» — bastyjon biełaruščyny
PADTRYMAĆCiapier čytajuć
Voś jak vyhladaje z kosmasu aśviatleńnie Minska ŭ paraŭnańni z susiednimi stalicami FOTAFAKT18
Voś jak vyhladaje z kosmasu aśviatleńnie Minska ŭ paraŭnańni z susiednimi stalicami FOTAFAKT
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1717
Kamientary