U Markava spytali, ci źjavicca ŭ krainie bolš teleprahram na biełaruskaj movie
«Nie baču sensu».
U ministra infarmacyi Marata Markava spytali nakont biełaruskamoŭnych prahram na telebačańni i prapanavali zrabić nie mienš za 45% televizijnaha viaščańnia na biełaruskaj movie.
«Niahledziačy na toje, što ŭ Biełarusi dźvie dziaržaŭnyja movy, teleprahram na biełaruskaj movie niašmat. Na asobnych telekanałach na biełaruskaj movie pieradač niama zusim. Ci mahčyma stvareńnie bolšaj kolkaści teleprahram na biełaruskaj movie? Tak, kab nie mienš za 45% usiaho televiaščańnia ažyćciaŭlałasia na biełaruskaj movie?» — spytali ŭ ministra infarmacyi.
U telehram-kanale ministerstva apublikavali jahony adkaz.
Markaŭ pahadziŭsia, što «sapraŭdy, biełaruskamoŭnych prahram na TB nie tak šmat».
«Situacyja skłałasia nie ŭčora i pakazvaje na ahulnuju situacyju ŭ hramadstvie. Nahadaju, pra što ŭžo pisaŭ u hetaj rubrycy: prytym, što bolš za pałovu hramadzian krainy zhodna z apošnim pierapisam nazvali mienavita biełaruskuju movu rodnaj, razmaŭlaje na joj — mienš za čverć nasielnictva.
Tut važna razumieć, što prosta tak uziać i skazać: «Ciapier 45% efiru budzie na movie!» — hety padychod u realijach bolš padobny da avantury», — ličyć Markaŭ.
Jon kaža, što «telekanały zarablajuć na rekłamie i aryjentujucca na zapyt hledača», a toj, kaža Markaŭ, choča ruskamoŭnaha kantentu.
«U nas niama hramadskaha telebačańnia, niama abaviazkovaha štomiesiačnaha zboru Abonament RTV za vałodańnie televizaram i zboru na smartfony, płanšety, noŭtbuki, televizary jak u Polščy i šerahu inšych jeŭrapiejskich dziaržaŭ. Telekanały zarablajuć na rekłamie i aryjentujucca na zapyt hledača. A tolki 1,1% telehledačoŭ, zhodna z sacapytańniem 2025 hoda Instytuta sacyjałohii NAN Biełarusi, addajuć pieravahu prahladu televizijnych prahram na biełaruskaj movie. Jašče tracina apytanych adznačajuć adnolkavuju stupień pieravahi jak ruskaj, tak i biełaruskaj moŭ u telekantencie. I što pakazalna, dziel teleprahladu našaha kulturnaha telekanału Biełaruś 3, dzie pieravažajuć biełaruskamoŭnyja prahramy — u siarednim 2,5%. Nie ŭličvać hetuju realnaść my prosta nie možam», — havoryć Markaŭ.
Jon kaža, što nielha «ŭciskać» ruskuju movu.
«Pryvivać luboŭ da biełaruskaj movy nieabchodna kompleksna — praz kulturu, adukacyju, infarmacyjnyja resursy. I dakładna biez najmienšaha ŭciskańnia inšaj dziaržaŭnaj movy.
Tamu Ministerstva infarmacyi bačyć svaju zadaču nie ŭ štučnym naviazvańni pracentnych suadnosin, a ŭ stymulavańni stvareńnia telekanałami jakasnaha, cikavaha i kankurentazdolnaha kantentu na biełaruskaj movie.
Nie baču sensu ŭskładniać dadzienaje pytańnie ŭ ciapierašni čas, z ulikam usiaho taho kašmaru, jaki tvorycca ŭ śviecie.
Hałoŭnaje — lubyja sproby publična dyskryminavać jakuju-niebudź ź dziaržaŭnych moŭ, hetak ža jak i lubuju inšuju nacyjanalnuju movu, demanstravać niepavahu da jaje pavinny žorstka spyniacca ŭ zarodku. Mienavita abvastreńnie moŭnych, nacyjanalnych i relihijnych pytańniaŭ časta stanovicca pryčynaj raskidańnia dziaržaŭ. A dla Biełarusi, dzie pražyvaje bolš za 150 nacyjanalnaściej, heta bolš čym aktualna», — kaža Markaŭ.
Kamientary
Apošni raz na vulicy ŭ Miensku jaje čuŭ u pačatku 2023 roku.
Zastałasia, napeŭna, chiba što ŭ kaściołach.
Navat kali sprabuješ prosta zbałansałavać 50/50, jany ŭžo kažuć pra dyskryminacyju jazyka.
Pa łohikie takich ludziej usio pavinna być pa-rasiejsku, a ludzi sami niejak pavinny da biełaruskaj pryjści.