Pryznačany dapamožny biskup Minska-Mahiloŭskaj archidyjacezii

Apostalskaja Nuncyjatura ŭ Respublicy Biełaruś paviedamlaje, što Papa Francišak pryznačyŭ dapamožnym biskupam Minska-Mahiloŭskaj archidyjacezii šanoŭnaha preźbitera Alaksandra Jašeŭskaha,

člena Salezijanskaj Kanhrehacyi (Tavarystva sv. Franciška Salskaha), jaki ŭ dadzieny momant vykonvaje abaviazki dyrektara salezijanskaj supolnaści ŭ Minsku i vikaryja parafii Sv. Jana Chryściciela ŭ Minsku, nadajučy jamu tytularnuju biskupskuju kafiedru Furnos major (Furnos maior) i skiroŭvajučy na słužeńnie ŭ Mahiloŭskuju častku archidyjacezii. 

Paviedamleńnie ab novym pryznačeńni zroblena pres-słužbaj Śviatoha Pasadu 9 červienia ŭ 12.00 pavodle rymskaha času (13.00 pavodle minskaha času) i adnačasova abvieščana Apostalskim Nuncyjem u Respublicy Biełaruś u archikatedralnym kaściole Imia Najśviaciejšaj Panny Maryi ŭ Minsku.

Paśviačeńnie novapryznačanaha biskupa adbudziecca 27 červienia u archikatedralnym kaściole Imia Najśviaciejšaj Panny Maryi ŭ Minsku.

***

Karotkaja bijahrafija novapryznačanaha biskupa:

Jaho Ekscelencyja mansieńjor Alaksandr Jašeŭski, S.D.B. naradziŭsia 6 žniŭnia 1974 h. u h. Smarhoń Hrodzienskaj vobłaści. U 1991 h. pastupiŭ u salezijanskuju duchoŭnuju sieminaryju ŭ h. Červińsk nad Visłaj (Polšča). Vyvučaŭ fiłasofiju ŭ salezijanskaj duchoŭnaj sieminaryi ŭ h. Łodź (Polšča) i teałohiju ŭ Papskim Salezijanskim Univiersitecie ŭ Rymie, dzie atrymaŭ stupień licencyjata dahmatyčnaj teałohii. U 1998 h. skłaŭ viečnyja manaskija abiacanni ŭ Salezijanskaj Kanhrehacyi. Preźbiterskaje paśviačeńnie pryniaŭ u 2000 h. u h. Smarhoń.

Zajmaŭ pasadu administratara parafii ŭ v. Baruny, potym u v. Žodziški, vykonvajučy adnačasova abaviazki vikaryja parafii ŭ h. Smarhoń. Z 2001 h. pa 2002 h. vykonvaŭ abaviazki dyrektara salezijanskaj supolnaści ŭ p. Akciabrski Maskoŭskaj vobłaści i byŭ adkaznym za salezijanski prenavicyjat. Paśla viartańnia ŭ Biełaruś zajmaŭ pasadu administratara parafii ŭ v. Župrany. U pieryjad 2003-2005 hh. byŭ sakratarom Śpiecyjalnaj Akruhi Salezijanskaj Kanhrehacyi (Uschodnie-Jeŭrapiejskaj) ź siadzibaj u h. Maskva. Z 2005 h. pa 2008 h. zajmaŭ pasadu dyrektara salezijanskaj supolnaści ŭ h. Minsk; z 2005 h. pa 2011 h. byŭ adkaznym za salezijanski aratoryj u h. Minsk. Z 2005 h. pa 2010 h. byŭ inśpiektaryjalnym daradcam Śpiecyjalnaj Akruhi Salezijanskaj Kanhrehacyi ź siadzibaj u h. Maskva. Z 2005 h. pa 2010 h. byŭ staršynioj katechietyčnaha adździeła Minska-Mahiloŭskaj archidyjacezii, vykonvajučy adnačasova abaviazki vikaryja parafii ŭ h. Minsk. U pieryjad 2006-2010 hh. byŭ členam katechietyčnaj kamisii pry Kanfierencyi Katalickich Biskupaŭ u Biełarusi. U 2011 h. byŭ pryznačany dyrektaram salezijanskaj supolnaści ŭ h. Smarhoń; vykonvaŭ abaviazki vikaryja parafii ŭ h. Smarhoń. Z 2011 h. źjaŭlajecca adkaznym za salezijanski prenavicyjat dla hramadzian Biełarusi. Z 2013 h. zajmaje pasadu vikaryja i ekanoma Inśpiektaryjalnaj Delehatury Varšaŭskaj Salezijanskaj Inśpiektoryi sv. Stanisłava Kostki.

U 2014 h. pryznačany dyrektaram salezijanskaj supolnaści ŭ Minsku i vikaryjem parafii.

Źjaŭlajecca vykładčykam dahmatyčnaj teałohii ŭ Teałahičnym kaledžy Minska-Mahiloŭskaj archidyjacezii.

Vałodaje biełaruskaj, ruskaj, polskaj i italjanskaj movami.

• 0
• 0
• 0
• 0
• 0
• 0
• 0
• 0