Pryniaty Zakon ab alternatyŭnaj słužbie: z vyšejšaj adukacyjaj buduć słužyć 2 hady, biez vyšejšaj — 3
Jaho asnoŭnyja pałažeńni ŭstupajuć u siłu z 1 lipienia 2016 hoda. Pra heta paviedamlaje Nacyjanalny centr pravavoj infarmacyi Respubliki Biełaruś.
Vybrać alternatyŭnuju słužbu zmohuć tyja, chto nie moža nasić zbroju z-za relihijnych pierakanańniaŭ.
Jany buduć prachodzić słužbu ŭ arhanizacyjach achovy zdaroŭja, sacyjalnaj śfiery, žyllova-kamunalnaj, sielskaj i lasnoj haspadarki, u arhanizacyjach, jakija zajmajucca dobraŭparadkavańniem terytoryj, budaŭnictvam i ramontam daroh i čyhunačnych šlachoŭ, pry likvidacyi stychijnych i technahiennych biedstvaŭ.
Dla zamieny vajskovaj słužby na alternatyŭnuju treba nie paźniej čym za 10 dzion da kanca pryzyvu źviarnucca ź piśmovaj zajavaj u pryzyŭnuju kamisiju.
Heta zajava budzie razhledžana na pasiadžeńni pryzyŭnoj kamisii ŭ prysutnaści zajaŭnika. Akramia taho, na takoje pasiadžeńnie mohuć być zaprošany «pradstaŭniki relihijnych i inšych arhanizacyj, inšyja hramadzianie, jakija mohuć dać tłumačeńni pa sutnaści zajavy». Kali pryzyŭnaja kamisija paličyć padstavy dastatkovymi, jana dazvolić prajści alternatyŭnuju słužby zamiest zvyčajnaj.
Arhanizacyju, u jakoj hramadzianin budzie prachodzić alternatyŭnuju słužbu, a taksama datu pačatku prachodžańnia alternatyŭnaj słužby budzie vyznačać Ministerstva pracy i sacyjalnaj abarony.
Asoby z vyšejšaj adukacyjaj buduć słužyć 24 miesiacy, biez vyšejšaj adukacyi — 36 miesiacaŭ.
Alternatyŭnikam buduć płacić 150% ad najbolšaj vieličyni biudžetu pražytačnaha minimumu ŭ siarednim na dušu nasielnictva (pamier BMP na siońnia składaje 1 474 870 rubloŭ, tamu alternatyŭnik budzie atrymlivać kala 2,1 miljona). Z 13-ha miesiaca słužby ŭtrymańnie pavyšajuć na 20% biudžetu pražytkovaha minimumu, z 25-ha miesiaca — na 40%.
Zakon zabaraniaje «alternatyŭnikam» brać udzieł u zabastoŭkach, zajmacca paralelna inšaj apłatnaj dziejnaściu ci pracaj, ažyćciaŭlać pradprymalnickuju dziejnaść.
Zvalniajuć z alternatyŭnaj słužby pa chvarobie (u vypadku pryznańnia nieprydatnymi da vajennaj słužby ŭ mirny čas) abo ŭ vypadku pazbaŭleńnia voli.
Kamientary