Juryj Varoniežcaŭ: Jadziernyja mohilniki niebiaśpiečniejšyja, čym sama AES

2 červienia Saviet Ministraŭ Biełarusi zaćvierdziŭ stratehiju abychodžańnia z radyjoaktyŭnymi adchodami Biełaruskaj atamnaj elektrastancyi.

Na praciahu terminu ekspłuatacyi atamnaj elektrastancyi (60 hadoŭ) prahnazujecca ŭtvareńnie 9360 kub. m ćviordych radyjoaktyŭnych adchodaŭ roznych katehoryj i 60 kub. m vysokaaktaŭnych radyjoaktyŭnych adchodaŭ.

Z ulikam čakanych abjomaŭ utvareńnia radyjoaktyŭnych adchodaŭ isnuje abjektyŭnaja nieabchodnaść stvareńnia punkta ich pachavańnia. Raspracavanym dla jaho budaŭnictva prajektam budzie praduhledžvacca vykarystańnie sučasnych techničnych rašeńniaŭ. Abjom finansavych srodkaŭ dla budaŭnictva punkta pachavańnia radyjoaktyŭnych adchodaŭ, acenka jakoha praviedziena pa košcie zbudavańnia anałahičnaha abjekta — mohilnika radyjoaktyŭnych adchodaŭ Ihnalinskaj atamnaj elektrastancyi ŭ Litvie — składaje kala $60 młn, adnak kančatkovaja ličba budzie vyznačanaja pa vynikach raspracoŭki adpaviednaha prajekta.

Pražekty kiraŭnictva Biełarusi «Biełaruskaja praŭda» paprasiła prakamientavać fizika, kandydata techničnych navuk, adkaznaha sakratara Kamisii Viarchoŭnaha Savieta SSSR pa rasśledavańni pryčyn avaryi na ČAES i acency dziejańniaŭ słužbovych asob u paślaavaryjny pieryjad Juryja Varoniežcava.

«U Biełarusi niama kadraŭ dla raspracoŭki zhadanaj stratehii, roŭna jak i dla ekspłuatacyi AES.

Adchodaŭ utvarajecca značna bolš, čym praduhledžvaje stratehija: tolki ćviordych, nie ličačy vyhružanych TVZ (ciepłavydzialalnyja zborki, jakija składajucca z CVEŁaŭ — ciepłavydzialalnych elemientaŭ; CVEŁy ŭjaŭlajuć saboj cyrkonijevyja trubki, nabityja tabletkami z dyjaksidam uranu) — kala 320 kubamietraŭ štohod. Vadkich radyjeaktyŭnych «zmyvak» — tony.

Paśla pierapracoŭki vadkich radyjoaktyŭnych adchodaŭ (VRA) na ustanoŭkach śpiecvodaačystki ŭtvarajecca da 50 ton solaŭ u hod (u asnoŭnym, natryju) u vyhladzie radyjoaktyŭnych vysokaminieralizvanych rastvoraŭ z soleŭtrymańniem 200-300 h/ł. Taksama da VRA naležać adpracavanyja ionaabmiennyja materyjały i sarbienty. Asnoŭny ŭkład u radyjoaktyŭnaść adchodaŭ unosiać 134Cs i 137Cs (70-90%), układ 90Sr, 90Y, 60Co, 58Co, 54Mn, 51Cr, 59Fe i 124Sb značna mienšy. Taksama ŭkład u niekalki adsotkaŭ ŭnosić utrymańnie trycija.

I ŭsio heta zachoŭvajecca ŭ asnoŭnym na terytoryi AES», — kaža Juryj Varoniežcaŭ.

Vučony śćviardžaje, što «adpracavanyja TVZ nikudy nie paviazuć». «Jany zachoŭvajucca na terytoryi ŭ śpiecyjalnych basiejnach (ich mianiajuć raz u 3-4-5 hadoŭ u zaležnaści ad reaktara i nahruzki: novyja zahružajuć, a adpracavanyja źmiaščajuć u basiejn z vadoj na niekalki hadoŭ).

Jadziernyja mohilniki niebiaśpiečniejšyja, čym sama stancyja. Pačytajcie, što adbyłosia z takim schoviščam ŭ Pakšy. Dy i ŭ Fukusimie», — kaža fizik.

«Avantura — niebiaśpiečnaja, durnaja i vielmi darahaja. Źjaŭleńnie hetaha abjekta na našaj ziamli — heta poŭny absurd. I tolki kruhły idyjot moža vitać budaŭnictva i AES, i jadziernaha mohilnika. Ja razhladaju ŭsiu hetuju badziahu jak złačynstva», — reziumavaŭ Juryj Varoniežcaŭ.

• 0
• 0
• 0
• 0
• 0
• 0
• 0
• 0