MUS Biełarusi: Biežancam z Danbasa davodzicca tłumačyć, što nielha pić piva na dvary i pierachodzić na čyrvonaje śviatło

Złačynnaść siarod ukraincaŭ, jakija znachodziacca ŭ Biełarusi, vyrasła amal na 30%, paviedamiŭ na pres-kanfierencyi 18 červienia ŭ Minsku načalnik departamienta pa hramadzianstvie i mihracyi MUS Alaksiej Biahun.

Pavodle jaho słoŭ, uvohule złačynnaść zamiežnych hramadzian na terytoryi Biełarusi składaje 1,2% ad ahulnaj kolkaści ŭčynienych złačynstvaŭ u krainie. «Heta nie takaja značnaja ličba, jak u niekatorych rehijonach Rasii, dzie jana dachodzić da 20%, abo ŭ niekatorych krainach Jeŭrapiejskaha sajuza — da 50%», — kanstatavaŭ pradstaŭnik MUS.

Pry hetym u pravaachoŭnych orhanach pryznajuć isnavańnie prablemy z pavodzinami ŭkrainskich hramadzian na terytoryi Biełarusi.

Pavodle słoŭ Biehuna, asablivaści pavodzinaŭ ukraincaŭ, jakija prybyli ŭ Biełaruś, «źviazanyja ź ich mientalitetam, z paniaćciem svabody, paradku, jakija zakładvalisia ŭ ich mientalitecie z pryčyny peŭnych akaličnaściaŭ».

«Kali ŭkraincy prybyvajuć na terytoryju Biełarusi, jany, asabliva na pieršym etapie, nie razumiejučy, što značyć žyć zhodna z peŭnymi zakonami, praviłami, što zakony i praviły nichto nie pavinien parušać, što piva na vulicy pić nielha, sprabujuć zaćvierdzić svoj maleńki śviet, jaki jany pieranieśli abo sprabujuć siudy pieranieści, sprabujuć navat piedalavać jaho, uździejničać na pravaachoŭnyja orhany, — zaznačyŭ Biahun. — U pryvatnaści, kab my nie prymali rašeńni ab ich departacyi, tamu što jany prybyli z zony kanfliktu, kab my zapluščvali vočy na ich drobnyja pravaparušeńni, tamu što jany nie viedali patrabavańniaŭ zakanadaŭstva».

Pradstaŭnik MUS paviedamiŭ, što kožny ŭkrainiec, jaki źviartajecca ŭ padraździaleńni pa hramadzianstvie i mihracyi, zapaŭniaje apytalny list, i supracoŭnik milicyi jamu raskazvaje pa punktach, na što treba źviarnuć uvahu pry znachodžańni na terytoryi Biełarusi. Jamu navat tłumačać, što vulicu na čyrvonaje śviatło pierachodzić nielha.

«Rastłumačeńniami, mierami prymusu — vysyłkaj i departacyjaj peŭnaj katehoryi asob — my sprabujem choć niejak kantralavać situacyju. Nie mahu skazać, što jana mocna vyjšła z-pad kantrolu. Byli bytavyja kanflikty, kanflikty na hlebie roznych palityčnych pohladaŭ», — dadaŭ Biahun.

Jak paviedamlałasia raniej, za apošnija paŭtara hoda ŭ Biełaruś z-za vajennaha kanfliktu va Ukrainie prybyli bolš jak 100 tys. hramadzian hetaj krainy.

• 0
• 0
• 0
• 0
• 0
• 0
• 0
• 0