Ułady Armienii pajšli na sastupki pratestoŭcam, ale tyja nie razychodziacca
Členy kaardynacyjnaj hrupy «Nie rabunku» vyrašyli praciahvać akcyju pratestu suprać padaražeńnia elektraenierhii na praśpiekcie Bahramiana, niahledziačy na zajavu prezidenta Armienii Sierža Sarhsiana.
U subotu Sarhsian zajaviŭ, što ŭrad Armienii voźmie na siabie ŭvieś ciažar, źviazany z pavyšeńniem taryfaŭ na elektraenierhiju da atrymańnia vynikaŭ aŭdytu kampanii «Elektrasietki Armienii». Sumy, pavodle jaho słoŭ, buduć znojdzienyja sa srodkaŭ, praduhledžanych na dalejšaje ŭmacavańnie biaśpieki.
Damoŭlenaść ab praviadzieńni aŭdytu ŭ kampanii «Elektryčnyja sietki Armienii» (daččynaj kampanii INTER RAO JEES) była dasiahnuta napiaredadni na sustrečy prezidenta Armienii z sustaršynioj armiana-rasijskaj mižuradavaj kamisii, ministram transpartu RF Maksimam Sakałovym.
Arhanizatary akcyi vyjšli da prysutnych i zajavili, što ludziam chočuć «padkłaści pad hałavu miakkuju padušku» i što jany buduć praciahvać damahacca admieny rašeńnia, pakolki ŭrad sprabuje vyrašyć prablemu za košt biudžetu, «jaki naležyć narodu».
Člen kaardynacyjnaj hrupy «Nie rabunku» Vahinak Šušanian zajaviŭ, što mitynh praciahniecca da poŭnaj admieny rašeńnia ab pavyšeńni taryfaŭ.
U zajavie kiraŭnika dziaržavy adznačajecca, što kali taryf nie padvysicca, to enierhietyčnaja sistema apyniecca pierad pahrozaj razbureńnia pa efiekcie damino.
Paśla viestki ab rašeńni mitynhoŭcy spačatku pačali śviatkavać pieramohu, ale praź niekalki chvilin ich nastroi źmianilisia. Jany stali skandavać «My zastajemsia» i «Admiena».
Načalnik palicyi Uładzimir Hasparan vykazaŭ nadzieju, što ŭsio budzie ŭ ramkach zakona. «Ja liču, što naš narod — razumny i mudry, asabliva moładź. I jany ŭsio dobra ŭsprymajuć», — padkreśliŭ jon.
Kažučy pra toje, što častka mitynhoŭcaŭ nie ličyć, što dadzienaje rašeńnie adpaviadaje ich patrabavańniam, načalnik palicyi zajaviŭ, što nastaŭ čas, kali iścina vyjdzie na pavierchniu, i stanie jasna, chto na samaj spravie zmahaŭsia, a chto pryjšoŭ na praśpiekt Bahramiana, kab niešta «znajści ŭ kałamutnaj vadzie».
Ciapier čytajuć
Što viadoma pra byłoha palitviaźnia Sakałoŭskaha, jaki pamior u Bierlinie ŭ 47 hadoŭ1
Kamientary