Apošnim časaŭ babroŭ u Biełarusi paboleła, i jany svaim isnavańniem pačali škodziać mielijarataram, sielskaj haspadarcy i navat mižnarodnym stasunkam. Metady zmahańnia z babrami raspracoŭvajucca na dziaržaŭnym uzroŭni. Trubapravod u babrovaj chatcy — samy humanny.
Apošnim časam tema babroŭ pieryjadyčna «ŭspłyvaje» na staronkach i ŭ efiry srodkaŭ masavaj infarmacyi. Pryhadać choć by niadaŭni vypadak, kali babry pieraharadzili zaprudaj raku Kotra ŭ Ščučynskim rajonie. Jana była zbudavana krychu nižej viarchoŭja raki, dzie zakančvajecca biełaruski zakaznik i pačynajecca litoŭski zapaviednik.
Pryhadvać čaściej babra stali tamu, što za apošni čas u krainie jaho kolkaść značna pavialičyłasia. Naprykład, u 2006 hodzie ŭ palaŭničych uhodździach było ŭličana 52,4 tysiačy asobin, u toj čas jak zdabyta za ŭvieś hod było tolki 413 račnych babroŭ.
My ŭžo pisali raniej, što, pavodle źviestak ź miescaŭ, babry nanosiać značny ŭron sielskaj i lasnoj haspadarcy: mielijaracyjnyja kanały, zasielenyja imi, nie zabiaśpiečvajuć narmatyŭnaha skidvańnia vady z asušanych sielskahaspadarčych ziamiel, što viadzie da ich zabałočvańnia i, jak vynik, znižeńnia ŭradžajnasci ci navat poŭnaha vyvadu ziamiel z abarotu. Istotny ŭron nanosicca i ŭčastkam lasnoha fondu ŭ suviazi z zasialeńniem babrami lesamielijaracyjnaj sietki. U suviazi z takoj situacyjaj, što skłałasia, toj ža Minlashas paličyŭ nieabchodnym istotna pavialičyć abjomy zdabyčy babra ŭ lesapalaŭničych haspadarkach lashasaŭ, hałoŭnym čynam u tych miescach, dzie žyviołami moža być naniesieny abo ŭžo nanosicca ŭron sielskaj i lasnoj haspadarcy. Byli raspracavany płany pa zdabyčy račnoha babra ŭ palaŭničych haspadarkach krainy. Adnak pa šerahu abjektyŭnych i subjektyŭnych pryčyn raspačataja sprava akazałasia nie takoj užo i lohkaj.
— Ciapier raspracoŭvajucca rekamiendacyi dla asobnych abjektaŭ, dzie ŭron ad dziejnasci babroŭ najbolš značny. U pryvatnasci, jość płany dazvolić razburać ich płaciny ŭ nadziei na toje, što paśla hetaha žyvioliny pakinuć peŭnaje miesca, — havoryć namiesnik načalnika ŭpraŭleńnia palaŭničaj haspadarki Ministerstva lasnoj haspadarki Viktar Karohvič. — Na praciahu hoda płanujem taksama dasłać karystalnikam rekamiendacyi, što vykarystoŭvajucca ŭ zachodnich krainach. Kali koratka, ich sutnaść u nastupnym: u płacinu ŭstaŭlajucca śpiecyjalnyja vyhnutyja truby ź miakkaha materyjału, jany buduć znachodzicca na vyznačanaj vyšyni. I kolki b potym babry ni naroščvali jaje, płacinu, vada nie budzie ŭznimacca vyšej za niejkuju krytyčnuju dla navakolla adznaku, a budzie pieralivacca na druhi bok płaciny. Nie zbirajemsia admaŭlacca i ad zdabyčy babroŭ. Pakolki płany vialikija, treba, kab palaŭničyja prajšli atestacyju, zdali ekzamieny: jak zdabyvać, jak stavić pastki. Zaraz zdabyča viadziecca na padstavie razavych dazvołaŭ, ale, kab adłavić babra, palaŭničaha pavinien abaviazkova supravadžać jehier, inakš palavańnie budzie ličycca niezakonnym. Heta nie vielmi zručna i, mahčyma, nie zaŭsiody apraŭdana. Tamu ŭ nastupnym hodzie, vierahodna, budziem sprabavać unosić źmianienni, dapaŭnienni ŭ Praviły viadzieńnia palaŭničaj haspadarki i palavańnia.
Nahadajem, što ŭvosień minułaha hoda zacikaŭlenaść u zdabyčy babroŭ u Biełarusi vykazała RUP «Biełmiedpreparaty». Jano vyrablaje preparat «Kasalin» z suchoha babrynaha strumieniu. Na ajčynnym rynku niama pastaŭščykoŭ hetaha vidu syraviny i jaje davodzicca zakuplać u Rasijskaj Fiederacyi. Hadavaja patreba vytvorčasci ŭ babrynym strumieni składaje 360 kiłahramaŭ ahulnym koštam 90 tysiač dołaraŭ ZŠA.
— Zacikaŭlenaść našaj prapanovaj vykazali praktyčna z usich rajonaŭ — ad prostych palaŭničych da lashasaŭ, — paviedamili redakcyi ŭ RUP «Biełmiedpreparaty». — My prapanavali canu ŭ 250 dołaraŭ za adzin kiłahram suchoha babrynaha strumieniu, razasłali mietodyki pa jaho zbory i sušcy. Niejkich kankretnych vynikaŭ pakul niama. Pa‑pieršaje, licenzija na zdabyču babra kaštuje hrošaj, a kab atrymać toj samy kiłahram strumieniu, treba zdabyć kala 20 babroŭ. Vychodzić, palaŭničamu heta niavyhadna. Da taho ž praces zdačy treba zrabić centralizavanym jak minimum na ŭzroŭni rajona, pakolki pracavać z kožnym asobna ŭziatym palaŭničym nierealna (dy i šerah abaviazkovych dakumientaŭ ź jaho boku patrabujecca). Z inšaha boku, sušycca babryny strumień na praciahu hoda i pach u jaho davoli śpiecyfičny, u kvatery heta rabić naŭrad ci budzieš. A voś u palaŭničych haspadarkach, nie vyklučana, zacikaviŭšysia našymi prapanovami, mahli i raspačać zbor i sušku. Ale pra niejkija vyniki my daviedajemsia tolki prykładna praz hod.
Kamientary