«Idzi adsiul, piataja kałona!» – jak u centry Minska kamunisty źbirajuć podpisy za Łukašenku pad ściaham SSSR
Čarhovy pikiet ŭ padtrymku dziejučaha kiraŭnika krainy byŭ zaŭvažany la HUMa. Ździviła tolki, što pobač ź ciapierašnim dziaržaŭnym ściaham łunaŭ jašče i saviecki, čyrvony ź siarpom i mołatam.
Vyśvietliłasia, što ŭ pikiecie stajać pradstaŭniki Kamunistyčnaj partyi Biełarusi – Andrej Ćvirko i Uładzimir Chinievič.
Na pytańnie, što na vulicach Minska robić ściah SSSR, jany adkazali tak:
«Heta historyja. 70 hadoŭ historyi nikudy nie vykinieš. I za 70 hadoŭ tut zrabili ź sialanskaj krainy industryjalnuju. Usie harady pabudavali. A kazać pra canu heta biessensoŭna, bo paŭsiul cana jość, i ŭ Amierycy, i Francyi…»
Praŭda, dalej dyjałoh atrymaŭsia dziŭnavatym.
«NN»: «A źniščeńnie biełaruskaj intelihiencyi, heta što, adekvatnaja cana?»
Ćvirko: «Vy viedajecie, nielha skazać, što ŭ Savieckim Sajuzie nie było biełaruskaj intelihiencyi i nie vydavalisia knihi na biełaruskaj movie…»
«NN»: «Vy nie adkazvajecie na pytańnie. Źniščeńnie intelihiencyi – adekvatnaja cana za industryjalizacyju?»
Ćvirko: «Ja vam skažu tak, była baraćba. Biełyja rasstrelvali čyrvonych, a banderaŭcy vyrazali staršyniaŭ rajonaŭ».
«NN»: «Kali? Jakija banderaŭcy? Ja pytajusia pra źniščeńnie intelihiencyi».
Ćvirko: «Ja nie kažu, što heta adekvatnaja cana. Ja nie kažu, što hetaje źniščeńnie było».
«NN»: «To bok, nie było?»
Ćvirko: «Ja liču, što nie».
Zatym ja zaŭvažyŭ na papiercy adnaho ź ich rukapisnuju paznaku: «NOD [Nacyjanalna-vyzvolny ruch] Biełaruś. YouTube». Sproba sfatahrafać jaje vyklikała abureńnie. Kamunisty adrazu pierajšli na «ty» i paraili mnie «iści adsiul», bo ja naležaŭ da «sapsavanaha pakaleńnia». Vyśvietliłasia, što kali ja nie padpisvajusia za Łukašenku, dyk ja nie mahu i pić vadu (svaju!) pad ich parasonam.
«Idzi adsiul, piataja kałona! Nadakučyła ŭžo z vami razmovy vieści!» – paraiŭ mnie zborščyk podpisaŭ kamunist Andrej Ćvirko.
Kamientary