Były ministr prosić za katedž u Drazdach $1 400 000 + FOTY interjeraŭ
Viktar Hałavanaŭ sprabuje abnajavić «bonus», atrymany ad dziaržavy.
Kolki kaštuje elitnaje žyllo biełaruskich čynoŭnikaŭ u Drazdach? Ryełtary nie dajuć arhumientavanaha adkazu na hetaje pytańnie, rajačy ličyć ad $1 miljona.
Ministraŭ možna ličyć miljanierami, adnak za apošnija hady nichto z sotni łukašenkaŭcaŭ, jakim vydali ziamlu ŭ Drazdach i Viaśnincy, nie abmianiaŭ svoj «bonus» na žyvyja hrošy.
Byłaja staršynia Nacbanka Nadzieja Jermakova sprabavała zdać adzin sa svaich asabniakoŭ u arendu (padrabiaznaści ŭ №31 ad 19 žniŭnia 2015 hoda — «Nadzieja Jermakova zdavała katedž u Drazdach za $6 tysiač»), ale, najchutčej, marna.
I voś źjaviŭsia pieršy achvotny atrymać poŭny košt katedža. Na sajtach ahienctvaŭ nieruchomaści źjaviłasia abjava ab prodažy doma na Cichim zavułku za $1,4 miljona. I heta za adzin z samych maleńkich, ścipleńkich katedžaŭ u Drazdach!
Haspadar doma — vykładčyk mižnarodnaha prava Biełaruskaha instytuta pravaznaŭstva (BIP) Siarhiej Hałavanaŭ. Elitnaja nieruchomaść dastałasia jamu ŭ padarunak ad baćki, byłoha ministra justycyi Viktara Hałavanava. Ciapier adstaŭny čynoŭnik pracuje rektaram u tym samym BIPie.
Zrešty, pierapisvać elitnuju nieruchomaść na svajakoŭ — niaredkaja praktyka dla čynoŭnikaŭ paśla sychodu z pasady.
Zdymki, dałučanyja da abjavy, dazvalajuć ubačyć, jak vyhladaje katedž ministra ŭnutry.
Hości Hałavanavych traplajuć u prastorny choł (30 m2). Adtul razychodziacca dźviery ŭ haścinuju (39 m2), žyły pakoj (22 m2) i haraž (32 m2). Taksama ŭnizie znachodziacca kuchnia (20 m2), harderobnaja (8 m2), sanvuzieł i topačnaja. Praz šklanyja dźviery možna vyjści ŭ dvor z dvuch bakoŭ doma.
Kali ŭźniacca pa draŭlanaj leśvicy na mansardny pavierch, apyniešsia ŭ čarhovym chole (40 m2). Vakoł jaho try žyłyja pakoi (kala 20 m2 kožny), jašče adna harderobnaja i jašče dva sanvuzły.
Interjery vyhladajuć prostymi. Na ścienach raźviešanyja karciny i niejkija hramaty. Nad pracoŭnym stałom — darts.
Vid z bałkona taksama nie ŭražvaje, susiednija katedžy stajać uščylnuju. Zatoje možna vitacca sa staršynioj CVK Lidzijaj Jarmošynaj, jakaja žyvie nasuprać.
Ahulnaja płošča doma składaje 267 m2, heta niamnoha ŭ paraŭnańni z susiedziami. Kali pieraličyć zapytanuju Hałavanavym canu na kvadratnyja mietry, atrymlivajecca $5235 za m2.
U kamplekcie idzie jašče i ŭčastak (mienš za 10 sotak), ale farmalna jon nie znachodzicca va ŭłasnaści Hałavanava. Siamja byłoha ministra vałodaje im na pravie pažyćciovaha spadčynnaha vałodańnia.
Kali žyć na siaredni biełaruski zarobak i spłačvać padatki, na katedž byłoha ministra daviadziecca aščadžać 330 hadoŭ.
Za jakija zasłuhi Hałavanaŭ atrymaŭ elitnaje žyllo? Jon uznačalvaŭ ministerstva ŭ 2001—2011 hadach. Za hety čas u krainie nie zarehistravali nivodnuju novuju palityčnuju partyju, likvidavali sotni hramadskich arhanizacyj. Była ŭviedziena kryminalnaja adkaznaść za «dziejnaść ad imia niezarehistravanaj arhanizacyi». Advakaty, jakija abaraniali ŭdzielnikaŭ Płoščy-2010, atrymali voŭčyja bilety i byli vykinutyja z prafiesii.
Za heta Hałavanaŭ patrapiŭ u čorny śpis Jeŭrasajuza. «Heta, kaniečnie, niepryjemna dla našaj krainy i ludziej, suprać jakich uviedzienyja sankcyi», — zajaviŭ jon i davodziŭ, što rašeńnie Jeŭrasajuza — «pazapravavoje».
Pradaŭšy dom u Drazdach, Hałavanaŭ na vulicy nie zastaniecca. Jašče z 1990-ch u jaho była prastornaja trochpakajoŭka ŭ «čyrvonym domie» na vulicy Maksima Tanka. Jaje ciapierašniaja cana — kala 110 tysiač.
***
Viktar Hałavanaŭ
Naradziŭsia ŭ 1952 u Barysavie. Skončyŭ jurydyčny fakultet BDU (1979), Instytut palitałohii i sacyjalnaha kiravańnia KPB (1991). Kandydat jurydyčnych navuk.
U 1980—1987 byŭ na partyjnaj pracy, u 1987—1988 — kiraŭnik adździeła justycyi Mahiloŭskaha abłvykankama. U 1988—1992 — instruktar dziaržaŭna-pravavoha adździeła CK KPB, načalnik adździeła, namieśnik načalnika ŭpraŭleńnia Ministerstva justycyi Biełarusi. U 1992—1995 — namieśnik staršyni Dziaržaŭnaha patentnaha viedamstva. U 1995—1996 — člen Minskaj haradskoj kalehii advakataŭ.
U 1996—2000 — namieśnik, pieršy namieśnik ministra justycyi. U 2000—2001 — načalnik Hałoŭnaha dziaržaŭna-pravavoha ŭpraŭleńnia Administracyi prezidenta. U 2001—2011 — ministr justycyi.
Ciapier — rektar Biełaruskaha instytuta pravaznaŭstva.
Žanaty. Maje dvaich dziaciej.
Kamientary