Babuli prymusili čałavieka admovicca ad šmatžonstva
Bo jany doŭha žyvuć — treba ž kamuści kłapacicca pra ŭnukaŭ.
Hrupa antrapołahaŭ pad kiraŭnictvam Kirsten Choŭks z univiersiteta štat Juta (ZŠA) sfarmulavała hipotezu adnosna ŭpłyvu žančyn stałaha vieku na ŭtvareńnie manahamnaj siamji ŭ prodkaŭ čałavieka i apublikavała jaje ŭ časopisie PNAS.
Kali razam z babulaj dolej žyvie dziadula, jon pačnie zahladacca na maładych žančyn. Navukoŭcy miarkujuć, što heta prymusiła maładych mužčyn nie šukać jak maha bolš partnioraŭ, a baranić adnosiny z adnym partnioram. U hetym «vinavaciać» babul: jany karysnyja, dy repraduktyŭnaj funkcyi nie majuć.
Svaju hipotezu daśledčyki pravieryli na kampjutarnaj madeli žyćcia hrupy prymataŭ ź vialikaj dolaj babul.
Žančyny mohuć pražyć davoli doŭha paśla taho, jak straciać repraduktyŭnuju funkcyju. Heta karysna dla čałaviečaha rodu z punktu hledžańnia evalucyi: jany dapamahajuć dahladać svaich unukaŭ, dajučy im bolš šancaŭ na vyžyvańnie. Čym bolš u čałaviečym rodzie stanaviłasia babul, jakija hadujuć unukaŭ, tym dolšym stanaviŭsia viek usich — i dziadul u tym liku.
Ale mužčyny dolej nie hublajuć repraduktyŭnuju funkcyju. Jany chočuć razmnažacca navat u stałym vieku. Dy čym bolšaja ŭ hrupie dola babul pa-za repraduktyŭnym uzrostam, tym bolšaja kankurencyja za žančyn, jašče zdolnych dać naščadkaŭ.
Kankurencyja prymusiła mužčyn nie marnavać čas na pošuk dadatkovych partnioraŭ, a achoŭvać ad kankurentaŭ svajho partniora. Chacia heta samo pa sabie nie jość siamjoj u sučasnym razumieńni, heta padšturchnuła čałaviectva da ŭtvareńnia manahamnych par.
Praŭda, praź vialikuju kolkaść babul i kankurencyju za maładych samak mužčyny stali stavicca da žančyn jak da majomaści — heta možna zaŭvažyć dahetul u prymityŭnych čałaviečych hramadstvach.
Kamientary