Rasija i Biełaruś na vystavie Russia Arms Expo ŭ Nižnim Tahile padpisali kantrakt na pastaŭku partyi BTR-82A u biełaruskija Uzbrojenyja siły. Pra heta paviedamiŭ pieršy namieśnik načalnika ŭzbrajeńnia Uzbrojenych sił Biełarusi hienierał-major Siarhiej Simanienka.
«My z rasijskim bokam siońnia padpisali kantrakt na pastaŭku va Uzbrojenyja siły našaj respubliki samych sučasnych braniravanych mašyn BTR-82A», — skazaŭ jon.
Simanienka udakładniŭ, što hetyja mašyny pastupiać u suchaputnyja častki biełaruskich US u 2016 hodzie. «Hetyja mašyny dazvalajuć vyrašać šyroki śpiektr zadač z vysokaj efiektyŭnaściu, tamu naša armija vielmi ŭ ich zacikaŭlena», — rastłumačyŭ hienierał.
Raspracoŭkaj i stvareńniem hetych uzoraŭ uzbrajeńnia ŭ Rasii zajmajecca Vajenna-pramysłovaja kampanija, jakaja, u pryvatnaści, vyrablaje bronietransparciory novaha pakaleńnia «Bumieranh». Raniej krynica ŭ rasijskim abaronna-pramysłovym kompleksie paviedamiła TASS, što pa kantrakcie Biełarusi budzie pastaŭlena bolš za 10 mašyn.
BTR-82A — heta prajekt hłyboka madernizavanaha bronietransparciora BTR-80, pryniaty na ŭzbrajeńnie ŭ 2010 hodzie. Mašyna atrymała novy bajavy modul z 30-milimietrovaj aŭtamatyčnaj harmataj, jakaja zdolnaja vieści ahoń jak na naziemnych, hetak i pa pavietranych celam, i 7,62 mm kulamiotam.
Zvyčajna BTR-82A kamplektujucca dyzielem 300 k.s. vytvorčaści KAMAZa. Chutkaść ruchu pa šašy — da 80 km/h. Zajaŭleny motaresurs mašyny — 50.000 km da kapitalnaha ramontu. Masa — 16 t.
U 2012 hodzie papiaredniuju madyfikacyju mašyny BTR-82 kuplaŭ Kazachstan.
Ciapier čytajuć
Jak u halečy śpivałasia radnia Łukašenki? Małaviadomyja fakty48
Kamientary