U Minsku 15-hadovaja liceistka vykinułasia z bałkona, pakinuŭšy pieradśmiarotnuju zapisku Ukantakcie na biełaruskaj movie
U Minsku na praśpiekcie Niezaležnaści ŭ subotu, 3 kastryčnika, 15-hadovaja dziaŭčyna ź liceja BDU vykinułasia z bałkona 12-ha paviercha. Naviersie jana akuratna skłała abutak i sumku. Zahadzia dziaŭčyna napisała pieradśmiarotnuju zapisku na svajoj staroncy u vk.com i vykłała videa ŭ akaŭncie Instahram. Zapisku dahetul možna pračytać, videa ŭžo źnikła.
Dziaŭčyna napisała zapisku na biełaruskaj movie:
«Ludzi, byvaje, pamirajuć/hinuć/zabivajucca. Mnie prosta ciažka žyć u hetaj sistemie siabie. Ja viedaju, što jana parušycca. Nie siońnia, dyk zaŭtra, praz tydzień, miesiac, tysiačahodździe. Kali Vy nie ŭpeŭnieny, što možacie dać dzicionku adekvatnyja ŭmovy žyćcia, to zrabicie abort. Ja radaja, što sychodžu zaraz. Ja nie nastolki staraja. Staraja, kaniečnie. Ale ž mnie nie 80, što vielmi dobra. Ja šmat čaho nie paśpieła, ale chiba možna ŭ žycci usio paśpieć? Niedaskazanaść — jaho sutnaść. Śmierć — vielmi važnaja reč. Ja nie chaču prydumlać abo razumieć pryčynu. Ja nieščaslivaja. Hetaha mnie dastatkova. Vy nie zmožacie lubić mianie viečna, rodnyja maje ludzi. Tak što ja budu šukać ščaście ŭ imhnienni. Ja palaču skroź usiu vašuju luboŭ. Bo adzinaja absalutnaja ŭzajemnaść u mianie u samanianavisci.
Ja prašu vas lubić adno adnoha i nie chavać hetaj lubovi. Nie davać ludziam hinuć. I, chaj banalna, ale žyvicie ciapier u dva razy bolej. Kožny, žyvi majo žyćcio!
Ja lublu. Ja kachaju. Ja nienavidžu. Mnie hetaha chopić.
Kali heta mahčyma, ja budu prychodzić da vas u snach, bo stolki chočacca skazać. Byvajcie.
Prabačcie, kali łaska».
Jak adbyłasia trahiedyja, amal nie viadoma. Vidavočcy pačuli hučny chłapok i pabačyli cieła dziaŭčyny na ziamli. Dalej na miesca pryjechała milicyja, jakaja ŭžo nie dapuskała minakoŭ. Cieła zabrali tolki ŭ pałovu dvanaccataj hadziny, paviedamlajuć vidavočcy.
U licei nie zmahli prakamientavać «Našaj Nivie», što stała pryčynaj samahubstva, patłumačyŭšy heta tym, što dziaŭčynka vučyłasia tam tolki miesiac.
Ciapier čytajuć
Što ŭjaŭlaje saboj baza danych, jakuju siłaviki nazyvajuć «uzłomam «Novaj Biełarusi»9
Kamientary