Žycharam doma pa vulicy Kalinoŭskaha, 78, u Minsku, jakija abjavili bajkot vybaram, paabiacali kapitalny ramont budynka, ale biez madernizacyi fasadu, što jany taksama patrabavali.
Jak paviedamili inicyjatyŭnaj hrupie žylcoŭ doma, pra heta im było paviedamlena 1 kastryčnika na schodzie z udziełam kiraŭnictva administracyi i ŽKH Pieršamajskaha rajona.
Nahadajem, raniej žychary zhadanaha doma nakiravali kalektyŭnuju skarhu na imia Alaksandra Łukašenki, dzie zajavili, što admaŭlajucca hałasavać na vybarach prezidenta, jakija majuć adbycca, i ŭsich inšych vybarach z-za taho, što ŭłady nie pravodziać kapitalny ramont ich doma, pabudavanaha 46 hadoŭ tamu. «U znak pratestu suprać šmathadovaha padmanu z boku ŭładaŭ my admaŭlajemsia ad udziełu ŭ dziaržaŭnych mierapryjemstvach u Respublicy Biełaruś. My majem namier bajkatavać usie vybary ŭ orhany dziaržaŭnaj ułady, jakija pravodziacca ŭ respublicy… Na 11 kastryčnika pryznačany vybary prezidenta. Bolšaść z nas chacieli b uziać udzieł u hałasavańni. Tym bolš što mnohija z nas padtrymlivajuć kandydaturu dziejnaha prezidenta. Na žal, brać udzieł u hetym hałasavańni my nie možam. My nie chočam, hałasujučy za vas, spadar prezident, faktyčna padtrymlivać tyja ŭłady, tych čynoŭnikaŭ, jakija nas padmanvali i padmanvajuć», — havaryłasia ŭ skarzie.
Paśla publikacyi hetaj infarmacyi kampanijaj BiełaPAN žychary atrymali ad pradstaŭnikoŭ ŽKH zaprašeńnie na schod u suviazi z praviadzieńniem kapitalnaha ramontu budynka. Na ahulnym schodzie byli abranyja siem upaŭnavažanych pradstaŭnikoŭ i staršynia kamisii.
Razam z tym u adkazie kamunalnych słužbaŭ žylcoŭ nie ŭsio zadavalniaje. Pra heta jany napisali ŭ zajavie kiraŭniku administracyi i dyrektaru ŽKH Pieršamajskaha rajona. «Ustanoŭlena, što najaŭnaja prajektna-kaštarysnaja dakumientacyja na vykanańnie rabot (zychodziačy z vydzielenych abjomaŭ finansavańnia) nie praduhledžvaje ciepłavuju madernizacyju doma, jakaja patrabujecca. Vyznačana, što kapitalny ramont bieź ciepłavoj madernizacyi (uciapleńnie fasadu) doma niemetazhodny i rabicca nie moža», — havorycca ŭ liście.
Žychary prosiać maksimalna paskoryć praviadzieńnie abśledavańnia doma, atrymańnie techničnaha zaklučeńnia ab najaŭnych defiektach aharodžvajučych kanstrukcyj i ich pramiarzańnia, raspracoŭku ŭsioj nieabchodnaj dakumientacyi i vydzialeńnia dadatkovaha finansavańnia na kapitalny ramont z ulikam ciepłavoj madernizacyi budynka.
Kamientary