Žanr: kryminał, tryler, drama
Režysior: Brajan Chełhielend
U rolach: Tom Chardzi, Poł Andersan, Krystafier Ekłstan, Džošua Chił, Emili Braŭninh, Kolin Morhan, Tara Fitcdžerald, Nikałas Fareł.
Vialikabrytanija, Francyja, 131 chv.
Adznaka: 7
Film raskazvaje historyju bliźniukoŭ Redžynalda i Ronalda Krejaŭ, kultavych fihur złačynnaha śvietu Vialikabrytanii 1960-ch, ad pačatku ich karjery da źniavoleńnia ŭ 1969.
Apovied viadziecca ad asoby žonki Redžy Frensis. Braty ŭznačalvali samuju ŭpłyvovuju bandyckuju hrupoŭku Ist-Enda i adznačylisia vyklučnaj žorstkaściu i nieŭraŭnavažanaściu. Im prypisvajuć uzbrojenyja rabavańni, rekiet, padpały, zabojstvy, a taksama jany byli ŭłaśnikami načnych kłubaŭ, jakija naviedvali navat halivudskija znakamitaści. Siarod ich achviar — kryminalnyja aŭtarytety Džek MakVici i Džordž Korneł.
Siužet zasnavany na knizie «Mastactva hvałtu: Uźlot i padzieńnie bliźniat Krej» Džona Pirsana.
Režysioram i aŭtaram scenara vystupiŭ amierykaniec Brajan Chełhielend, jaki ŭ 1998-m atrymaŭ «Oskar» za najlepšy adaptavany scenar da «Sakretaŭ Łos-Andželesa». Hałoŭnuju rolu atrymaŭ brytaniec Tom Chardzi («Šalony Maks», 2015), pakazaŭšy ŭsio svajo akciorskaje majsterstva ŭ vobrazach chvoraha Ronalda, mańjaka-sadysta, i bolš čułaha i razumnaha Redžy. Duet jamu skłała aŭstralijka Emili Braŭninh («Zabaronieny pryjom», 2011).
Zdymki prachodzili ŭ Łondanie. Dekaracyjaj da stužki stali niekalki lehiendarnych pabaŭ.
«Lehienda» pabiła rekordy boks-ofisaŭ hetaha siezonu. Upieršyniu ŭ historyi brytanskaha kinaprakatu film sabraŭ biesprecedentnyja dla vieraśnia 8 miljonaŭ dalaraŭ i ŭvajšoŭ u top-list samych kasavych filmaŭ Vialikabrytanii.
Stužka budzie cikavaja amataram ekranizacyj kryminalnych historyj, zasnavanych na realnych padziejach. Anhlijski kałaryt, na žal, tut składajuć tolki łondanskija haradskija piejzažy. A voś vytančanaha hvałtu tut šmat.
Kamientary