Na ŭčastku dla hałasavańnia № 29 Centralnaha rajona Homiela jaŭka za ŭsie dni daterminovaha hałasavańnia skłała 73,7%. Usiaho na ŭčastku 677 vybarščykaŭ, daterminova prahałasavali 499 čałaviek.
Jak paviedamiŭ naziralnik Biełaruskaha Chielsinkskaha kamiteta Viktar Adzinočanka, asablivaść učastka ŭ tym, što tam hałasujuć hałoŭnym čynam studenty HDU imia F.Skaryny. Naziralnik zaŭvažyŭ, što na inšych «studenckich» učastkach pracenty vybarščykaŭ, jakija prahałasavali daterminova, buduć niemałyja.
«U nas niama faktaŭ, što studentaŭ homielskich VNU prymušali ci represavali za admovu prahałasavać daterminova, ale što dekany, kuratary hrup, zahadčyki internataŭ nastojliva rekamiendavali naviedać učastki da asnoŭnaha dnia hałasavańnia — heta praŭda. I navat takija rekamiendacyi — heta ŭžo prymus, tamu što kali ciabie načalstva prosić štości zrabić — ciažka admović», — prakamientavaŭ Adzinočanka.
Pavodle jaho słoŭ, u inšych naziralnikaŭ zafiksavanaje surjoznaje razychodžańnie pa kolkaści tych, chto prahałasavaŭ. Naprykład na ŭčastku № 23 Savieckaha rajona Homiela naziralnik zafiksavaŭ 182 hramadzian, jakija prahałasavali, a kamisija ŭ pratakole adznačyła, što addali hałasy ŭžo 427 čałaviek.
Na ŭčastku № 39 Čyhunačnaha rajona i členy kamisii, i naziralniki ad vieteranskaj arhanizacyi, arhanizacyi «Biełaja Ruś» i Sajuza žančyn pracujuć u adnym pracoŭnym kalektyvie. «Heta nie adzinkavy vypadak u Homieli, kali i členy ŭčastkovaj kamisii, i naziralniki — z adnaho kalektyvu. Kali ŭčastak raźmieščany ŭ kaledžy — to heta supracoŭniki kaledža, kali ŭ DK «Homsielmaš» — to i členy ŭčastkovaj kamisii, i naziralniki pracujuć na adnym pradpryjemstvie», — dadaŭ naziralnik.
Jon adznačyŭ asablivaść: učastkovyja kamisii vielmi staranna vykonvajuć farmalnyja patrabavańni zakanadaŭstva i bolš-mienš dobrazyčliva staviacca da naziralnikaŭ.
Pavodle słoŭ naziralnika Leanida Sudalenki, na ŭčastku № 61 Savieckaha rajona Homiela za čas daterminovaha hałasavańnia «adznačylisia» 45,3% vybarščykaŭ. Bolšaść ź ich — navučency liceja lohkaj pramysłovaści.
Kamientary