Načalnik DAI, jaki nie aštrafavaŭ Łukašenku: Ja abapiraŭsia na Kanstytucyju

Hety sprečny incydent zdaryŭsia padčas adkryćcia MKAD-2. Kiraŭnik dziaržavy vyrašyŭ samastojna prajechacca na «Miersedesie» pa novaj darozie. Na fotazdymkach BiełTA, apublikavanych 6 kastryčnika, bačna, što Łukašenka kiravaŭ aŭto, nie pryšpiliŭšysia remieniem biaśpieki.

Telekanał «Biełaruś-1» raspaŭsiudziŭ kadry, na jakich bačna, jak niepryšpileny Łukašenka testuje novuju kalcavuju. Admoŭny adkaz na zapyt zvyčajnaha hramadzianina u Minskaje RUUS skłaŭ načalnik rajonnaha DAI Siarhiej Baran. 

Jeŭraradyjo parazmaŭlała z tym samym načalnikam DAI Minskaha rajona, jaki nie ŭbačyŭ padstavaŭ dla administracyjnaha pracesu ŭ dačynieńni da Alaksandra Łukašenki:

«Ja pisaŭ adkaz, abapirajučysia na hałoŭny narmatyŭny akt našaj krainy — Kanstytucyju. Ničoha lišniaha. A kali niechta choča niešta interpretavać, u niejki inšy bok pasunucca, heta tolki mierkavańnie. Kolki ludziej — stolki mierkavańniaŭ. U kožnaha jurysta svoj punkt hledžańnia. A spračacca i abmiarkoŭvać, kali łaska, hutarcie, abmiarkoŭvajcie. Kali ja ŭ čymści nie maju racyi, to vysłuchaju hetaje mierkavańnie i ŭ mianie na jaho budzie svoj adkaz», — tak tłumačyć svajo rašeńnie načalnik DAI.

Jeŭraradyjo: Ci mahli b vy ŭdakładnić, u jakim mienavita artykule Kanstytucyi tłumačycca, što prezident moža jeździć za rulom, nie pryšpiliŭšysia remieniem biaśpieki?

Siarhiej Baran: Jość Kanstytucyja. Tam majecca artykuł. Toje ž samaje napisana i ŭ zakonie «Ab prezidencie». Tamu ja i napisaŭ «za adsutnaściu padziei administracyjnaha pravaparušeńnia».

Pavialičyć

U artykule 79 Kanstytucyi i ŭ artykule 7 zakona «Ab prezidencie Respubliki Biełaruś» supadaje farmuloŭka: «prezident vałodaje niedatykalnaściu, jaho honar i hodnaść achoŭvajucca zakonam». Ale jak heta źviazana z tym, što kiraŭnik Biełarusi moža nie karystacca remieniem biaśpieki?

Prapanujem razhledzieć hetuju situacyju byłoha sudździu Kanstytucyjnaha suda Valeryja Fadziejeva:

«Ja nie mahu nazvać artykuł, jaki ŭ dadzienym vypadku vyvodzić prezidenta z-pad adkaznaści. Naadvarot, u Kanstytucyi jość norma, što ŭsie roŭnyja pierad zakonam (artykuł 22). U dadzienym vypadku prezident pavinien być prykładam taho, jak treba nie parušać zakon. Tym bolš, što Praviły darožnaha ruchu zaćvierdžanyja jaho ŭkazam», — ličyć juryst.

Prahladajem artykuł 88 Kanstytucyi. Jon tyčycca tearetyčnych vypadkaŭ, kali prezident ździajśniaje dziaržaŭnuju zdradu ci inšaje ciažkaje złačynstva. U takich vypadkach rašeńnie ab źniaćci z kiraŭnika krainy niedatykalnaści prymajuć parłamientaryi. Što tyčycca administracyjnych pravaparušeńniaŭ, nijakich miechanizmaŭ nie prapisana.

Źviartajemsia ŭ Kanstytucyjny sud Biełarusi. Tam nie stali spasyłacca na artykuł, jaki dazvalaje prezidentu nie karystacca remieniem biaśpieki padčas kiravańnia aŭto. Jeŭraradyjo patłumačyli, što pavodle zakona, Kanstytucyjny sud zajmajecca kantrolem za kanstytucyjnaściu narmatyŭna-pravavych aktaŭ u dziaržavie, a naša pytańnie źviazanaje z pravaprymianieńniem i nie lažyć u miežach ich kampietencyi.

Vysokapastaŭleny čynoŭnik, źviazany z zakanadaŭstvam, vykazvaje svajo pryvatnaje mierkavańnie, čamu za historyju na MKAD-2 Łukašenku mohuć zakonna nie pryciahvać da adkaznaści. Adkryćcio Druhoj kalcavoj u dadzienym vypadku možna paraŭnać z rytuałam zakładki pieršaha kamienia pierad budaŭnictvam niejkaha abjekta:

«Ci možna simvaličny momant zakładki kamienia ličyć paŭnavartasnaj budoŭlaj? Tak i tut,śpiecmierapryjemstva na MKAD-2 naŭrad ci možna nazvać paŭnavartasnym darožnym rucham».

Pryhadajem, što, pavodle praviłaŭ darožnaha ruchu, nie karystacca remieniem biaśpieki dazvalajecca tolki instruktaram aŭtaškoł, pasažyram aŭtamabilaŭ śpiecpryznačeńnia, taksistam u nasielenym punkcie i asobam, u jakich jość miedycynskija supraćpakazańni (hienieralizavanaja forma śviarbiačych, buloznych, moknučych dermatozaŭ i ciažarnaść). Prezident, padobna na toje, u hety pieralik nie traplaje.

• 0
• 0
• 0
• 0
• 0
• 0
• 0
• 0