9 śniežnia Maksimilijanu Piakarskamu padčas dvuchhadzinnaha dopytu paviedamili, što jaho abvinavačvajuć pa kryminalnaj spravie, raspačataj za hrafici «Biełaruś maje być biełaruskaj» i «Revalucyja śviadomaści».
Abvinavačvańnie było pierakvalifikavanaje z artykuła 339 (častka 2) Kryminalnaha kodeksu – «Chulihanstva, ździejśnienaje hrupaj asob» na artykuł 341 KK «Apahańvańnie budynkaŭ i psavańnie majomaści». Hety artykuł praduhledžvaje štraf, hramadskija pracy abo aryšt terminam da 3 miesiacaŭ. Ekśpiertyza hrafici zaśviedčyła, što prykmiet ekstremizmu na malunkach nie vyjaŭlena. Ź jaho źniataje abvinavačvańnie za psavańnie biłborda.
Piakarski nastojvaje na tym, što heta administracyjnaja sprava, a nie kryminalnaja.
10 śniežnia na dopyt byŭ vyklikany Vadzim Žaromski. Dopyt u chłopca doŭžyŭsia 4 hadziny. Jamu pakinuli abvinavačvańnie pa č. 2 artykułu 339 KK (chulihanstva, ździejśnienaje hrupaj asobaŭ) i dadali artykuł 341 KK (apahańvańnie zbudavańniaŭ i psavańnie majomaści). Žaromskamu pakinuli ŭsie 3 epizody spravy: malavańnie dvuch hrafici dy psavańnie farbaj sacyjalnaha baniera z vyjavaj supracoŭnikaŭ milicyi pa vuł. Hareckaha ŭ Minsku. Abvinavačvańnie ŭ chulihanstvie Žaromski nie pryznaje, śćviardžaje što im ruchali tvorčyja matyvy. Tolki što chłopcu paviedamili, što jaho čakajuć na dadatkovy dopyt u paniadziełak, u sieradu jamu pradjaviać kančatkovyja abvinavačvańni.
Siońnia Viačasłava Kasinierava pieraviali sa statusa padazronaha ŭ status abvinavačanaha. Śledčyja źniali epizody z naniasieńniem hrafici, ale pakinuli psavańnie biłborda. Ciapier jon prachodzić pa art. 339, častka 2, materyjalny ŭron za jaki chłopcy całkam kampiensavali. Kančatkovaje abvinavačvańnie chłopcu pradjaviać u sieradu.
Z čaćviortaha ŭdzielnika spravy, Jarasłava Uljanienkava, źniali ŭsie abvinavačvańni. Ciapier jon prachodzić u jakaści śviedki.
11 žniŭnia troje chłapcoŭ byli žorstka zatrymanyja pa padazreńni va ŭdziele pa troch kryminalnych spravach: naniasieńni biełaruskamoŭnych hrafici «Biełaruś maje być biełaruskaj» i «Revalucyja śviadomaści, jana ŭžo idzie…», a taksama zakidvańni farbaj biłborda z vyjavami supracoŭnikaŭ milicyi. Biełaruskija pravaabaroncy pryznali ich palitviaźniami. Napiaredadni vybaraŭ Piakarski i Žaromski byli vyzvalenyja z turmy.
Kamientary