Viančańnie kiraŭnika Estonii ścipła prajšło ŭ maleńkaj carkvie na miažy z Łatvijaj
U subotu ŭ Estonii adbyłasia cyrymonija šlubu prezidenta Toomasa Chiendryka Ilviesa i łatvijskaj čynoŭnicy Jevy Kupce. Jeva Kupce ŭziała proźvišča muža i aficyjna stała pieršaj łedzi Estonii.
Cyrymonija šlubu ŭ carkvie prachodziła 2 studzienia ŭ vuzkim siamiejnym kole, na mierapryjemstva prybyli prykładna 40 haściej.
Cyrymonija prachodziła ŭ carkvie śviatoj Hanny ŭ Chaliste. Hetaja carkva raźmiaščajecca na poŭdni krainy niepadalok ad miažy z Łatvijaj i ličycca adnoj z najbolš pryhožych i cikavych u Estonii.
Sama cyrymonija była zakrytaja dla pradstaŭnikoŭ presy, ale paśla jaje maładyja dazvolili siabie sfatahrafavać šmatlikim žurnalistam, jakija dziažuryli kala carkvy.
Jeva Kupce aficyjna stała pieršaj łedzi Estonii. Jana ŭziała proźvišča muža, i ciapier aficyjna źjaŭlajecca Jevaj Ilvies.
Cyrymonija šlubu pačałasia kala 17:00. Za niekalki hadzin da viančańnia kala carkvy sabralisia žurnalisty i miascovyja žychary, niekatoryja ź ich prynieśli ściahi Estonii. Na miesca prybyła i palicyja z sabakami dla pravierki vakolic.
Haspadynia carkvy Aita Łaks raspaviała, što ŭžo z 8 hadzin ranicy ŭ chramie pracavali čatyry hazavyja abahravalniki, bo jašče ŭčora ŭ carkvie było hetak ža choładna, jak i na vulicy. Da pačatku cyrymonii šlubu za aknom było minus 15 hradusaŭ, a tempieratura ŭ pamiaškańni składała 10 hradusaŭ ciapła.
Pierad carkvoj byli padniatyja ściahi abiedźviuch krain — Estonii i Łatvii. Pa słovach Łaks, členy prychodu, žurnalisty i prysutnyja nie mahli ŭbačyć viančańnie prezidenta — na cyrymoniju byli dapuščanyja tolki niekalki dziasiatkaŭ haściej z Łatvii i Estonii. Łaks taksama paviedamiła, što viančańnie projdzie na dźviuch movach — estonskaj i łatyšskaj.
Viančańnie Ilviesa i Kupce praviali probst Estonskaj jevanhielicka-luteranskaj carkvy i nastaŭnik carkvy Chalistie Marka Tyjtus i probst z Łatvii Krysts Kałnyńš.
Jeva Kupce źjaŭlajecca kiraŭnikom adździeła kaardynacyi palityki nacyjanalnaj kibierbiaśpieki Ministerstva abarony Łatvii.
Dla prezidenta Estonii heta budzie treci šlub. Ad papiarednich šlubaŭ u jaho troje dziaciej.
Termin paŭnamoctvaŭ Ilviesa na prezidenckaj pasadzie zakančvajecca ŭ žniŭni nastupnaha hoda. Raniej jon zajaviŭ, što ŭ vypadku ŭstupleńnia ŭ šlub z Kupce da zakančeńnia terminu jaho paŭnamoctvaŭ jana admovicca ad usich pryvilejaŭ, jakija naležać prezidentu Estonii, u tym liku ad pradstaŭnickich vydatkaŭ, sakratara i słužbovaha aŭtamabila.
***
Toomas Chiendryk Ilvies 11 hadoŭ byŭ u šlubie z Evielin Ilvies. U žniŭni 2014 hoda ŭ siamji adbyŭsia razład paśla taho, jak Evielin Ilvies sfatahrafavali ŭ talinskim načnym kafe ź inšym mužčynam - 28-hadovym francuzam Vinsentam Arenahu. U krasaviku 2015 jany pryniali rašeńnie skasavać šlub.
Kamientary