«Čałavieka biez tvaru» zafarbujuć, kali aŭtar nie ŭhavoryć minčukoŭ
Zorka hrečaskaha stryt-artu Ino, aŭtar skandalnaha hrafici «Čałaviek biez tvaru», pryjedzie ŭ Minsk u traŭni. Jon sustreniecca z žycharami damoŭ na vulicy Varanianskaha, jakim nie padabajecca jaho praca. Vysłuchaje ich pažadańni i zavieršyć jaje.
Minčanie pra sustreču papiaredžanyja, a pryjezd hreka ŭzhodnieny z administracyjaj Kastryčnickaha rajona Minska, jakaja padtrymała prajekt Urban Myths i ŭzamien atrymała dzieviać jaskravych murałaŭ na ścienach budynkaŭ.
«Pierarabić karcinu maje prava tolki jaje aŭtar,— supakojvaje ŭsich, chto pieražyvaje za los «Čałavieka biez tvaru», kiraŭnik adździeła ideałohii i kultury Kastryčnickaha rajona Minska Alaksandr Astapovič. — U traŭni jon pryjazdžaje ŭ Biełaruś jaje zaviaršać — heta niezavieršany tvor. My dačakajemsia mastaka. Praviadziem ź im sustreču. Kali jon nie zmoža pierakanać praciŭnikaŭ, nie zmoža dakazać, što heta sapraŭdy pryhožy tvor, kali farby, jakija jon tudy dabavić, i źmieny nie zmohuć zadavolić usich našych hramadzian, karcina, mahčyma, budzie zafarbavanaja».
Pa słovach Astapoviča, hrafici było ŭzhodnienaje z uładami rajona: jany aznajomilisia z eskizam u ahulnych rysach. A toje, što niekamu vynik nie padabajecca — heta narmalna, miarkuje čynoŭnik. Sam jon dobra stavicca da pracy Ino i ciešycca, što jana atrymała značna bolš stanoŭčych vodhukaŭ, čym admoŭnych:
«Ale razam z tym my musim prysłuchoŭvacca da ŭsich mierkavańniaŭ. Tamu dačakajemsia aŭtara i pahladzim, što jon prapanuje. Ci pačuje jon pažadańni haradžan, ci nie pačuje — jaho prava, jak mastaka. A dalej budziem dziejničać pa situacyi».
13 studzienia Minsk uzrušaje navina: Minharvykankam rekamienduje arhanizataram prajekta Urban Myths źniščyć ci pierarabić hrafici «Čałaviek biez tvaru». Takim čynam čynoŭniki reahujuć na šmatlikija skarhi i pietycyi minčan, jakija kažuć, što bajacca hladzieć u vonky, bo na ich hladzić «strašny anioł śmierci». List z podpisam namieśnika staršyni Minharvykankama Ihara Karpienki atrymlivaje adzin z «mitynhujučych»:
Svajo rašeńnie Minharvykankam arhumientuje jašče i tym, što eskiz nie byŭ razhledžany Minskim haradskim mastacka-ekśpiertnym savietam, a značyć, zrobleny jon nielehalna. Maŭlaŭ, mastak nie atrymaŭ ekśpiertnaje zaklučeńnie, što jaho karcina zadavalniaje ekśpiertaŭ.
Kiraŭnik prajekta Urban Myths Aleh Łaryčaŭ kaža, što list pra toje, što stryt-art-abjekty treba ŭzhadniać z mastackim savietam, arhanizatary atrymali, kali prajekt byŭ amal zavieršany. «Praceduru» prajšła tolki «Dziaŭčyna ŭ vyšyvancy» na Rabkoraŭskaj. Tym nie mienš, Łaryčaŭ nie bačyć u rekamiendacyi nahody dla paniki, taksama čakaje viasny, kali praciahniecca i sam prajekt, i pryjedzie Ino, jaki daviadzie svoj tvor da ładu.
Nahadajem, murał «Čałaviek biez tvaru» źjaviŭsia ŭ Minsku ŭ kastryčniku 2015 hoda. Tady ž patrapiŭ u top-10 najlepšych hrafici śvietu pavodle rejtynhu śpiecyjalizavanaha sajta Streetartnews.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii15
Kamientary