TUT.BY źviarnuŭsia da načalnika HUUS i prakurora Minska ŭ suviazi sa źbićciom svajho žurnalista

26 studzienia TAA «TUT BAJ MIEDYA» (partał TUT.BY) nakiravała zvarot načalniku HUUS Alaksandru Barsukovu i prakuroru Minska Siarhieju Chmaruku ŭ suviazi z zatrymańniem i źbićciom žurnalista Paŭła Dabravolskaha supracoŭnikami AMAPa.

Žurnalist TUT.BY byŭ zatrymany i źbity supracoŭnikami AMAPa ŭ budynku suda Frunzienskaha rajona Minska, dzie jon znachodziŭsia pa zadańni redakcyi — aśviatlaŭ chod sudovaha pracesu pa «spravie hraficistaŭ». Kali dvuch aktyvistaŭ vyvieli z zały suda supracoŭniki AMAPa, Pavieł pajšoŭ za imi, fiksujučy toje, što adbyvajecca, na kamieru mabilnaha telefona. U zvarocie padkreślivajecca, što Pavieł mieŭ žurnalisckaje paśviedčańnie, byŭ akredytavany dla aśviatleńnia sudovaha pracesu.

«U adpaviednaści z art. 34 Zakona Respubliki Biełaruś «Ab srodkach masavaj infarmacyi» ŭ suviazi z ažyćciaŭleńniem prafiesijnych abaviazkaŭ žurnalist maje prava źbirać, zapytvać i atrymlivać infarmacyju ź dziaržaŭnych orhanaŭ, prysutničać u rajonach uzbrojenych kanfliktaŭ ci nadzvyčajnych situacyj, na masavych mierapryjemstvach, u miescach inšych hramadska važnych padziej i pieradavać adtul infarmacyju.

U adpaviednaści z art. 7 Zakona Respubliki Biełaruś «Ab srodkach masavaj infarmacyi» niezakonnaje abmiežavańnie svabody masavaj infarmacyi nie dapuskajecca. Ažyćciaŭlać videazdymku ŭ kalidory suda, u miescy, dastupnym dla masavaha naviedvańnia, zakanadaŭstvam nie zabaroniena», — nahadvajuć supracoŭniki TUT.BY.

Z boku rabotnikaŭ orhanaŭ unutranych spraŭ, jakija pravodzili zatrymańnie aktyvistaŭ, ličać na TUT.BY, byli ŭčynienyja dziejańni, jakija hruba parušajuć zakon. Pa słovach Paŭła, supracoŭniki AMAPa pavalili jaho i dvuch zatrymanych na padłohu, stali źbivać nahami, a potym na praciahu 20 chvilin prymušali lažać na padłozie, źnievažajučy i abražajučy.

«Arhumienty, jakija pryvodziacca ciapier pres-słužbaj HUUS, ab niby supracivie supracoŭnikam milicyi, jaki jany vymušanyja byli spynić z užyvańniem fizičnaj siły, nie vytrymlivajuć nijakaj krytyki: niemahčyma sabie ŭjavić, kab pry zatrymańni dvoje chłopcaŭ-aktyvistaŭ i tym bolš nie zacikaŭleny ŭ zychodzie spravy žurnalist stali b kidacca na prafiesijnych supracoŭnikaŭ AMAPa, jakija ŭ niekalki razoŭ pieraŭzychodziać ich kolkaściu i fizičnaj siłaj, pryčym (miarkujučy pa charaktary naniesienych im cialesnych paškodžańniaŭ) šmatkroć. Śviedki, jakija znachodzilisia ŭ zale suda, čuli huki źbićcia na praciahu doŭhaha času. Ab źbićci kažuć i ślady źbićcia, tyja, što zastalisia na ciele našaha žurnalista», — havorycca ŭ dakumiencie.

Supracoŭniki partała taksama źviartajuć uvahu na abstaviny, pry jakich prachodziŭ sud nad samim Paŭłam: «Sud pryniaŭ pastanovu, hruntujučysia vyklučna na «śviedkavych pakazańniach» supracoŭnikaŭ AMAPa, jakija rabili niezakonnaje zatrymańnie i źbićcio žurnalista». Nahadajem, paśla źbićcia ŭ budynku suda Frunzienskaha rajona Paŭła i dvuch aktyvistaŭ pavieźli ŭ RUUS Frunzienskaha rajona Minska, dzie zatrymanyja praviali try hadziny, zatym ich znoŭ advieźli ŭ sud Frunzienskaha rajona i asudzili pa art. 17.1 KaAP «Niecenzurnaja łajanka ŭ hramadskim miescy» i pa art. 23.4 KaAP «Niepadparadkavańnie zakonnym patrabavańniam słužbovaj asoby». Paŭła Dabravolskaha prysudzili da štrafu ŭ 45 bazavych vieličyń — 9 450 000 biełaruskich rubloŭ.

«My aburanyja pavodzinami i dziejańniami supracoŭnikaŭ AMAPa. Pierakananyja, što nichto nie maje prava pieraškadžać ažyćciaŭleńniu prafiesijnaj dziejnaści žurnalista i, tym bolš, prymianiać hvałt. Jašče bolš aburalna, kali takija vypadki adbyvajucca nie ŭ zonie uzbrojenych kanfliktaŭ, nie na masavych akcyjach. U budynku sudu — miescy, dzie pavinna viaršycca pravasudździe, — dziejecca biezzakońnie i biaźmiežža», — havorycca ŭ zvarocie TUT.BY.

U TAA «TUT BAJ MIEDYA» miarkujuć, što ŭ dziejańniach supracoŭnikaŭ pravaachoŭnych orhanaŭ utrymlivajucca prykmiety jak minimum dvuch złačynstvaŭ, praduhledžanych art. 198 KK Respubliki Biełaruś «Pieraškadžeńnie zakonnaj prafiesijnaj dziejnaści žurnalista» i art. 426 KK Respubliki Biełaruś «Pieravyšeńnie ŭłady abo słužbovych paŭnamoctvaŭ».

Pavieł Dabravolski ŭžo źviarnuŭsia z zajavaj ab supraćpraŭnych dziejańniach supracoŭnikaŭ milicyi ŭ Frunzienski rajonny adździeł Śledčaha kamiteta, a taksama prajšoŭ praceduru źniaćcia źbićcia.

«Uličvajučy asablivuju hramadskuju značnaść zachavańnia zakonnaści z boku supracoŭnikaŭ orhanaŭ pravaparadku, a taksama zabieśpiačeńnia svabody słova jak adnaho z asnoŭnych pravoŭ čałavieka ŭ cyvilizavanym hramadstvie, prosim staranna razabracca ŭ abstavinach dadzienaj spravy i pryciahnuć vinavatych da adkaznaści», — havorycca ŭ zvarocie.

• 0
• 0
• 0
• 0
• 0
• 0
• 0
• 0