Pryvatnyja miedycynskija centry z 1 lutaha pakul nie buduć vydavać balničnyja

Miedycynskija centry, jakija z 1 lutaha atrymali prava vydavać listki časovaj niepracazdolnaści, pakul nie hatovyja hetaha rabić. Choć pastanova Ministerstva achovy zdaroŭja i Minpracy i sacabarony, jakaja ŭchvalaje heta, sapraŭdy ustupaje ŭ siłu z nastunaha paniadziełka.

«Budziem vydavać balničnyja ŭ lutym. Datu nie skažu»

Kab vydavać balničnyja, miedcentry pavinny stvaryć u siabie doktarska-kansultacyjnyja kamisii (DKK) minimum z troch čałaviek na čale sa staršynioj, jakija majuć adpaviednuju adukacyju pa ekśpiertyzie. Heta značyć, dla pracy z balničnymi supracoŭniki miedcentraŭ pavinny buduć prajści adpaviednaje navučańnie. Jak paviedamili ŭ Biełaruskaj miedycynskaj akademii paśladypłomnaj adukacyi, mienavita z 1 lutaha ŭ ich prystupaje da zaniatkaŭ tolki pieršaja hrupa supracoŭnikaŭ miedycynskich centraŭ. Zakančvajucca zaniatki 12 lutaha.

Pra kolkaść miedycynskich centraŭ, jakija dasłali svaich supracoŭnikaŭ na navučańnie, nam nie skazali. Sami miedcentry taksama nie asabliva achvotna razmaŭlajuć na hetuju temu.

— Budziem vydavać balničnyja ŭ lutym. Datu nie skažu, — paviedamili ŭ adnym bujnym miedcentry.

U inšym łakanična adkazali: «Z 1-ha lutaha nie budziem». Jašče ŭ dvuch skazali, što nijakich rasparadžeńniaŭ ad kiraŭnictva nakont balničnych nie pastupała.

Infarmacyjaj, jakaja ŭ niejkaj stupieni adlustroŭvaje situacyju ŭ cełym, padzialiŭsia tolki miedycynski centr «ŁADE».

«Dla vydačy balničnych listoŭ nam usim patrebnaja ahulnaja baza miedycynskich dadzienych»

— U ciapierašni čas u miedycynskim centry «ŁADE» viadziecca papiaredniaja praca, — raspavioŭ Uładzimir Harbačoŭ, zasnavalnik hetaha miedycynskaha centra. — Zaraz u nas pierachodny pieryjad. Rychtujem dakumienty. Padali zajaŭki ŭ BiełMAPA na navučańnie 7 čałaviek, jašče 5-6 čałaviek płanujem navučyć druhim etapam, šukajem namieśnika hałoŭnaha ŭrača pa ekśpiertyzie. Jak tolki ŭ nas budzie ŭsio hatova da vydačy balničnych listoŭ — adrazu pačniem vydavać.

Pa słovach Uładzimira Uładzimiraviča, «ŁADE» hatovy vydavać balničnyja u pieršuju čarhu tym ludziam, jakija absłuhoŭvajucca ŭ centry šmat hadoŭ zapar, ź jakimi zaklučany damovy («asabisty terapieŭt», «asabisty piedyjatr», viadzieńnie ciažarnaści), bo daktary dobra viedajuć historyju chvaroby hetych pacyjentaŭ, a taksama ludziam, jakija prychodziać u centr «ŁADE» na apieracyju (tut apierujuć hiniekołahi, flebołahi, praktołahi, otarynałarynhołahi, płastyčnyja chirurhi, stamatołahi-chirurhi).

— Što tyčycca inšych momantaŭ, to my jašče dva hady tamu zajaŭlali, što dla vydačy balničnych listoŭ nam usim — i pryvatnym centram, i dziaržaŭnym ustanovam achovy zdaroŭja — patrebnaja ahulnaja baza miedycynskich dadzienych, — kaža Uładzimir Harbačoŭ. — Kab doktar, upieršyniu bačačy pacyjenta, moh pahladzieć jaho historyju chvaroby, z čym raniej źviartaŭsia, jakija pryznačeńni jamu rabilisia. Akramia taho, nieabchodnaja adzinaja baza balničnych listoŭ, kab daktary bačyli, kali, kim i na jakija terminy raniej byli vydadzieny listki časovaj niepracazdolnaści. Biez adzinych bazaŭ miedycynskaj dakumientacyi i balničnych listoŭ praces vydačy listoŭ časovaj niepracazdolnaści stanovicca nieprazrystym i ciažka kantralavanym.

Nielha skinuć z rachunkaŭ i vysokuju vierahodnaść kanfliktnych situacyj.

Nie vyklučana što chto-niebudź z pacyjentaŭ budzie sprabavać atrymać balničny biez dastatkovych na toje padstaŭ, u advarotnym vypadku pahražajučy skarhami ŭ vyšejšyja instancyi i patrabujučy viarnuć hrošy. Bo jaho meta — atrymańnie balničnaha — nie dasiahnutaja, niahledziačy na toje, što doktar udzialiŭ jamu 30 chvilin času na pryjom.

Kali pacyjent źvierniecca ŭ płatny centr, i balničny jamu nie vydaduć, a ŭ paliklinicy vydaduć (ci naadvarot) — znoŭ mahčymyja kanflikty i skarhi.

Jość masa inšych niuansaŭ. Ale niespraviadliva pazbaŭlać bolšaść dobraprystojnych pacyjentaŭ patrebnaj pasłuhi tolki z-za taho, što chtości zachoča skarystacca hetym niezakonna. Mienavita tamu my razhladajem usie mahčymyja prablemy, źviazanyja z dadzienym pytańniem.

• 0
• 0
• 0
• 0
• 0
• 0
• 0
• 0