Zubry, Aleksijevič, ručniki i Łukašenka, Łukašenka… — Biełaruś pačała vypuskać u ZŠA časopis «The US — Belarus Observer»

Pačynajecca časopis z «pryvitańnia» ad ministra zamiežnych spraŭ Biełarusi Uładzimira Makieja, u jakim čynoŭnik uzhadvaje amierykanskich znakamitaściaŭ ź biełaruskimi karaniami, vykazvaje spadziavańni na dobryja adnosiny pamiž krainami i hetak dalej. Taksama Makiej paviedamlaje, što «Biełaruś – dobraja kraina, kab u joj žyć», (arhumientujučy heta, naprykład, biaspłatnaj miedycynaj), zajaŭlaje, što «u Biełarusi dobra być maci», bo «urad płacić za naradžeńnie dzicia», a taksama zachoŭvaje pracoŭnaje miesca i apłačvaje trochhadovy adpačynak ba ciažarnaści i vychavańni dzicia. Praŭda, sumy, jakija «Urad płacić», Makiej čamuści nie ahučvaje.

A ŭ svaim ustupnym słovie redakcyjnaja kamanda ŭzhadvaje Śviatłanu Aleksijevič, jakaja atrymała Nobieleŭskuju premiju, za toje, što vyvučała «čałaviečy hołas». Praŭda, da hetaha adrazu prykručana palityčna pravilnaja sientencyja:

«A što takoje čałaviečy hołas mienavita? U 2000 hodzie prezidenckija vybary ŭ ZŠA sutyknulisia z surjoznaj palemikaj i pieralik hałasoŭ pačaŭsia ŭ štacie Fłaryda, pierš čym jon byŭ spynieny Viarchoŭnym sudom. Praź dziesiać hadoŭ, prezidenckich vybaraŭ u Biełarusi taksama sutyknulisia sprečki. U hetym vydańni my viarnulisia da hetaj temy, pradstaviŭšy słova niezaležnym naziralnikam biełaruskich prezidenckich vybaraŭ 2015. Pieradusim vybary pradstaŭlajuć hołas naroda. Jany pakazvajuć svabodu ŭ Biełarusi, tak ža jak i ŭ Amierycy».

Uvohule, zaŭvažna, što časopis aficyjny. Naprykład, artykuł pra rasijskaha paeta Jaŭhienija Jeŭtušenku (jaki, darečy, pracuje vykładčykam adnaho z amierykanskich univiersitetaŭ) prailustravany jaho fotazdymkam z Łukašenkam, a prykładna tracina tekstu apisvaje sustreču paeta ź biełaruskim prezidentam.

Dalej idzie ese ab pohladzie na Biełaruś z-za miažy, potym – tyja samyja hałasy niezaležnych naziralnikaŭ na vybarach. Zatym – artykuł z nazvaj «Amierycy patrabujucca novyja siabry», u jakim śćviardžajecca, što biełarusy tradycyjna lubiać ruskich i amierykancaŭ (majučy na ŭvazie kulturu), i što Biełaruś moža stać adnym z samych viernych amierykanskich siabroŭ - kali, kaniečnie, Amieryka nie budzie fakusiravacca na niedachopach.

Dalej, pad šyldaj «ekskluziŭ» nadrukavana intervju z Łukašenkam. Usio b dobra, ale heta tekst 15-hadovaj daŭniny. Praŭda jaho aŭtar, hanarovy konsuł Biełarusi ŭ štacie Fłaryda, Michaił Marhulis, adznačaje, što niekatoryja pytańni nie zhubili aktualnaści i siońnia.

Taksama ŭ časopisie ŭzhadvajecca paśpiachovaść Biełarusi ŭ IT-śfiery, pieršy namieśnik minekanomiki Biełarusi Alaksandr Zabaroŭski raśpisvaje pryvabnaść inviestavańnia ŭ našu krainu, raskazvajuć pra Aleksijevič i Łučanka, rušniki i Biełaviežskuju pušču (jakaja čamuści nazyvajecca ŭ vydańni Belavezhskaya forest).

Uvohule, časopis vyhladaje jak toje, čym jon i źjaŭlajecca – heta 50-staronkavy rekłamny buklet, jaki rekłamuje nie tavar ci pasłuhu, a nievialikuju krainu ŭ centry Jeŭropy. Da vydańnia časopisa maje niepasrednaje dačynieńnie fond «Duchoŭnaja dypłamatyja», jaki ŭznačalvaje toj samy intervjujer Łukašenki Michaił (Majkł) Marhulis.

Pa słovach vydaŭcoŭ, va ŭsich materyjałach numara «prysutničaje matyŭ duchoŭnaści, bieź jakoj nie moža być paŭnavartasnym žyćcio naroda».

U «Duchoŭnaj dypłamatyi» taksama paviedamlajuć, što ŭ nastupnym numary časopisa «buduć nadrukavany artykuły pra lehiendarnaha tenisista Biełarusi Maksima Mirnaha, intervju z dyrektaram Departamienta Amieryki ŭ MZS Biełarusi Aleham Kraŭčanka, intervju sa Śviatłanaj Alaksiejevič, natatki pra biełaruskich žančyn u Amierycy, pra pošuki šlachu raźvićcia śvietu i asobnych krain, vieršy Jaŭhiena Jeŭtušenka, novyja porcyi biełaruskaha humaru i mnohaje inšaje ». Fond śćviardžaje, što atrymalnikami časopisa źjaŭlajucca členy Sienata, Kanhresu, najbujniejšyja univiersitety i biblijateki, banki i vialikija kampanii, avijalinii ZŠA.

Aznajomicca z PDF-viersijaj časopisa možna tut. 

• 0
• 0
• 0
• 0
• 0
• 0
• 0
• 0