U Minpracy nazvali 3 varyjanty pavyšeńnia piensijnaha ŭzrostu

Ministr pracy i sacyjalnaj abarony padkreśliła, što kančatkovaje rašeńnie budzie pryniata paśla «šyrokaha abmierkavańnia» hetaha pytańnia. Adnak, jak mienavita budzie prachodzić heta abmierkavańnie, nie ŭdakładniła.

«Ja źviartaju ŭvahu na toje, što heta prapanova. Heta pieršaje abmierkavańnie ŭ takim šyrokim składzie na ŭzroŭni prezidenta. Tamu kiraŭnik dziaržavy źviarnuŭ uvahu, što abaviazkova pavinna być uličana mierkavańnie hramadstva, vielmi važnaja zvarotnaja suviaź z boku ludziej, — skazała ministr. — Tolki paśla hetaha budzie prymacca kančatkovaje rašeńnie».

Pavodle jaje słoŭ, prapanujecca pačać pavyšać piensijny ŭzrost z 1 studzienia 2017 hoda. Rabić heta buduć u niekalki etapaŭ. Na razhlad prezidenta vynieśli try varyjanty.

Pieršy varyjant praduhledžvaje vychad na piensiju žančyn u 60 hadoŭ i mužčyn u 65. Marjana Ščotkina adznačyła, što heta samy ekanamična prymalny varyjant, bo daje dobryja pakazčyki.

Druhi varyjant byŭ zrobleny z ulikam demahrafičnych pracesaŭ: vychad na piensiju žančyn u 60 hadoŭ, mužčyn - u 63 hady. «Tut za asnovu brałasia pierš za ŭsio toje, što siońnia siaredniaja praciahłaść žyćcia žančyn składaje 78,4 hoda, a atrymańnie piensii — bolš za 20 hadoŭ paśla vychadu na piensiju», — adznačyła ministr.

«Ale ŭźnikaje pytańnie: ci možam my siońnia vykraślić z rachunkaŭ sacyjalny aśpiekt, nahruzku na žančyn? Ci pavinna być roźnica pamiž vychadam na piensiju ŭ mužčyn i žančyn? Jakaja nahruzka na žančyn u chatniaj haspadarcy? Ci dasiahnuli my siońnia taho ŭzroŭniu hiendernaj roŭnaści?» — praciahnuła Maryjana Ščotkina.

Zychodziačy z hetaha, treci varyjant praduhledžvaje ŭviadzieńnie piensijnaha ŭzrostu z 58 hadoŭ dla žančyn i z 63 — dla mužčyn.

Što tyčycca tempu, ź jakim płanujecca pavialičvać piensijny ŭzrost, to najbolš aptymalnym źjaŭlajecca z krokam u paŭhoda.

«My ŭžo zhubili momant, kali možna było ruchacca pa adnym ci try miesiacy. Kali my chočam zachavać stabilnaść u dziaržavie, to siońnia samy nievialiki temp, jaki my možam sabie dazvolić, — heta 6 miesiacaŭ. Jość i inšyja prapanovy: 8 miesiacaŭ, 1 hod. Ale 1 hod — heta vielmi žorstki varyjant», — skazała ministr.

U jakaści arhumientacyi dla takoj piensijnaj «reformy» Maryjana Ščotkina padzialiłasia statystyčnymi vykładkami: kali ŭ 2001 hodzie suadnosiny piensii da zarabotnaj płaty byli 45%, to ŭ 2015 hodzie było ŭžo 41,7%. «Naša nacyjanalnaja biaśpieka nie dapuščaje situacyi, pry jakoj hetyja suadnosiny apuściłasia b nižej za 40%. Dobra było b, kab pavialičvałasia», — skazała ministr.

Pa słovach ministra, ciapier u nas 61 piensijanier na 100 pracujučych, ale pa prahnozach ŭ 2020 hodzie hetyja suadnosiny budzie ŭžo 66 da 100, kali ničoha nie rabić, to u 2030 hodzie - 78 piensijanieraŭ na 100 pracujučych. «Ci hatovyja my da hetaha, hatovyja my pamianšać piensii? Nie. Hatovyja my pavialičvać taryfy ŭ Fond sacyjalnaj abarony? Nie. Hatovyja kardynalna mianiać sistemu? Taksama abmiarkoŭvałasia», — raspaviała Maryjana Ščotkina.

Prahučaŭ i adkaz na pytańnie, jakoje zadaŭ ŭ pačatku narady ŭradu Alaksandr Łukašenka: «My ŭžo padyšli da taho surjoznaha momantu, kali treba prymać rašeńnie, ci jašče situacyja cierpić, z punktu hledžańnia ekanomiki vyklučna».

«Ci možam my abyścisia siońnia i nie razhladać pavyšeńnie piensijnaha ŭzrostu? Kazać ščyra — nie, — zajaviła ministr pracy i sacyjalnaj abarony. — Zadača kožnaj dziaržavy — harantavać svoječasovaść i paŭnatu vypłaty piensij. Bolš za toje, pamier piensij, a heta dabrabyt piensijanieraŭ, ni ŭ jakim razie nie pavinien pamianšacca, a tolki pavialičvacca, pa mienšaj miery, zachoŭvacca ŭ adnosinach da siaredniaj zarabotnaj płaty».

Apytanka

• 0
• 0
• 0
• 0
• 0
• 0
• 0
• 0