Siońnia stała viadoma, što supracoŭniki KDB zatrymali biznesmena, adnaha z najbahaciejšych ludziej krainy Juryja Čyža.
U 2011 hodzie «Naša Niva» drukavała artykuł, jaki padrabiazna apaviadaŭ ab historyi pośpiechu ŭradženca Biarozaŭskaha rajona, jahonyja pieršyja kroki ŭ biznesie.
Siońnia my ŭzhadvajem jašče niekatoryja momanty ź bijahrafii ŭładalnika «Trajpła», jakija nie ŭvajšli ŭ tuju publikacyju.
Žonka — uładalnica viełnes-kłuba, dzieci vučylisia za miažoj
Śviatłana Čyž, žonka miljaniera, u 2015 hodzie trapiła ŭ śpis «Top-50 samych stylovych žančyn Biełarusi» pa viersii časopisa XXL.
Niekali ŭ intervju «Narodnaj voli» Juryj Čyž kazaŭ, što jahonaja žonka vykanała «svoj hramadzianski abaviazak — naradziła i vychavała traich dziaciej», a ŭžo paśla hetaha vyrašyła zaniacca biznesam.
Jana źjaŭlajecca ŭłaśnicaj viełnes-kłuba EVO.
Viełnes — heta takaja kancepcyja zdarovaha ładu žyćcia, zasnavanaha na spałučeńni fizičnaha i duchoŭnaha zdaroŭja. Skarystacca pasłuhami centra mohuć tolki členy kłuba — heta zakrytaja ŭstanova.
Viadoma, što Śviatłana Čyž vałodaje kvateraj na 300 kvadratnych mietraŭ u «Domie la Trajeckaha».
Starejšyja dačka i syn Juryja i Śviatłany Čyžoŭ atrymlivali adukacyju za miažoj. Siarhiej — u Anhlii, Taćciana — u Francyi.
«Synu było ciažka ŭ Anhlii, jaho ciahnuła dadomu, ale jon tryvaŭ. A kali skončyŭ navučańnie, skazaŭ, što chacieŭ by viarnucca. Ciapier pracuje razam sa mnoj», — kazaŭ Čyž.
Paśla vučoby ŭ Oksfardzie Siarhiej staŭ siabram naziralnaj rady Minskaha zavoda pienistych vinaŭ, akcyjanieram jakoha źjaŭlajecca «Trajpł».
Taćciana taksama viarnułasia na Radzimu, jana vučyłasia ŭ Paryžy hatelnamu i restarannamu biznesu.
Małodšy syn Čyža vučycca ŭ BNTU pa śpiecyjalizacyi «Ekanomika i kiravańnie vytvorčaściu».
Kapaŭ bulbu, kasiŭ travu, adpačyvaŭ na mory…
…z Alaksandram Łukašenkam.
Juryj Čyž niaźmienna ŭvachodziŭ u toj nievialiki puł, ź jakim baviŭ čas kiraŭnik Biełarusi Alaksandr Łukašenka.
Navat u minułym hodzie Čyž razam z Łukašenkam kapaŭ bulbu ŭ Drazdach, zvoziŭ kavuny i dyni. Prysutničaŭ jon pry navučeńni francuza Depardjo navykam kaśby.
Hetaksama Juryj Čyž zaŭsiody supravadžaŭ kiraŭnika Biełarusi padčas adpačynkaŭ — ci to ŭ Sočy, ci ŭ AAE. Ź biznesmenaŭ u takich mierapryjemstvach udzielničaŭ jašče Alaksandr Šakucin, choć usie viedali, što pamiž hetymi dvuma miljanierami isnavaŭ peŭny antahanizm.
Hadzińniki za 400 tysiač dalaraŭ
Skandynaŭskija miljaniery starajucca nie demanstravać svajo bahaćcie. Chodziać u zvyčajnym adzieńni, jeździać na zvyčajnych mašynach. Juryj Čyž — bahatyr inšaha typu. Naprykład, biznesmen zaŭsiody publična źjaŭlaŭsia ź vielmi darahimi hadzińnikami na ruce.
U 2011 hodzie «Naša Niva» zafiksavała, što Juryj Čyž nosić płacinavy hadzińnik Ulysse Nardin, jakich usiaho 30 štuk u śviecie. Cana takoha hadzińnika vahałasia ŭ rajonie 400 tysiač dalaraŭ.
Praz dva hady ŭładalnik «Trajpła» pryjšoŭ na vykankam Biełaruskaj fiederacyi futboła z Patek Philippe Celestial Grand Complication, cana jakoha — u rajonie 260 tysiač dalaraŭ.
Voś da takich pryhožych rečaŭ mieŭ ciahu miljanier.
Cikavaja maniera hulać u futboł
Čyž — zaŭziaty amatar futboła i baraćby. Jon naviedvaŭ praktyčna ŭsie hulni svajho «Dynama». Pryčym apošnim časam na stadyjonie «Traktar» jon siadaŭ prosta na trybunach, a nie ŭ niejkaj łožy. Zaŭsiody niedaloka ad jaho siadzieŭ były premjer-ministr Uładzimir Jarmošyn. Čyž i sam nie suprać pahulać u futboł. Hałoŭny trenier zbornaj Biełarusi Alaksandr Chackievič byŭ śviedkam, jak biznesmen trymajecca na futbolnym poli.
«Napeŭna, z boku heta vyhladaje dosyć cikava. Ja nie raz hulaŭ i za kamandu Juryja Sanyča, i suprać jaje. Emocyj šmat. Moža, techniki i majsterstva časam brakuje, ale zapał i enierhija usio heta kampiensujuć. Juryj Sanyč vielmi nie lubić prajhravać. Časta pačynaje kiravać usimi na poli. Hulaje vyklučna centralnaha napadnika. Časam dziejničaje za košt tarana, časam za košt svajho aŭtarytetu. A časam biare na siabie sudziejskija abaviazki. Sprečnaja situacyja, supiernik kryčyć, maŭlaŭ, ničoha nie było, a Juryj Sanyč spyniajecca i kaža: «Nie, tut sapraŭdy byŭ foł». I ŭsie pahadžajucca:). Niekatoryja momanty, viadoma, kamiedyjnyja. Ale hałoŭnaje, što našy kuli — heta emocyi i dobry nastroj», — kazaŭ Chackievič u intervju by.tribuna.
Budavaŭ pad Minskim novyja rezidencyi
Čyž maje katedž u staličnych Drazdach, samym prestyžnym kvartale Biełarusi, ale vyrašyŭ jašče zajmieć i majontak za miežami Minska. Jahony novy dom znachodzicca kala Łahojska. Ahulnaja płošča katedža vielizarnaja, ažno 875 m2. U dvary zapłanavana łaźnia i basiejn.
Čyž redka davaŭ intervju nie na spartyŭnyja temy. Adnojčy jon raskazaŭ pra svaje pryjarytety ŭ muzycy.
«Ja ŭ płanie muzyki usiajedny, ale bolš lublu aŭtarskija pieśni. Vielmi padabajecca Uładzimir Vysocki. Nu i naohuł — retra: muzyka 1970—1980-ch, tyja rečy, na jakich vyras. Usio ž taki raniej bolš było sensavaha i vysokamastackaha. A ciapier: dva razy tupnuŭ, dva razy prystuknuŭ».
Ciapier čytajuć
Što zdaryłasia z vykładčykam BNTU Michaiłam Ščukinym, jaki pamior pry zatrymańni. Viersija milicyi10
Kamientary