U Minskim haradskim sudzie, dzie praciahvajecca słuchańnie pa spravie bujnoj złačynnaj hrupy pa raspaŭsiudžvańni narkotykaŭ, 24 sakavika dapytany hałoŭny fihurant Kanstancin Viluha.
Mienavita jon, pavodle viersii śledstva, u 2011 hodzie zapuściŭ sajt LegalMinsk, praź jaki raspaŭsiudžvalisia psichatropnyja i narkatyčnyja rečyvy. 4 listapada 2014 hoda bajcy śpiecpadraździaleńnia «Ałmaz» zatrymali aŭtamabil Mercedes-Benz S 550 z numarnymi znakam «0101 MN» uradavaha ŭzoru. Za rulom znachodziŭsia Viluha. Da aryštu jon farmalna byŭ dyrektaram kampanii «VKM-hrup» pa vytvorčaści minieralnaj vady, adnak faktyčna firma tak i nie pačała svaju dziejnaść.
Viluhu vystaŭlenaje abvinavačvańnie: u stvareńni złačynnaj arhanizacyi (č. 3 art. 285 KK); niezakonnym abarocie narkotykaŭ, učynienym arhanizavanaj hrupaj (č. 4 art. 328 KK); niezakonnaj pradprymalnickaj dziejnaści, ažyćcioŭlenaj arhanizavanaj hrupaj (č. 3 art. 233 KK); złoŭžyvańni ŭładaj abo słužbovymi paŭnamoctvami (č. 3 art. 424 KK); złoŭžyvańni ŭładaj, pieravyšeńni ŭłady albo biaździejnaści ŭłady, što pryviało da ciažkich nastupstvaŭ (č. 3 art. 455 KK); machlarstvie (č. 2 art. 209 KK).
Abvinavačany nie pryznaŭ vinu ni pa adnym z vyłučanych abvinavačańniaŭ. Jon taksama admoviŭsia ad davańnia pakazańniaŭ na hetym pracesie. «Usie tłumačeńni — paśla dopytu śviedak», — zajaviŭ Viluha. Adnak sud vyrašyŭ začytać tyja pakazańni, jakija abvinavačany daŭ na papiarednim śledstvie.
Tak, praź niekalki dzion paśla zatrymańnia jon daŭ čystasardečnaje pryznańnie ab tym, što z 2011 pa 2013 hady zajmaŭsia niezakonnaj pradprymalnickaj dziejnaściu, a mienavita pradavaŭ praź internet lehalnyja na terytoryi Biełarusi kurylnyja sumiesi. Tavar pryvoziŭ z Rasii. Za hety pieryjad zarabiŭ 150 tysiač dołaraŭ. Pavodle viersii śledstva, złačynnaja hrupa Viluhi na prodažy narkotykaŭ zarabiła prykładna 1,5 młn. dołaraŭ.
Litaralna praz tydzień Viluha napisaŭ jaŭku z pavinnaj na imia načalnika SIZA № 1 Minska. Jon pryznaŭ, što Siarhiej Rybko, jaki zatrymany ŭ Rasii, a taksama Alina Cierahiera, jakaja prachodzić abvinavačanaj pa «spravie 17», pracavali na jaho jak kurjery. Akramia taho, Viluha raspavioŭ, što byŭ znajomy ź niekalkimi supracoŭnikami HUBAZiK MUS, pieradavaŭ im infarmacyju pra inšych raspaŭsiudžvalnikaŭ psichatropnych i narkatyčnych rečyvaŭ. Siarod takich znajomych byŭ Kanstancin Dzienisievič, jaki zaraz prachodzić abvinavačanym pa «spravie 17».
Viluha na stadyi papiaredniaha śledstva nastojvaŭ, što ŭsie sumiesi, jakija jon pradavaŭ, byli lehalnymi na toj momant u Biełarusi. Tavar papiarednie prachodziŭ ekśpiertyzu. Chto mienavita padavaŭ vyniki analizu, abvinavačany nie rastłumačyŭ. Pavodle jaho słoŭ, jon nie byŭ asabista znajomy ź Iharam Karycki i Dźmitryjem Vieracienskim — byłymi supracoŭnikami KDB, jakija taksama źjaŭlajucca abvinavačanymi pa «spravie 17».
Padčas sudovaha pracesu Viluha zajaviŭ, što abiedźvie jaŭki z pavinnaj jon davaŭ pad naciskam supracoŭnikaŭ pravaachoŭnych orhanaŭ. «Mnie pahražali, šantažavali. Pra heta i pra toje, što ja 35 dzion pravioŭ u karcary, ja raspaviadu paźniej, kali dapytajuć śviedak», — zajaviŭ abvinavačany.
U sudzie abvieščany pierapynak da 25 sakavika. Na hety dzień pryznačany dopyt pieršych śviedak pa spravie.
Kamientary