Uładzimir Makiej i Dźmitryj Kisialoŭ abmierkavali pracu karpunkta «Rośsija siehodnia»
Minsk, 6 krasavika. Ministr zamiežnych spraŭ Biełarusi Uładzimir Makiej 6 krasavika sustreŭsia z hienieralnym dyrektaram mižnarodnaha infarmahienctva «Rośsija siehodnia» Dźmitryjem Kisialovym, jaki prybyŭ u Minsk.
Jak paviedamlaje pres-słužba biełaruskaha MZS, na sustrečy abmiarkoŭvałasia supracoŭnictva ŭ ramkach infarmacyjnaj prastory Sajuznaj dziaržavy, a taksama pytańni, jakija tyčacca pracy karpunkta MIA «Rośsija siehodnia» ŭ Biełarusi.
Makiej zajaviŭ, što MZS adkrytaje dla ŭzajemadziejańnia z pradstaŭnikami ŚMI, u tym liku z supracoŭnikami infarmahienctva «Rośsija siehodnia». U svaju čarhu Kisialoŭ padkreśliŭ, što ahienctva zacikaŭlenaje ŭ aśviatleńni padziej, jakija adbyvajucca ŭ Biełarusi, a taksama ŭ supracoŭnictvie ź biełaruskimi dziaržaŭnymi orhanami i ŚMI «jak u dvuchbakovym farmacie, tak i ŭ kantekście intehracyjnych abjadnańniaŭ».
7 krasavika Dźmitryj Kisialoŭ voźmie ŭdzieł u adkryćci multymiedyjnaha pres-centra Sputnik u Minsku, fotavystavie «Intehracyja ŭ asobach», pryśviečanaj 20-hodździu padpisańnia damovy ab utvareńni Sajuznaj dziaržavy Biełarusi i Rasii, i daść pres-kanfierencyju.
Dazvoł na pracu ŭ Biełarusi karpunkt MIA «Rasija siońnia» atrymaŭ u kancy 2014 hoda. Nieŭzabavie ŭ Minsku pačała pracu biełaruskaja redakcyja stvoranaha ahienctvam navinovaha prajekta pad nazvaj Sputnik.
Mižnarodnaje infarmacyjnaje ahienctva «Rośsija siehodnia» stvoranaje ŭ śniežni 2013 hoda na bazie infarmahienctva RIA Novosti zhodna z ukazam prezidenta Uładzimira Pucina. Asnoŭnym napramkam dziejnaści ahienctva źjaŭlajecca aśviatleńnie dziaržaŭnaj palityki Rasii i rasijskaha hramadskaha žyćcia za miažoj. Hiendyrektaram novaha ahienctva byŭ pryznačany viadučy telekanała «Rośsija 1» Dźmitryj Kisialoŭ, viadomy svajoj praŭładnaj pazicyjaj, a taksama adyjoznymi repartažami, u tym liku pra apošnija padziei va Ukrainie.
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy20
Kamientary